ۇلىتاۋ وبلىسىنىڭ ورتالىعىنان شالعاي ورنالاسقان ۇلىتاۋ اۋدانىندا اۋدان تۇرعىندارى، قوناقتارى مەن جاستار اراسىندا قۇقىقتىق مادەنيەتتى قالىپتاستىرۋ، سىبايلاس جەمقورلىقتىڭ الدىن الۋ، قارجىلىق قاۋىپسىزدىكتى ارتتىرۋ جانە ەسىرتكى قىلمىسىنا قارسى ءتۇسىندىرۋ جۇمىستارىن كۇشەيتۋ ماقساتىندا «ادال قوعام: زاڭ، سانا جانە قاۋىپسىزدىك» اتتى فورۋم ۇيىمداستىرىلدى.
اقپاراتتىق-اعارتۋشىلىق فورماتتا وتكەن شاراعا اۋدان تۇرعىندارى، جاستار، مەملەكەتتىك ورگانداردىڭ وكىلدەرى جانە بۇقارالىق اقپارات قۇرالدارىنىڭ وكىلدەرى قاتىستى. فورۋم بارىسىندا قاتىسۋشىلارعا ينتەرنەت-الاياقتىقتىڭ الدىن الۋ جولدارى، دروپپەرلىك سحەمالاردىڭ قاۋىپتىلىگى، تسيفرلىق قاۋىپسىزدىك ەرەجەلەرى، سونداي-اق ەسىرتكى قىلمىسىنىڭ قوعامعا تيگىزەتىن زارداپتارى تۋرالى جان-جاقتى اقپارات بەرىلدى.
سونىمەن قاتار جاستار اراسىندا زاڭعا قۇرمەت قالىپتاستىرۋ، قۇقىقتىق ساۋاتتىلىقتى ارتتىرۋ جانە سالاۋاتتى ءومىر سالتىن ناسيحاتتاۋ ماسەلەلەرى كەڭىنەن تالقىلاندى. ماماندار قوعامداعى قاۋىپسىزدىك پەن ءتارتىپتى ساقتاۋ ءار ازاماتتىڭ ورتاق جاۋاپكەرشىلىگى ەكەنىن اتاپ ءوتتى.
ءىس-شارانىڭ تاجىريبەلىك بولىمىندە ارنايى قىزمەت وكىلدەرى وزدەرىنىڭ كاسىبي دايىندىقتارىن كورسەتتى. كينولوگيالىق قىزمەت ماماندارى قىزمەتتىك يتتەردىڭ كومەگىمەن تىيىم سالىنعان زاتتاردى انىقتاۋ تاسىلدەرىن تانىستىردى.
فورۋم اياسىندا قاتىسۋشىلارعا ينتەراكتيۆتى ويىندار، سۇراق-جاۋاپ الاڭدارى جانە كونتسەرتتىك باعدارلاما ۇيىمداستىرىلىپ، جاستاردىڭ بەلسەندى قاتىسۋىنا مۇمكىندىك جاسالدى.
مامانداردىڭ پىكىرىنشە، مۇنداي كەزدەسۋلەر جاستاردىڭ بويىندا قۇقىقتىق مادەنيەت پەن قوعامدىق جاۋاپكەرشىلىكتى قالىپتاستىرىپ، سىبايلاس جەمقورلىققا، ينتەرنەت-الاياقتىققا جانە ەسىرتكى قىلمىسىنا قارسى يممۋنيتەتتى كۇشەيتۋگە ىقپال ەتەدى.
اتالعان فورۋمدى ۇلىتاۋ وبلىسى پوليتسيا دەپارتامەنتى، ۇلىتاۋ وبلىسى بويىنشا ەكونوميكالىق تەرگەپ-تەكسەرۋ دەپارتامەنتى، قر مەملەكەتتىك قىزمەت ىستەرى اگەنتتىگىنىڭ وبلىستىق دەپارتامەنتى جانە «ۇلىتاۋ جاستارى» قوعامدىق بىرلەستىگى بىرلەسىپ ۇيىمداستىردى.
