جەتىسۋ وبلىسى كەربۇلاق اۋدانىنىڭ تۇرعىندارى ساپالى مەديتسينالىق كومەككە قول جەتكىزۋ مۇمكىندىگىنە يە بولدى. ەندى قاجەتتى تەكسەرۋلەردەن ءوتىپ، ەم-دومدى اۋدان اۋماعىندا الۋعا بولادى. رەسپۋبليكا كۇنى قارساڭىندا سارىوزەك اۋىلىندا كۇردەلى جوندەۋ جۇمىستارى جۇرگىزىلىپ، سەيسميكالىق كۇشەيتۋدەن وتكەن ورتالىق اۋداندىق اۋرۋحانا اشىلدى. جالپى، سوڭعى ءۇش جىلدا اۋداننىڭ اۋىلدىق ەلدى مەكەندەرىندە 19 جاڭا دەنساۋلىق ساقتاۋ نىسانى سالىنىپ، پايدالانۋعا بەرىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
كەربۇلاق اۋداندىق ورتالىق اۋرۋحاناسىنىڭ ستاتسيونارلىق ءبولىمى 1986 جىلى سالىنعان. عيمارات پايدالانۋعا بەرىلگەننەن بەرى كۇردەلى جوندەۋ جۇرگىزىلمەگەن. جۇرگىزىلگەن جۇمىستار ستاتسيونارلىق مەديتسينالىق كومەك كورسەتۋ جاعدايلارىن جاقسارتۋعا، پاتسيەنتتەر مەن مەديتسينا قىزمەتكەرلەرى ءۇشىن قولايلى ورتا قالىپتاستىرۋعا، سونداي-اق مەكەمەنىڭ ماتەريالدىق-تەحنيكالىق بازاسىن نىعايتۋعا مۇمكىندىك بەرەدى. جاڭارتىلعان عيمارات 120 توسەك-ورىنعا ارنالعان.
- ءبىزدىڭ اۋرۋحانا - اۋدان تۇرعىندارىنا العاشقى مەديتسينالىق-سانيتاريالىق جانە مامانداندىرىلعان مەديتسينالىق كومەك كورسەتەتىن كوپبەيىندى مەديتسينالىق ۇيىم. مۇندا تەراپيالىق، حيرۋرگيالىق جانە تراۆماتولوگيالىق كومەك كورسەتىلەدى. اۋرۋحانا قۇرىلىمىنا پەرزەنتحانا، پەدياتريا، ينفەكتسيالىق جانە باسقا دا بولىمشەلەرمەن قاتار، دياگنوستيكا جانە رەانيماتسيا بولىمدەرى كىرەدى، - دەدى كەربۇلاق اۋداندىق اۋرۋحاناسىنىڭ ديرەكتورى جانەتا نۇرمانبەتوۆا.
اۋداندىق ورتالىق اۋرۋحانانى جاڭعىرتۋدىڭ باستى يگىلىكتەرىنىڭ ءبىرى – مۇندا مەديتسينالىق جابدىقتار جاڭارتىلدى.
مەكەمەدە كادر ماسەلەسىنە دە ەرەكشە كوڭىل بولىنگەن.
مۇندا 83 بىرلىك مەديتسينالىق تەحنيكا، سونداي-اق 601 دانا جيھاز بەن توسەك-ورىن جابدىقتارى ساتىپ الىندى. قازىرگى ۋاقىتتا اۋرۋحانادا كومپيۋتەرلىك توموگراف، رەنتگەن، مامموگراف جانە ۋلترادىبىستىق زەرتتەۋ (ۋزي) اپپاراتتارى تولىققاندى جۇمىس ىستەپ تۇر. وسىلايشا اۋدان تۇرعىندارىنا زاماناۋي دياگنوستيكالىق قىزمەت كورسەتىلەدى. بۇل - ءوڭىر حالقىنىڭ ءومىر ءسۇرۋ ساپاسىن ارتتىرۋعا باعىتتالعان جۇيەلى جۇمىستىڭ ناتيجەسى.
مەكەمەدە كادر ماسەلەسىنە دە ەرەكشە كوڭىل بولىنگەن. كادرلىق الەۋەتتى نىعايتۋ ماقساتىندا 2024 جىلدان بەرى اۋدانعا 14 دارىگەر جۇمىسقا كەلدى.
