سانكت-پەتەربۋرگ مەتروسىنىڭ توعىز ستانتسياسى ازاماتتىق قورعانىس پاناسى رەتىندە پايدالانۋعا بەيىمدەلۋى مۇمكىن. بۇل جوبا اياسىندا ءتورت ارنايى بولىك پەن جالپى ۇزىندىعى شامامەن 35 شاقىرىم بولاتىن مەترو جولدارىن دا قامتۋ جوسپارلانىپ وتىر، دەپ حابارلايدى “ادىرنا”.
«فونتانكا» باسىلىمىنىڭ مەملەكەتتىك ساتىپ الۋلار پورتالىنداعى مالىمەتتەرگە سۇيەنىپ حابارلاۋىنشا، 10 قىركۇيەكتە سانكت-پەتەربۋرگ مەتروپوليتەنى بولاشاق جۇمىستاردىڭ تەحنيكالىق-ەكونوميكالىق نەگىزدەمەسىن ازىرلەيتىن مەردىگەردى ىزدەۋدى باستاعان. مەردىگەر مەترو نىساندارىنىڭ قايسىسىن قايتا سالۋ، قايسىسىنا قوسىمشا جابدىق ورناتۋ جانە قانداي نىسانداردى ازاماتتىق قورعانىس پاناسىنا بەيىمدەۋ قاجەتتىگىن انىقتاۋى ءتيىس.
جوبا بارىسىندا ىقتيمال قاۋىپتەر دە ەسەپكە الىنباق. اتاپ ايتقاندا، جەر استى سۋلارى دەڭگەيىنىڭ وزگەرۋى، قالاداعى قۇرىلىس اۋماعىنىڭ ۇلعايۋى جانە جابدىقتاردىڭ ەسكىرۋى نازارعا الىنۋى كەرەك. سونىمەن قاتار ازاماتتىق قورعانىس نىساندارى ءۇشىن تەحنوگەندىك اپات پەن ءورت سياقتى ەكى توتەنشە جاعداي ستسەناريى قاراستىرىلماق.
پانا رەتىندە پايدالانىلاتىن نىسانداردىڭ جەلدەتۋ جۇيەسىنە دە ەرەكشە تالاپ قويىلعان. ەگەر قورعانىس ورنىنا لاستانعان اۋا ەنسە، جەلدەتۋ جۇيەسى ونى راديواكتيۆتى شاڭنان، اەروزولدەردەن جانە ۋلى زاتتاردان ءتيىمدى تازارتۋدى قامتاماسىز ەتۋى ءتيىس.
بۇل سانكت-پەتەربۋرگ مەتروسىنىڭ ازاماتتىق قورعانىس ينفراقۇرىلىمىنا قاتىستى العاشقى قادامى ەمەس. وسى جىلدىڭ ناۋرىز ايىندا مەتروپوليتەن وسىنداي قۇجاتتامانى ازىرلەۋ قىزمەتتەرىنىڭ باعاسىنا مونيتورينگ جۇرگىزگەن.
سونىمەن قاتار سانكت-پەتەربۋرگ قالاسىندا قولدانىستاعى قورعانىس پانالارىن تۇگەندەۋ جۇمىستارى جۇرگىزىلىپ جاتىر. 2025 جىلى قالا بيلىگى ازاماتتىق قورعانىس نىساندارى ورنالاسقان 2633 مەكەنجايدى تەكسەرگەن. ولاردىڭ قاتارىندا جەكە تۇرعان نىساندارمەن بىرگە تۇرعىن ۇيلەردىڭ ىشىندەگى پانالار دا بار. سول كەزدە قالاداعى ءتيىستى كوميتەت قورعانىس نىساندارىنىڭ باسىم بولىگى جوندەۋدى قاجەت ەتەتىنىن مالىمدەگەن.
ال 2026 جىلدىڭ جازىنان باستاپ سانكت-پەتەربۋرگتە بەتوننان جاسالعان قورعانىس پانالارىن ورناتۋ جۇمىستارى باستالعان. العاشقى نىساندار كرونشتادتا پايدا بولدى. بۇل اۋماقتا بالتىق فلوتىنىڭ ماڭىزدى بازالارىنىڭ ءبىرى ورنالاسقان.
كرونشتادت بۇعان دەيىن دە بىرنەشە رەت شابۋىل نىسانى بولعان. ماسەلەن، 3 ماۋسىمدا قالادا جوندەۋدە تۇرعان رەسەي اسكەري-تەڭىز كۇشتەرىنىڭ «بويكي» كورۆەتىنە سوققى جاسالعان. بۇعان دەيىن بۇل كەمە رەسەيدىڭ «كولەڭكەلى فلوتى» قۇرامىنداعى تانكەرلەردى الىپ ءجۇرۋ كەزىندە بايقالعان.
وسىلايشا، سانكت-پەتەربۋرگتەگى مەترو ستانتسيالارىن ازاماتتىق قورعانىس نىساندارىنا بەيىمدەۋ جوسپارى قالاداعى قورعانىس ينفراقۇرىلىمىن قايتا قاراۋ جانە قولدانىستاعى پانالاردىڭ جاعدايىن باعالاۋ جۇمىستارى قاتار ءجۇرىپ جاتقانىن كورسەتەدى.
ايتا كەتەيىك، بۇعان دەيىن ماسكەۋ بيلىگى دە قالانىڭ ءۇش اۋدانىنداعى توعىز بومبادان قورعانۋ ورىنىن كۇردەلى جوندەۋگە 39 ميلليون رۋبل (شامامەن 420 مىڭ اقش دوللارى – رەد.) بولگەنىن حابارلادىق.
جوندەۋ جۇمىستارى ازوۆسكايا، بولوتنيكوۆسكايا جانە ناگورنايا كوشەلەرىندە، سونداي-اق لەنين داڭعىلىندا ورنالاسقان نىسانداردا جۇرگىزىلمەك. جوبا اياسىندا كىرەبەرىستەر، اراقابىرعالار مەن ەسىكتەر قالپىنا كەلتىرىلىپ، ىشكى ارلەۋ جاڭارتىلادى. سونىمەن قاتار سۋمەن جابدىقتاۋ، ەلەكترمەن قامتۋ، كارىز، جەلدەتۋ جانە بايلانىس جۇيەلەرى جوندەلەدى. جۇمىستاردى 30 قاراشاعا دەيىن اياقتاۋ جوسپارلانعان.
