اقش پرەزيدەنتى دونالد ترامپ شەتەلدىك جانە عارىشتىق ومىرگە قاتىستى قۇجاتتاردى جاريالاۋعا ۋادە بەردى. ول Truth Social الەۋمەتتىك جەلىسىندە جازعانداي، وسى تاقىرىپقا قاتىستى ۇكىمەتتىك قۇجاتتاردى جاريالاۋ پروتسەسىن باستاۋعا تاپسىرما بەرگەنىن ايتتى، دەپ حابارلايدى "ادىرنا".
«بۇل ماسەلەگە ۇلكەن قىزىعۋشىلىق تۋىنداعانىنا بايلانىستى مەن سوعىس مينيسترلىگىنە جانە ءتيىستى باسقا ۆەدومستۆو مەن اگەنتتىكتەرگە شەتەلدىك جانە عارىشتىق ومىرگە، بەلگىسىز اۋا قۇبىلىستارىنا، بەلگىسىز ۇشاتىن وبەكتىلەرگە قاتىستى، سونداي-اق وسى وتە كۇردەلى ءارى قىزىقتى جانە ماڭىزدى ماسەلەلەرگە قاتىستى كەز كەلگەن اقپاراتتى انىقتاۋ جانە جاريالاۋ پروتسەسىن باستاۋعا نۇسقاۋ بەرەمىن»، – دەپ جازدى ترامپ بۇگىن تاڭەرتەڭ.
ەسكە سالا كەتەيىك، وسىدان از ۋاقىت بۇرىن اقش-تىڭ بۇرىنعى پرەزيدەنتى باراك وباما عارىشتىق ءومىردىڭ بار ەكەنىن ايتقان. امەريكالىق بلوگەر برايان تايلەر كوەنگە بەرگەن سۇحباتىندا وباما ولاردىڭ بار ەكەنىن راستاعانىمەن، ءوزى ولاردى كورمەگەنىن اتاپ وتكەن.
سول ۋاقىتتا 2025 جىلى اشىلعان 3I/ATLAS جۇلدىزارالىق كومەتاسى استرونومداردى تاڭ قالدىرعان ەدى. NASA SPHEREx ميسسياسىنىڭ مالىمەتى بويىنشا، كۇنگە جاقىنداعاننان كەيىن وبەكت كۇتپەگەن جەردەن ايتارلىقتاي جارقىراعان جانە ءوز يادروسىندا جاسىرىن ورگانيكالىق مولەكۋلالار مەن باسقا زاتتاردى بەلسەندى تۇردە عارىشقا شىعارا باستاعان.