- مەن اۋداندىق اۋرۋحانادا جاس مامانمىن، ەندوكرينولوگ دارىگەر بولىپ جۇمىس ىستەيمىن. ماعان 10 ملن تەڭگە كولەمىندە بىرجولعى كوتەرمەاقى بەرىلدى، بۇل بىزگە - ۇلكەن قولداۋ. سونىمەن قاتار باسپانا ماسەلەسى دە شەشىلدى. مۇنداي مەملەكەتتىك قولداۋ اۋىلدىق جەرلەردى بىلىكتى مەديتسينا ماماندارىمەن قامتاماسىز ەتۋگە مۇمكىندىك بەرەدى دەپ ويلايمىن. ەندىگى مەنىڭ باستى مىندەتىم – وزىمە ارتىلعان سەنىمدى اقتاۋ. ءوز تاراپىمنان پاتسيەنتتەرگە ساپالى مەديتسينالىق كومەك كورسەتۋ ءۇشىن بار كۇشىمدى سالىپ كەلەمىن. وسى تۇرعىدان العاندا، اۋرۋحانانىڭ جاڭارتىلۋى دا جۇمىسىمىزعا ۇلكەن قولداۋ بولىپ وتىر، - دەدى ايدانا ماراتقىزى.
جاڭارتىلعان اۋرۋحانا تۋرالى جەرگىلىكتى تۇرعىندار پىكىر ءبىلدىردى. سولاردىڭ قاتارىندا سارىوزەك اۋىلىنىڭ تۇرعىنى جانات احمەتوۆا دا بار:
– مەنىڭ ءتورت قىزىمنىڭ تورتەۋى دە وسى اۋرۋحانادا دۇنيەگە كەلدى. ارينە، سوڭعى جىلدارى اۋرۋحانا عيماراتى ەسكىرىپ، توزعان بولاتىن، سوندىقتان كۇردەلى جوندەۋ جاساعانى جاقسى بولدى. اۋرۋحانامىز زاماناۋي كەيىپكە ەندى، جاڭا قۇرال-جابدىقتار اكەلىندى. اۋدانعا دارىگەرلەر، جاڭا ماماندار كەلىپ جاتقانىنا قۋانىشتىمىز. جالپى العاندا، مۇنىڭ ءبارى تۇرعىنداردىڭ دەنساۋلىعىن جاقسارتۋعا وڭ اسەر ەتەدى دەپ سەنەمىان، - دەدى ول.
بۇل پىكىرگە اۋىل تۇرعىنى سلامباي توقاباەۆ تا قوسىلدى:
- اۋرۋحانامىز اشىلعالى بەرى، ياعني وسىدان 40 جىلداي ۋاقىت بۇرىن سالىنعاننان بەرى كۇردەلى جوندەۋ جۇرگىزىلمەگەن. مىسالى، بۇرىن ستاتسيونارعا ەمدەلۋگە كەلگەندە ءىشى قاراڭعى، ءبارى ەسكى بولاتىن. ءتىپتى، كەيدە جازىلىپ شىعاتىنىڭا دەگەن سەنىم دە ازاياتىن. قازىر ءبارى وزگەردى: ءىشى جارىق ءارى جايلى. سونىمەن قاتار بارلىق قاجەتتى مەديتسينالىق جابدىقتار ورناتىلعان. بۇرىن كومپيۋتەرلىك توموگرافيادان (كت) ءوتۋ ءۇشىن تالدىقورعانعا بارۋعا تۋرا كەلەتىن. ەندى بۇل ماسەلە دە شەشىلدى. بۇعان قوسا، مەملەكەتتىك قولداۋدىڭ ارقاسىندا اۋدانىمىزعا بىلىكتى دارىگەرلەر كەلدى، – دەپ وي ءبولىستى اۋىل تۇرعىنى.
كەربۇلاق اۋداندىق ورتالىق اۋرۋحاناسىنىڭ جاڭارتىلىپ، قولدانىسقا بەرىلۋى اۋداننىڭ دەنساۋلىق ساقتاۋ سالاسىن دامىتۋداعى ماڭىزدى كەزەڭ دەۋگە بولادى. مەديتسينا ماماندارىنىڭ جۇمىسىنا جانە پاتسيەنتتەردىڭ ەم الۋىنا زاماناۋي جاعداي جاساۋ مەديتسينالىق قىزمەت ساپاسىن ارتتىرۋعا ءارى تۇرعىندارعا ۋاقىتىلى كومەك كورسەتۋگە باعىتتالعان.
ەسكە سالساق، بۇعان دەيىن اقسۋ اۋدانىنداعى ورتالىق اۋداندىق اۋرۋحانا دا كۇردەلى جوندەۋ مەن سەيسميكالىق كۇشەيتۋ جۇمىستارىنان كەيىن پايدالانۋعا بەرىلگەن بولاتىن.
