وزبەكستان پرەزيدەنتى شاۆكات ميرزيوەۆ 9 مامىرعا وراي حالىقتى قۇتتىقتاپ، بۇل كۇندى «ەكىنشى دۇنيەجۇزىلىك سوعىستاعى جەڭىستىڭ» 81 جىلدىعى رەتىندە اتادى، دەپ حابارلايدى ادىرنا ۇلتتىق پورتالى fergana.news-كە سىلتەپ.
قۇتتىقتاۋ ءماتىنى 8 مامىر كەشكە پرەزيدەنتتىڭ رەسمي سايتىندا جاريالاندى. وندا مەملەكەت باسشىسى بۇل كۇندى «ەسكە الۋ جانە قۇرمەت كۇنى» جانە «ۇلى جەڭىس» مەرەكەسى رەتىندە قاتار اتاپ وتكەن.
سوزىندە ول ءفاشيزمدى جەڭۋدەگى وزبەكستان حالقىنىڭ ۇلەسىنە توقتالدى. رەسمي دەرەكتەرگە سايكەس، سوعىس جىلدارى رەسپۋبليكادان شامامەن ەكى ميلليون ادام مايدانعا اتتانعان. ولاردىڭ 500 مىڭنان استامى قازا تاۋىپ، 158 مىڭنان استامى حابار-وشارسىز كەتكەن. سونداي-اق 301 وزبەك جاۋىنگەرى كەڭەس وداعىنىڭ باتىرى اتاعىن العان.
پرەزيدەنت سوعىس كەزىندە وزبەكستانعا 1,5 ميلليوننان استام ەۆاكۋاتسيالانعان ازامات، سونىڭ ىشىندە 250 مىڭ جەتىم بالا قابىلدانعانىن دا ەسكە سالدى.
ميرزيوەۆ قازىرگى الەمدەگى تۇراقسىز جاعدايدى اتاپ ءوتىپ، بەيبىتشىلىك پەن تۇراقتىلىقتى ساقتاۋ ماڭىزدى ەكەنىن ايتتى. سونىمەن قاتار ەلدىڭ قورعانىس قابىلەتىن كۇشەيتۋ ستراتەگيالىق مىندەتتەردىڭ ءبىرى رەتىندە كورسەتىلدى.
ايتا كەتەرلىگى، قۇتتىقتاۋ ماتىنىندە رەسەي دە، كەڭەس وداعى دا تىكەلەي اتالماعان. تاريحي وقيعا نەگىزىنەن «فاشيزمگە قارسى جالپىادامزاتتىق كۇرەس» رەتىندە سيپاتتالعان.
سونداي-اق نازار اۋداراتىن جايت — ماتىندە «ەكىنشى دۇنيەجۇزىلىك سوعىس» فورمۋلاسى قولدانىلعان. بۇل ۇعىم 9 مامىردى «ۇلى وتان سوعىسىنداعى جەڭىس كۇنى» دەپ اتايتىن پوستكەڭەستىك كەڭىستىكتەگى ءداستۇرلى اتاۋمەن سالىستىرعاندا وزگەشە كوزقاراس رەتىندە باعالانۋدا.
