قازاقستان ورتالىق ازيا ەلدەرى اراسىندا جان باسىنا شاققانداعى سۋ تۇتىنۋ دەڭگەيى ەڭ تومەن ەل رەتىندە كورسەتىلدى. ال وڭىردە ەڭ جوعارى سۋ تۇتىنۋ كورسەتكىشى تۇركىمەنستاندا تىركەلگەن.
World Population Review اناليتيكالىق سەرۆيسىنىڭ دەرەكتەرىنە سايكەس، قازاقستاندا ورتاشا سۋ تۇتىنۋ كولەمى ءبىر ادامعا شاققاندا تاۋلىگىنە شامامەن 3 397 ءليتردى قۇرايدى.
سالىستىرمالى تۇردە العاندا، قىرعىزستاندا بۇل كورسەتكىش 4 153 ليتر، تاجىكستاندا — 4 460 ليتر، ال وزبەكستاندا ءبىر ادامعا تاۋلىگىنە 4 778 ءليتردى قۇرايدى.
وڭىردەگى ەڭ جوعارى سۋ تۇتىنۋ تۇركىمەنستاندا تىركەلگەن — ءبىر ادامعا تاۋلىگىنە 15 445 ليترگە دەيىن جەتەدى. سەرۆيس مالىمەتىنە سايكەس، بۇل ەل جان باسىنا شاققانداعى سۋ تۇتىنۋ بويىنشا الەمدە دە ءبىرىنشى ورىندا تۇر.
ساراپشىلاردىڭ پىكىرىنشە، ورتالىق ازيا ەلدەرىندەگى جوعارى سۋ تۇتىنۋ بىرنەشە فاكتورعا بايلانىستى. نەگىزگى سەبەپتەردىڭ ءبىرى — سۋارمالى سۋدىڭ كوپ مولشەرىن قاجەت ەتەتىن اۋىل شارۋاشىلىعىنىڭ دامۋى. اسىرەسە ماقتا، كۇرىش سياقتى ىلعالسۇيگىش داقىلداردى ءوسىرۋ سۋ شىعىنىن ارتتىرادى. وڭىردە سۋدىڭ ەداۋىر بولىگى يرريگاتسيالىق جۇيەلەرگە جۇمسالادى.
سونىمەن قاتار، ىستىق ءارى قۇرعاق كليمات تا سۋ تۇتىنۋدىڭ ارتۋىنا اسەر ەتەدى. جاز مەزگىلىندە حالىقتىڭ دا، اۋىل شارۋاشىلىعىنىڭ دا سۋعا سۇرانىسى كوبەيەدى. كەيبىر ەلدەردە ەسكىرگەن ينفراقۇرىلىم مەن توزعان كانالدار سالدارىنان سۋ تاسىمالداۋ كەزىندە ەداۋىر شىعىندار دا بولادى.
مامانداردىڭ ايتۋىنشا، بۇل ستاتيستيكا تەك تۇرمىستىق سۋدى عانا ەمەس، ونەركاسىپ، ەنەرگەتيكا جانە اۋىل شارۋاشىلىعىندا پايدالانىلاتىن سۋدى دا قامتيدى. سوندىقتان جان باسىنا شاققانداعى كورسەتكىش كۇندەلىكتى تۇرمىستا قولدانىلاتىن سۋدان الدەقايدا جوعارى بولۋى مۇمكىن.
ەۋروپا ەلدەرىندە سۋ تۇتىنۋ دەڭگەيى ورتالىق ازيامەن سالىستىرعاندا ەداۋىر تومەن. ماسەلەن، گەرمانيادا ءبىر ادامعا تاۋلىگىنە شامامەن 856 ليتر سۋ جۇمسالادى، فرانتسيادا — 1 236 ليتر، اۆستريادا — 1 144 ليتر، ال فينليانديادا شامامەن 3 414 ليتر. سالىستىرمالى تۇردە قازاقستاندا بۇل كورسەتكىش 3 397 ءليتردى قۇرايدى.
بۇعان دەيىن تاشكەنتتە وتكەن كەلىسسوزدەردەن كەيىن قازاقستان، قىرعىزستان جانە وزبەكستان ۇشجاقتى حاتتاماعا قول قويىپ، قىرعىزستانداعى توقتوعۇل سۋ قويماسىنان كەلەسى ەكى ايعا سۋ جىبەرۋ كولەمى مەن رەجيمىن بەكىتكەن بولاتىن. بۇل فەرمەرلەردىڭ سۋارۋ ماۋسىمىن كەدەرگىسىز وتكىزۋىنە مۇمكىندىك بەرۋ ماقساتىندا جاسالعان.
