21 قاڭتاردا بۇۇ-نىڭ ورتالىق ازياداعى جاھاندىق شارت جەلىسىنىڭ ديرەكتورلار كەڭەسىنىڭ العاشقى وتىرىسى ءوتتى. وتىرىس الماتى قالاسىندا ءوتىپ، وعان وتكەن جىلدىڭ تامىز ايىندا وسى لاۋازىمعا سايلانعان ديرەكتورلار كەڭەسىنىڭ توراعاسى ءۇمىت شاياحمەتوۆا توراعالىق ەتتى.
بۇۇ-نىڭ ورتالىق ازياداعى جاھاندىق شارت جەلىسى قازاقستان، وزبەكستان، قىرعىزستان، تاجىكستان جانە تۇرىكمەنستان ەلدەرىنەن بيزنەس وكىلدەرىن بىرىكتىرەدى. جەلىنىڭ نەگىزگى ماقساتى — جاۋاپتى بيزنەس جۇرگىزۋ قاعيداتتارىن ىلگەرىلەتۋ جانە ورنىقتى دامۋ ماقساتتارىن ىسكە اسىرۋعا ارنالعان وڭىرلىك پلاتفورما رەتىندە قىزمەت ەتۋ.
وتىرىس بارىسىندا جەلىنىڭ سوڭعى ءۇش جىلداعى قىزمەتىنىڭ ناتيجەلەرى تانىستىرىلدى. اتاپ ايتقاندا، 2023–2025 جىلدار ارالىعىندا بۇۇ-نىڭ ورتالىق ازياداعى جاھاندىق شارت جەلىسىنە قاتىسۋشى ۇيىمداردىڭ سانى 36-دان 146-عا دەيىن ارتتى. كۇن تارتىبىندەگى باستى ماسەلە 2026–2030 جىلدارعا ارنالعان جەلى جۇمىسىنىڭ ستراتەگياسىن تالقىلاۋ بولدى.
ۇسىنىلعان ستراتەگيا كومپانيالار، ساراپشىلار قاۋىمداستىعى جانە حالىقارالىق سەرىكتەستەر اراسىنداعى ىنتىماقتاستىقتىڭ ارىپتەستىك فورماتتارىن دامىتۋدى، بىرلەسكەن باستامالاردى ىسكە اسىرۋدى، ورنىقتى دامۋدىڭ ۇزدىك تاجىريبەلەرىن ىلگەرىلەتۋدى، سونداي-اق وڭىردەگى كومپانيالاردىڭ باسەكەگە قابىلەتتىلىگىن ارتتىرۋ ءۇشىن ورنىقتى بيزنەس-شەشىمدەردى قالىپتاستىرۋدا تالدامالىق جانە زەرتتەۋ قۇرالدارىن پايدالانۋدى كوزدەيدى.
ء«بىزدىڭ ميسسيامىزدىڭ وزەگىندە — ورنىقتى دامۋ قاعيداتتارىن ۇستاناتىن مىقتى ءوڭىر قالىپتاستىرۋ ماقساتىندا ورتالىق ازيا ەلدەرىنىڭ كۇش-جىگەرىن بىرىكتىرۋ تۇر. بۇۇ-نىڭ جاھاندىق كۇن ءتارتىبى اياسىندا ورتالىق ازيا مەملەكەتتەرى مەن ۇكىمەتتەرىنىڭ ەڭ جوعارى دەڭگەيىندە قولداۋ تاۋىپ وتىرعان وڭىرلىك ىقپالداستىقتىڭ كۇشەيىپ كەلە جاتقانىن ايقىن كورىپ وتىرمىز. بۇۇ-نىڭ جاھاندىق شارتى جەلىسىنىڭ قىزمەتى بۇكىل ءوڭىردىڭ دامۋىنا جۇيەلى ءارى ۇزاق مەرزىمدى اسەر ەتەدى دەپ سەنەمىن. تابىستىڭ نەگىزگى شارتى — بيزنەستى، جەكە سەكتوردى جانە قوعامداستىقتاردى بىرىڭعاي ESG جانە SDG كۇن تارتىبىنە، ونى كورپوراتيۆتىك باسقارۋ مەن ادامي كاپيتالدى باسقارۋ تاجىريبەسىنە ينتەگراتسيالاۋ ارقىلى بەلسەندى تارتۋ»، — دەپ اتاپ ءوتتى ءۇمىت شاياحمەتوۆا.
ءوز كەزەگىندە بۇۇ-نىڭ ورتالىق ازياداعى جاھاندىق شارت جەلىسىنىڭ اتقارۋشى ديرەكتورى دينارا سەيدجاپاروۆا:
«قازىرگى جاھاندىق سىن-قاتەرلەر — كليماتتىڭ وزگەرۋى، گەندەرلىك تەڭسىزدىك جانە گەوساياسي بەلگىسىزدىك — ءوزارا تىعىز بايلانىستى. وسىنداي جاعدايدا بۇۇ-نىڭ جاھاندىق شارتى بىرىككەن ۇلتتار ۇيىمى مەن جەكە سەكتور اراسىنداعى تۇراقتى ديالوگتى قامتاماسىز ەتەتىن بىرەگەي حالىقارالىق پلاتفورما بولىپ قالا بەرەدى. ءبىزدىڭ مىندەتىمىز — ورتالىق ازيا بيزنەسىن بىرىكتىرۋ جانە ءوڭىردىڭ ورنىقتى دامۋىن قامتاماسىز ەتە وتىرىپ، حالىقارالىق ستاندارتتاردى ەنگىزۋگە جاردەمدەسۋ»، — دەپ اتاپ ءوتتى.
قورىتىندىلاي كەلە، وتىرىسقا قاتىسۋشىلار تالقىلانعان كۇن ءتارتىبىنىڭ وزەكتىلىگىن اتاپ ءوتىپ، الداعى جىلدارعا ارنالعان ديرەكتورلار كەڭەسى مەن جەلى قىزمەتىنىڭ باسىم باعىتتارى بويىنشا كەلىسىمگە كەلدى.
بۇۇ-نىڭ ورتالىق ازياداعى جاھاندىق شارت جەلىسى ديرەكتورلار كەڭەسىنىڭ كەلەسى وتىرىسى 2026 جىلدىڭ قازان ايىندا تاشكەنت قالاسىندا وتەدى.
