اقش پرەزيدەنتى دونالد ترامپ ۋكرايناداعى قاقتىعىستى رەتتەۋ ماسەلەسىنە قاتىستى پىكىر ءبىلدىرىپ، ۆلاديمير زەلەنسكيدى سوعىستى اياقتاۋعا نيەت تانىتپاي وتىر دەپ ايىپتادى، دەپ حابارلايدى «ادىرنا» ءتىلشىسى.
اق ءۇي باسشىسى قازىرگى جاعدايعا قاتىستى پىكىرىن Truth Social الەۋمەتتىك جەلىسىندەگى پاراقشاسىندا جاريالادى.
«رەسەيگە قاتىستى ۇستانىمىم وتە قاراپايىم. مەن رەسەي مەن ۋكراينا اراسىنداعى سوعىستى توقتاتۋ ءۇشىن كەلىسسوزدەر جۇرگىزىپ جاتىرمىن جانە رەسەيدى كەلىسسوز ۇستەلىنەن ويلانباي الىستاتاتىن ەشقانداي ارەكەت جاساعىم كەلمەيدى. ءبىز ايتارلىقتاي ىلگەرىلەۋگە قول جەتكىزىپ جاتىرمىز» – دەپ جازدى ترامپ.
سونداي-اق ول كيەۆتىڭ رەسەيدەگى مۇناي وڭدەۋ زاۋىتتارىنا سوققى بەرۋىن سىنعا الدى. ترامپتىڭ پىكىرىنشە، مۇنداي شابۋىلدار الەمدىك نارىققا كەرى اسەر ەتىپ وتىر.
«زەلەنسكي رەسەيدەگى مۇناي وڭدەۋ زاۋىتتارىنا سوققى بەرىپ جاتىر. ول بۇل شابۋىلداردىڭ الەمدىك ديزەل وتىنى نارىعىنا، سونىڭ ىشىندە اقش-قا دا ايتارلىقتاي زيان كەلتىرەتىنىن بىلەدى. سونىڭ سالدارىنان فەرمەرلەر، مال شارۋاشىلىعىمەن اينالىساتىندار جانە ءتۇرلى سالاداعى كاسىپورىندار وراسان زور شىعىنعا ۇشىراپ وتىر. سوعان قاراماستان، رەسەي الەمدىك نارىققا ديزەل وتىنىن ميلليونداعان باررەل كولەمىندە تومەن باعامەن جەتكىزۋدى جالعاستىرۋدا»، – دەدى اقش پرەزيدەنتى.
بۇدان بولەك، ترامپ زەلەنسكيدىڭ ۋكرايناداعى سوعىستى اياقتاعىسى كەلمەيتىنىن مالىمدەدى.
«زەلەنسكيگە ءبارىبىر. شىنىن ايتقاندا، ەۋروپانىڭ وعان ءبولىپ جاتقان قىرۋار قارجىسىنا جانە بۇعان دەيىن جەمقور دجو بايدەن بەرگەن قاراجاتقا قاراماستان، ول بۇل سوعىستى اياقتاعىسى كەلمەيدى جانە، بالكىم، ەشقاشان دا ونى توقتاتۋدى قالاماعان. ەكى جىل بۇرىن ول قازىرگى ءۇمىت ارتا الاتىن كەلىسىمنەن الدەقايدا ءتيىمدى كەلىسىمگە قول جەتكىزە الار ەدى. ونىڭ ەلى قيراپ جاتىر، اۋماعىنىڭ ەداۋىر بولىگىنەن ايىرىلدى، مۇحيتتار مەن تەڭىزدەرگە شىعۋ مۇمكىندىگىن جوعالتتى، ال ەر ازاماتتارىنىڭ سانى ازايدى»، – دەپ جازدى ترامپ.
جازباسىنىڭ سوڭىندا اق ءۇي باسشىسى سوعىستىڭ اياقتالعانىن قالايتىنىن اتاپ ءوتتى.
ەسكە سالايىق، بۇعان دەيىن دونالد ترامپ ۆلاديمير زەلەنسكيدى قاتاڭ سىنعا الىپ، ۋكرايناعا كەلىسىم جاساي الاتىن جاڭا باسشى قاجەت ەكەنىن مالىمدەگەن ەدى. بىرنەشە كۇننەن كەيىن اقش پرەزيدەنتى ۋكراينا باسشىسىن تاعى دا سىنعا العان. ترامپتىڭ ايتۋىنشا، زەلەنسكي كەلىسىمگە كەلۋگە نيەتتى ەمەس.
جاقىندا امەريكالىق كاسىپكەر يلون ماسك تا زەلەنسكي ۋكراينا پرەزيدەنتى قىزمەتىنەن كەتۋى كەرەك دەگەن پىكىر بىلدىرگەن.
ال ۋكراينا پرەزيدەنتى ۆلاديمير زەلەنسكي Bloomberg اگەنتتىگىنە بەرگەن سۇحباتىندا ترامپتىڭ ساياساتى كيەۆتى كاپيتۋلياتسياعا، ياعني تىزە بۇگۋگە يتەرمەلەپ وتىرعانىن ايتقان.
