فوتو: Varlamov news/Telegram
18 قازان، جەكسەنبىگە قاراعان ءتۇنى رەسەيدىڭ سانكت-پەتەربۋرگ پەن لەنينگراد وبلىسىنا ۇشقىشسىز ۇشۋ اپپاراتتارىمەن (دروندارمەن) جاپپاي شابۋىل جاسالدى. جەرگىلىكتى بيلىكتىڭ مالىمەتىنشە، شابۋىل سالدارىنان سانكت-پەتەربۋرگ مۇناي تەرمينالىنىڭ اۋماعىندا ءورت شىققان. سونداي-اق VK كومپانياسىنىڭ دەرەكتەر ورتالىعىنا شابۋىل جاسالىپ، درونداردىڭ سىنىقتارى كوپقاباتتى جانە جەكە تۇرعىن ۇيلەرگە قۇلاعان. بۇل تۋرالى DW جازدى، دەپ حابارلايدى “ادىرنا”.
سانكت-پەتەربۋرگ گۋبەرناتورى الەكساندر بەگلوۆ تاڭەرتەڭ نەۆسكي، كراسنوسەلسكي، كراسنوگۆاردەيسكي جانە ماسكەۋ اۋداندارىنداعى ازاماتتىق ينفراقۇرىلىم نىساندارىندا، سونداي-اق مۇناي تەرمينالى اۋماعىندا ءورت ءسوندىرۋ جۇمىستارى جۇرگىزىلىپ جاتقانىن مالىمدەدى.
«قاۋىپسىزدىك ماقساتىندا پۋلكوۆو اۋەجايىنىڭ جۇمىسى شەكتەلدى. قازا تاپقاندار جوق. ءموبيلدى ينتەرنەت جۇمىسىندا ۇزىلىستەر بولۋى مۇمكىن»، — دەپ جازدى ول Telegram-ارناسىندا.
لەنينگراد وبلىسىنىڭ گۋبەرناتورى الەكساندر دروزدەنكو ايماق اۋماعىندا 126 دروننىڭ اتىپ تۇسىرىلگەنىن حابارلادى. ونىڭ ايتۋىنشا، ۆسەۆولوجسك قالاسىنداعى كوپقاباتتى تۇرعىن ۇيگە، كيروۆسك ماڭىنداعى جەكە ۇيگە جانە نيزينو اۋىلىنداعى ءتورت اۆتوكولىككە درون سىنىقتارى قۇلاعان.
«ەلەكتر بەرۋ جەلىلەرىنە سىنىقتاردىڭ قۇلاۋىنا بايلانىستى ەلەكتر قۋاتى قىسقا مەرزىمگە ءۇزىلىپ جاتىر»، – دەدى شەنەۋنىك.
«ۆكونتاكتە» الەۋمەتتىك جەلىسى مەن Max مەسسەندجەرىنە يەلىك ەتەتىن VK كومپانياسىنىڭ وكىلدەرى لەنينگراد وبلىسىنداعى دەرەكتەر ورتالىعىنا درون شابۋىلى جاسالعانىن راستادى.
كومپانيانىڭ مالىمەتىنشە، VK سەرۆيستەرى پايدالانۋشىلار ءۇشىن ادەتتەگى رەجيمدە جۇمىس ىستەپ تۇر. الايدا «سبوي.رف» جانە Detector404.ru مونيتورينگ پلاتفورمالارىندا «ۆكونتاكتە» جۇمىسىنا قاتىستى شاعىمدار سانى ارتقانى تىركەلگەن.
سونىمەن قاتار سانكت-پەتەربۋرگتەگى «فونتانكا» ينتەرنەت-باسىلىمىنىڭ وقىرماندارى قالانىڭ بىرقاتار اۋدانىندا ەلەكتر قۋاتىنىڭ جوق ەكەنىن حابارلاعان. اتاپ ايتقاندا، كالينين جانە كراسنوگۆاردەيسكي اۋداندارىندا، سونداي-اق رۋچي اۋدانىندا جارىقتىڭ وشكەنى ايتىلدى.
Dnipro Osint, Astra جانە Varlamov News Telegram-ارنالارىنىڭ مالىمەتىنشە، درونداردىڭ ءبىرى كورابەلنىي فارۆاتەر ارقىلى وتەتىن اسپالى كوپىرگە سوققى جاساعان. بۇل كوپىر اقىلى باتىس جىلدامدىق ديامەترى (زسد) اۆتوماگيسترالىنىڭ قۇرامىنا كىرەدى.
قالا بيلىگى كوپىرگە شابۋىل جاسالعانى تۋرالى اقپاراتتى رەسمي تۇردە راستاعان جوق. الايدا «فونتانكا» باسىلىمىنىڭ حابارلاۋىنشا، زسد اۆتوماگيسترالىنىڭ ەكاتەرينگوفكا بۇعازىنان شكيپەرسكي بۇعازىنا دەيىنگى بولىگى جابىلعان. ءدال وسى ۋچاسكەدە كورابەلنىي فارۆاتەر ارقىلى وتەتىن كوپىر ورنالاسقان.
بۇدان بولەك، ماركەتپلەيس Ozon كومپانياسىنىڭ قويماسىندا ءورت شىققانى تۋرالى دا اقپارات تارادى.
