بۇگىن، 19 قازاندا رەيحستاگقا تۋ تىگىپ، سوعىستىڭ سوڭعى نۇكتەسىن قويعان باتىر، «حالىق قاھارمانى» راقىمجان قوشقارباەۆتىڭ تۋعان كۇنى، دەپ حابارلايدى «ادىرنا» ءتىلشىسى.
ول 1924 جىلى قازىرگى اقمولا وبلىسىنىڭ تسەلينوگراد اۋدانىندا دۇنيەگە كەلگەن. 1942 جىلى اسكەر قاتارىنا شاقىرىلىپ، 1944 جىلى فرۋنزە قالاسىنداعى (قازىرگى بىشكەك) جاياۋ اسكەر ۋچيليششەسىن تامامداعان. سول جىلدىڭ قازان ايىنان باستاپ 1-بەلارۋس مايدانى قۇرامىنداعى يدريتسك اتقىشتار ديۆيزياسىنىڭ 150-اتقىشتار پولكىندە ۆزۆود كومانديرى بولىپ، پولشا مەن گەرمانيا اۋماعىنداعى شايقاستارعا قاتىسقان.
راقىمجان قوشقارباەۆ بەرلين وپەراتسياسى كەزىندە ەرەكشە ەرلىك تانىتتى. 1945 جىلعى 30 ساۋىردە ول جاۋىنگەر گريگوري بۋلاتوۆپەن بىرگە رەيحستاگقا العاشقىلاردىڭ ءبىرى بولىپ جەڭىس تۋىن تىكتى. سوعىستان كەيىن ەلبا وزەنى بويىندا ورنالاسقان كەڭەستىك وككۋپاتسيالىق اسكەر بولىمدەرىندە قىزمەت ەتتى. 1947–1967 جىلدارى اقمولا وبلىستىق اتقارۋ كوميتەتىندە نۇسقاۋشى، كەيىن قازاق كسر مينيسترلەر كەڭەسى جانىنداعى قونىس اۋدارۋشىلار جونىندەگى باس باسقارمادا ينسپەكتور بولدى. ال 1967 جىلدان باستاپ «الماتى» قوناق ءۇيىنىڭ ديرەكتورى قىزمەتىن اتقاردى.
ەرلىگى مەن ەڭبەگى ءۇشىن راقىمجان قوشقارباەۆ «قىزىل تۋ»، I دارەجەلى «وتان سوعىسى» وردەندەرىمەن، سونداي-اق «بەرليندى العانى ءۇشىن» جانە «ۆارشاۆانى ازات ەتكەنى ءۇشىن» مەدالدارىمەن ماراپاتتالعان.
رەيحستاگقا جەڭىس تۋىن تىككەنى ءۇشىن «جاۋىنگەرلىك قىزىل تۋ» وردەنىنە يە بولدى. 2001 جىلى وعان قايتىس بولعاننان كەيىن «حالىق قاھارمانى» اتاعى بەرىلدى.
