25 قازان – رەسپۋبليكا كۇنى قارساڭىندا ەلوردادا ە.راحماديەۆ اتىنداعى مەملەكەتتىك اكادەميالىق فيلارمونيا قابىرعاسىندا مادەنيەت جانە اقپارات مينيسترلىگىنىڭ قولداۋىمەن «AMANAT» پارتياسى ۇيىمداستىرعان ءداستۇرلى «التىن دومبىرا» رەسپۋبليكالىق اقىندار ايتىسى ءوتتى. ۇلى اقىن اباي قۇنانبايۇلىنىڭ 180 جىلدىعىنا ارنالعان «ادامزاتتىڭ ءبارىن ءسۇي!» تاقىرىبىنداعى ءدۇبىرلى دوداعا وسى جىلى رەسپۋبليكالىق جانە حالىقارالىق ايتىستاردا توپ جارعان 14 اقىن قاتىستى.
«AMANAT» پارتياسىنىڭ اتقارۋشى حاتشىسى داۋلەت كارىبەك رەسپۋبليكا كۇنى مەملەكەتتىگىمىزدىڭ جاڭا شەجىرەسى جازىلعان، تاريحىمىزدىڭ جاڭا پاراعى اشىلعان ەلىمىز ءۇشىن ەڭ قاستەرلى مەيرام ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ قازىر رۋحانيات پەن مادەنيەتكە ەرەكشە ءمان بەرىپ وتىر. وسى باعىتتا قانشاما جۇمىستار جاسالىپ تا جاتىر. پرەزيدەنتتىڭ ينتەللەكتۋالدى ۇلت قۇرۋ يدەياسى – بولاشاعىمىزدى ايقىندايتىن اسا ماڭىزدى باعىت. وسى ورايدا، «AMANAT» پارتياسى دا ادەبيەت پەن رۋحانياتقا، ۇلتتىق ونەرگە، سونىڭ ىشىندە وسى ايتىسقا جان-جاقتى قولداۋ كورسەتىپ كەلە جاتقانىن اتاپ وتكىم كەلەدى»، – دەدى «AMANAT» پارتياسىنىڭ اتقارۋشى حاتشىسى داۋلەت كارىبەك.
وسى ورايدا، مادەنيەت جانە اقپارات ۆيتسە-ءمينيسترى ايبەك سىدىقوۆ ۆەدومستۆو باسشىسى ايدا بالاەۆانىڭ قۇتتىقتاۋ حاتىن وقىپ بەردى.
«ايتىس – حالقىمىزدىڭ رۋحاني بولمىسىنىڭ ايناسى، عاسىرلاردان جەتكەن قاسيەتتى ونەر. ونى قاستەرلەۋ، جاڭا ءداۋىردىڭ تىنىسىمەن قايتا تۇلەتۋ جانە جاس ۇرپاقتىڭ ساناسىنا ءسىڭىرۋ – بارىمىزگە ورتاق مىندەت. مادەنيەت جانە اقپارات مينيسترلىگى جىل سايىن ۇلتتىق ونەردى دارىپتەيتىن، ءداستۇر ساباقتاستىعىن جالعايتىن وسىنداي ىرگەلى جوبالاردى جۇيەلى تۇردە جۇزەگە اسىرىپ كەلەدى. ەلىمىزدىڭ يگىلىكتەرى مەن جەتىستىكتەرى، حالىقتىڭ جارقىن بولاشاعى ۇلت مەرەيىن اسقاقتاتاتىن ۇلىق مەرەكەگە ارنالىپ وتىرعان بۇگىنگى ايتىستىڭ ارقاۋىنا اينالىپ، اقىندارىمىزدىڭ شابىتى شالقي بەرسىن. بابالار سالعان سارا جولدى جالعاپ، ەل رۋحىن اسقاقتاتىپ جۇرگەن جۇيرىكتەرگە شىعارماشىلىق تابىس، بارشاڭىزعا مول يگىلىك پەن باق-بەرەكە تىلەيمىن»، – دەلىنگەن ءمينيستردىڭ قۇتتىقتاۋ حاتىندا.
ءوز كەزەگىندە، ايتىس تىزگىنىن ۇستاعان ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى امانجول ءالتاي جىل باسىنان بەرى «AMANAT» پارتياسىنىڭ قولداۋىمەن ءتۇرلى دەڭگەيدەگى ايتىستار ۇيىمداستىرىلىپ كەلە جاتقانىن اتاپ ءوتتى.
