وزبەكستان تاراپى رەسەيگە ءوز ازاماتتارىنا قاتىستى نوتا جولدادى، دەپ حابارلايدى "ادىرنا" ۇلتتىق پورتالى.
باق بەتتەرىندە رەسەيدە بىرنەشە وزبەكستاندىقتى ۇرىپ-سوعۋ جانە قورلاۋ فاكتىسىنە بايلانىستى اقپارات تاراعان ەدى. وزبەكستاننىڭ ۆلاديۆوستوكتاعى باس كونسۋلدىعى بيلىككە ارنايى نوتا جولدادى.
وزبەكستان ازاماتتارىنا جاسالعان شابۋىل 10 قىركۇيەككە قاراعان ءتۇنى بولعان. رەسەيدىڭ تەرگەۋ كوميتەتىنىڭ پريمورسكي ولكەسى بويىنشا باسقارماسىنىڭ دەرەگىنشە، بۇل ارەكەتتى الكوگولدىك ماس كۇيىندە بولعان جاسوسپىرىمدەر توبى جاساعان. ولار تۇراقتا تۇرعان كولىكتى ءبۇلدىرىپ، ىشىنە گاز باللونىن شاشىپ جىبەرگەننەن كەيىن جۇك كولىگىنىڭ جۇرگىزۋشىسىنە شابۋىل جاساعان. بۇدان سوڭ جاسوسپىرىمدەر حاباروۆسكايا كوشەسىندەگى تاۋلىك بويى جۇمىس ىستەيتىن دۇكەنگە كىرىپ، كەلۋشىلەر مەن ساتۋشىنىڭ كوزىنشە ەر ادامدى ۇرىپ-سوققان. كەيىن ولار تاكسيست پەن جولاۋشىعا شابۋىل جاساعان. كوشەدە جاسوسپىرىمدەر قاتتى ايعايلاپ، ءوتىپ بارا جاتقان ادامعا قارسى تاس جانە باسقا دا زاتتاردى قولدانىپ، قوعامدىق ءتارتىپتى بۇزعان.
قازىرگى تاڭدا بارلىق قاتىسۋشىلاردىڭ تۇلعالارى انىقتالعان. ەلدىڭ ەكولوگيا ءمينيسترىنىڭ كەڭەسشىسى راسۋل كوشەرباەۆ جاريالاعان بەينەجازبالاردان جاپا شەككەندەردىڭ ميگرانتتار ەكەنى كورىنەدى. كوشەرباەۆتىڭ ايتۋىنشا، ولار بۇحارا وبلىسىنىڭ تۋمالارى.
«بۇل وقيعاعا بايلانىستى ۆلاديۆوستوكتاعى وزبەكستان كونسۋلدىعىنا جۇگىنگەن وتانداستارىمىز كونسۋلدىق قىزمەتكەرلەرى ەشقانداي كومەك كورسەتپەي، تەك رەسەيلىك قۇقىق قورعاۋ ورگاندارىنا بارۋعا كەڭەس بەرگەنىن ايتتى. ولاردىڭ سوزىنشە، ميگرانتتار ءۇشىن رەسەيدىڭ قۇقىق قورعاۋ ورگاندارىنا جۇگىنۋ پايداسىز ءارى قورقىنىشتى»، – دەپ جازدى ول.
سونداي-اق كوشەرباەۆ ءسىم-ءدى بۇل وقيعاعا نازار اۋدارۋعا شاقىردى.
ايتا كەتەيىك، بۇعان دەيىن دە ماسكەۋ وبلىسى حيمكي قالاسىندا رەسەي تۇرعىنىنىڭ وزبەكستان ازاماتىن قورلاعانى ايتىلعان ەدى. ناتيجەسىندە وزبەكستاننىڭ سىرتقى ىستەر مينيسترلىگى رەسەيگە نوتا جولداعان.
