قازاقستاندا مايمىل شەشەگىنىڭ ەل اۋماعىنا اكەلىنۋ ىقتيمالدىعى جوققا شىعارىلمايدى. الايدا ينفەكتسيانىڭ بەرىلۋ ەرەكشەلىكتەرىن ەسكەرە وتىرىپ، حالىق اراسىندا اۋرۋدىڭ كەڭىنەن تارالۋ قاۋپى تومەن دەپ باعالانىپ وتىر. بۇل تۋرالى 19 قازاندا دەنساۋلىق ساقتاۋ مينيسترلىگى مالىمدەدى، دەپ حابارلايدى «ادىرنا» ءتىلشىسى.
دسم مالىمەتىنشە، الەمدەگى ينفەكتسيالىق اۋرۋلاردىڭ، سونىڭ ىشىندە مايمىل شەشەگىنىڭ ەپيدەميولوگيالىق جاعدايىنا تۇراقتى مونيتورينگ جۇرگىزىلەدى.
اۋرۋدىڭ ەلگە اكەلىنۋى مەن تارالۋىنىڭ الدىن الۋ ءۇشىن سانيتاريالىق-پروفيلاكتيكالىق جانە ەپيدەمياعا قارسى ءىس-شارالار كەشەنى قولعا الىنعان. اتاپ ايتقاندا، مەملەكەتتىك شەكاراداعى وتكىزۋ پۋنكتتەرىندە سانيتاريالىق-كارانتيندىك باقىلاۋ كۇشەيتىلگەن. سونىمەن قاتار اۋرۋ تىركەلگەن ەلدەردەگى ەپيدەميولوگيالىق جاعداي جانە سول مەملەكەتتەردەن كەلگەن ازاماتتار باقىلاۋدا. وتكىزۋ پۋنكتتەرى مەن سانيتاريالىق-كارانتيندىك بەكەتتەر دەنە تەمپەراتۋراسىن جاناسپاي ولشەيتىن قۇرالدارمەن جابدىقتالعان.
بۇعان دەيىن سانكت-پەتەربۋرگتە مايمىل شەشەگىنە كۇدىكپەن بەس ادامنىڭ اۋرۋحاناعا جاتقىزىلعانى حابارلانعان بولاتىن. قازىرگى ۋاقىتتا ناۋقاستار دارىگەرلەردىڭ باقىلاۋىندا.
ماسكەۋ وبلىسىندا دا پاتەرلەردىڭ بىرىنەن مايمىل شەشەگىنە كۇدىكپەن بەس ادام اۋرۋحاناعا جەتكىزىلگەن. جەدەل جاردەم شاقىرۋعا مايمىل شەشەگىن جۇقتىرعان بولۋى مۇمكىن اداممەن بايلانىستا بولۋ سەبەپ بولعان.
سونداي-اق گونكونگتا مايمىل شەشەگىن جۇقتىرۋدىڭ تاعى ءبىر جاعدايى تىركەلگەن. قالادا اۋرۋ جۇقتىرعاندار سانى ايتارلىقتاي وسكەن. تامىز ايىنان بەرى 21 جاعداي انىقتالعان. بۇل — جىل باسىنان بەرى تىركەلگەن بارلىق جاعدايدىڭ 70 پايىزى.
مايمىل شەشەگى — MPXV ۆيرۋسى قوزدىراتىن ينفەكتسيالىق اۋرۋ. ول نەگىزىنەن جۇقتىرعان اداممەن تىعىز فيزيكالىق بايلانىس كەزىندە، سونىڭ ىشىندە تەرىدەگى بورتپەلەرمەن جانە بيولوگيالىق سۇيىقتىقتارمەن جاناسۋ ارقىلى بەرىلەدى. سونداي-اق ۆيرۋس لاستانعان كيىم، توسەك-ورىن جابدىقتارى مەن باسقا دا زاتتار ارقىلى، سونداي-اق ينفەكتسيا جۇقتىرعان جانۋارلارمەن بايلانىس كەزىندە جۇعۋى مۇمكىن.
دەنساۋلىق ساقتاۋ مينيسترلىگى تۇرعىندارعا سەبەبى بەلگىسىز تەرى بورتپەلەرى نەمەسە باسقا دا ينفەكتسيالىق اۋرۋ بەلگىلەرى بار ادامدارمەن تىعىز فيزيكالىق بايلانىستان اۋلاق بولۋدى ۇسىنادى. سونداي-اق جەكە باس گيگيەناسىن ساقتاپ، اۋرۋعا كۇدىك تۋدىراتىن ادامداردىڭ كيىمدەرىن، جەكە زاتتارى مەن توسەك-ورىن جابدىقتارىن ورتاق پايدالانباۋ قاجەت.
