Фото: Varlamov news/Telegram
18 қазан, жексенбіге қараған түні Ресейдің Санкт-Петербург пен Ленинград облысына ұшқышсыз ұшу аппараттарымен (дрондармен) жаппай шабуыл жасалды. Жергілікті биліктің мәліметінше, шабуыл салдарынан Санкт-Петербург мұнай терминалының аумағында өрт шыққан. Сондай-ақ VK компаниясының деректер орталығына шабуыл жасалып, дрондардың сынықтары көпқабатты және жеке тұрғын үйлерге құлаған. Бұл туралы DW жазды, деп хабарлайды “Адырна”.
Санкт-Петербург губернаторы Александр Беглов таңертең Невский, Красносельский, Красногвардейский және Мәскеу аудандарындағы азаматтық инфрақұрылым нысандарында, сондай-ақ мұнай терминалы аумағында өрт сөндіру жұмыстары жүргізіліп жатқанын мәлімдеді.
«Қауіпсіздік мақсатында Пулково әуежайының жұмысы шектелді. Қаза тапқандар жоқ. Мобильді интернет жұмысында үзілістер болуы мүмкін», — деп жазды ол Telegram-арнасында.
Ленинград облысының губернаторы Александр Дрозденко аймақ аумағында 126 дронның атып түсірілгенін хабарлады. Оның айтуынша, Всеволожск қаласындағы көпқабатты тұрғын үйге, Кировск маңындағы жеке үйге және Низино ауылындағы төрт автокөлікке дрон сынықтары құлаған.
«Электр беру желілеріне сынықтардың құлауына байланысты электр қуаты қысқа мерзімге үзіліп жатыр», – деді шенеунік.
«ВКонтакте» әлеуметтік желісі мен Max мессенджеріне иелік ететін VK компаниясының өкілдері Ленинград облысындағы деректер орталығына дрон шабуылы жасалғанын растады.
Компанияның мәліметінше, VK сервистері пайдаланушылар үшін әдеттегі режимде жұмыс істеп тұр. Алайда «Сбой.рф» және Detector404.ru мониторинг платформаларында «ВКонтакте» жұмысына қатысты шағымдар саны артқаны тіркелген.
Сонымен қатар Санкт-Петербургтегі «Фонтанка» интернет-басылымының оқырмандары қаланың бірқатар ауданында электр қуатының жоқ екенін хабарлаған. Атап айтқанда, Калинин және Красногвардейский аудандарында, сондай-ақ Ручьи ауданында жарықтың өшкені айтылды.
Dnipro Osint, Astra және Varlamov News Telegram-арналарының мәліметінше, дрондардың бірі Корабельный фарватер арқылы өтетін аспалы көпірге соққы жасаған. Бұл көпір ақылы Батыс жылдамдық диаметрі (ЗСД) автомагистралінің құрамына кіреді.
Қала билігі көпірге шабуыл жасалғаны туралы ақпаратты ресми түрде растаған жоқ. Алайда «Фонтанка» басылымының хабарлауынша, ЗСД автомагистралінің Екатерингофка бұғазынан Шкиперский бұғазына дейінгі бөлігі жабылған. Дәл осы учаскеде Корабельный фарватер арқылы өтетін көпір орналасқан.
Бұдан бөлек, маркетплейс Ozon компаниясының қоймасында өрт шыққаны туралы да ақпарат тарады.
