قازاقتىڭ ءبىرتۋار پەرزەنتى مۇستافا وزتۇرىكتىڭ ەسكەرتكىشى قوقىس ۇيىندىلەرىنىڭ ىشىندە تۇر. ۆيدەودان قاڭىلتىرلاردىڭ اراسىنا قاسقايىپ تۇرعان تاس ءمۇسىندى كورۋگە بولادى. بۇل جايلى "ادىرنا" ۇلتتىق پورتالى @exk.kz-كە سىلتەمە كورسەتە وتىرىپ حابارلادى.
بۇدان بۇرىن، 2004 جىلى الماتى وبلىسى، تالعار اۋدانى، بەساعاش اۋىلىندا قويىلعان مۇستافا وزتۇرىكتىڭ ەسكەرتكىشى سىنعا ۇشىرايدى. 2014 جىلى بەساعاشقا جاڭا ەسكەرتكىش قويىلىپ، ەسكىسى شىعارىپ تاستالعان. قوقىس ۇيىندىلەرىنىڭ اراسىندا قاسقايىپ تۇرعان باتىردىڭ ءمۇسىنى اتالمىش العاشقى ونەر تۋىندىسى بولۋى مۇمكىن.
ازىرگە قازاقتان شىققان قاھارمان باتىردىڭ بەينەسىن قوقىس ءۇيىندىسىنىڭ ورتاسىنا ورناتقاندار جايلى ناقتى دەرەكتەر جوق.
View this post on Instagram
مۇستافا وزتۇرىك 1954 جىلى تۇركيانىڭ قايسەرى قالاسىنا قاراستى مۇساحودجالى اۋىلىندا دۇنيەگە كەلگەن. بەلگىلى سپورتشى، تاەكۆوندودان قارا بەلبەۋ 7 داننىڭ يەگەرى، قازاقستان جانە تۇركيا تاەكۆوندو (WTF) فەدەراتسياسىنىڭ نەگىزىن قالاۋشى، حالىقارالىق دارەجەدەگى جاتتىقتىرۋشى.
مۇستافا 1995 جىلدىڭ 11 ناۋرىز كۇنى الماتىداعى بالۋان شولاق اتىنداعى سپورت سارايىندا ءوتىپ جاتقان كيكبوكسينگتەن جارىستى تاماشالاۋعا بارادى. جارىس اياقتالعاننان كەيىن مۇستافا ءوزىن جايسىز سەزىنەدى دە، دارىگەر شاقىرادى. دارىگەرلەر مۇستافانى الماتى قالاسىنداعى قر پرەزيدەنتى ءىس باسقارماسى مەديتسينالىق ورتالىعىنىڭ ورتالىق كلينيكالىق اۋرۋحاناسىنا جاتقىزادى.
مۇستافا وزتۇرىك 1995 جىلدىڭ 15 ناۋرىز كۇنى الماتى قالاسىندا قايتىس بولادى. قارىنداسى فەرۋحاننىڭ جانە تۋىستارىنىڭ شەشىمىمەن مۇستافا وزتۇرىك ىستانبۇلداعى قازاقتار كوپتەپ تۇراتىن گۇنەشلى اۋدانىنداعى زيراتقا ءوزىنىڭ اكەسىنىڭ جانىنا جەرلەنەدى.
"ادىرنا" ۇلتتىق پورتالى