«ايتىس – حالقىمىزدىڭ مادەني مايەگى، رۋحاني جادىگەرى. سوندىقتان جىل وتكەن سايىن ءتول ونەرىمىزدىڭ ماڭىزى ارتىپ، اياسى كەڭەيىپ كەلەدى. ماسەلەن، مامىردا يۋنەسكو-نىڭ پاريجدەگى باس شتاب-پاتەرىندە قازاق جانە قىرعىز اقىندارى توپقا تۇسكەن ايتىس وتكىزىلدى. «حابار» تەلەارناسىندا قازاقتىڭ وتكەنى مەن بۇگىنىن ۇشتاستىرعان «جەكپە-جەك ايتىس» كورەرمەن كوزايىمىنا اينالدى. قازاقستاننىڭ بارلىق ايماعىن قامتىعان كوماندالىق ايتىس شىلدەدە اقتاۋ قالاسىندا تۇيىندەلدى. ال بۇگىنگى «التىن دومبىرا» ايتىسى رەسپۋبليكا كۇنى قارساڭىندا ءتاۋ ەتەر تاۋەلسىزدىگىمىزدىڭ تۇعىرىن بەكەمدەپ، مەملەكەتىمىزدىڭ مەرەيىن ۇستەم ەتەدى دەگەن سەنىمدەمىن»، – دەدى ول.
قازىلار القاسىنىڭ توراعاسى – اقىن، قازاقستان ايتىس اقىندارى مەن جىرشى تەرمەشىلەردىڭ حالىقارالىق وداعىنىڭ توراعاسى ءجۇرسىن ەرمان. سونداي-اق اقىنداردىڭ ءسوز بارىمتاسىن سەنات دەپۋتاتى نۇرتورە ءجۇسىپ، ءماجىلىس دەپۋتاتى، «AMANAT» پارتياسى فراكتسياسىنىڭ مۇشەسى جاناربەك ءاشىمجانوۆ، قازاقستاننىڭ حالىق اقىنى، ايتىس ارداگەرى ءاسيا بەركەنوۆا، اقىن، مەملەكەتتىك سىيلىقتىڭ يەگەرى عالىم جايلىباي، اقىن، قازاقستاننىڭ ەڭبەك سىڭىرگەن قايراتكەرى مەلس قوسىمباەۆ، ايتىس ارداگەرى، مادەنيەت سالاسىنىڭ ۇزدىگى قۇدايبەرلى مىرزابەكوۆ باعالادى.
ناتيجەسىندە، قازىلار القاسىنىڭ شەشىمىمەن باس جۇلدەنى – ايبەك قاليەۆ (قوستاناي وبلىسى) يەلەندى. وعان «التىن دومبىرا» جانە پاتەر تابىستالدى. جۇلدەلى 1-ورىن جانە اۆتوكولىك – بەكسۇلتان ورىنباسارعا (قىزىلوردا وبلىسى) بۇيىردى. ال 2-ورىندى – سەرىك قۋانعان (شىعىس قازاقستان وبلىسى) جانە نۇربول جاۋىنباەۆ (اقتوبە وبلىسى) قانجىعالادى. ولاردىڭ ارقايسىسىنا 1,5 ملن تەڭگە سىياقى بەرىلدى. بۇل رەتتە، 3-ورىندى – مەيىربەك سۇلتانحان (قىزىلوردا وبلىسى) جانە ديدار قامي (قاراعاندى وبلىسى) ءوزارا ءبولىسىپ، 1 ملن تەڭگەدەن يەلەندى.
بۇعان قوسا، سەرىك قۋانعان «ايتىس اقتاڭگەرى» اتانىپ، شىعىس قازاقستان وبلىسى اكىمدىگى اۆتوكولىك مىنگىزدى. سونداي-اق اۆتوكولىكتى نۇربول جاۋىنباەۆ (اقتوبە وبلىسى) تاقىمدادى. ال قونىسباي ءابىلوۆ اتىنداعى ارنايى جۇلدە مەن 750 مىڭ تەڭگە – نۇرلان ەسەنقۇلوۆقا (شىمكەنت قالاسى), اسەلحان قالىبەكوۆا اتىنداعى ارنايى جۇلدە مەن 750 مىڭ تەڭگە – اسەم ەرەجەقىزىنا، ەرىك اسقاروۆ اتىنداعى جۇلدە مەن 750 مىڭ تەڭگە – داۋرەن اقساقالوۆقا (تۇركىستان وبلىسى), كوكەن شاكەەۆ اتىنداعى ارنايى جۇلدە مەن 750 مىڭ تەڭگە، پاتەر جانە اۆتوكولىك – سارا توقتامىسقا (استانا قالاسى), ۇسىنىلدى.
ىنتالاندىرۋ سىيلىعى اسپانبەك شۇعاتايعا (پاۆلودار وبلىسى), جارقىن جۇپارحانعا (سولتۇستىك قازاقستان وبلىسى), رۇستەم قايىرتايعا (اباي وبلىسى) جانە اباي جولماعانبەتكە (ماڭعىستاۋ وبلىسى) تابىستالدى. ءار اقىنعا 500 مىڭ تەڭگە بەرىلدى.
ايتا كەتەيىك، ەكى كۇنگە سوزىلعان الامان ايتىسقا «QAZAQSTAN» ۇلتتىق تەلەارناسى اقپاراتتىق قولداۋ كورسەتتى.
