ۋكراينا قارۋىنىڭ كەيبىر تۇرلەرىنىڭ قوزعالىس جىلدامدىعى مەن ينتەرنەتكە قوسىلۋ مۇمكىندىگىنە قويىلعان شەكتەۋلەردىڭ ارتىندا اقش ۇكىمەتى تۇرۋى مۇمكىن. بۇل تۋرالى SpaceX كومپانياسىنىڭ يەسى ءارى Starlink سپۋتنيكتىك بايلانىس جۇيەسىنىڭ وپەراتورى يلون ماسك ايتتى، دەپ حابارلايدى «ادىرنا» ءتىلشىسى.
Starlink جۇيەسى كيەۆكە رەسەي نىساندارىنا ۇشقىشسىز ۇشۋ اپپاراتتارىن باعىتتاۋعا، سونداي-اق ءوز اۋە كەڭىستىگىن قورعاۋعا مۇمكىندىك بەرەدى. الايدا 13 قازان كۇنى كەشكە ۋكراينا تاراپى جىلدامدىققا قاتىستى كۇتپەگەن جاڭا شەكتەۋلەر اسكەري مىندەتتەردى ورىنداۋعا كەدەرگى كەلتىرىپ جاتقانىن مالىمدەگەن.
ماسك Starlink جۇيەسىنىڭ اسكەري ماقساتتاعى نۇسقاسى — Starshield اقش ۇكىمەتىنىڭ باقىلاۋىندا ەكەنىن ايتتى.
كاسىپكەر بۇل تۋرالى X الەۋمەتتىك جەلىسىندە جازدى. ول بۇعان دەيىن ۋكراينانىڭ رەسمي تۇلعالارىنىڭ، سونىڭ ىشىندە پرەزيدەنت ۆلاديمير زەلەنسكيدىڭ بايلانىستى قالپىنا كەلتىرۋ تۋرالى ۇندەۋلەرىنە جاۋاپ بەرگەن.
«بۇل قاتەلىك دەپ ۇمىتتەنەمىن. مۇمكىن، بۇل كۇردەلى تەحنيكالىق اقاۋ شىعار»، — دەگەن ەدى زەلەنسكي بريتاندىق باق-قا بەرگەن سۇحباتىندا.
13 قازان كۇنى كەشكە Starlink جۇيەسى قوزعالىس جىلدامدىعىنا ساعاتىنا 160 شاقىرىم شەكتەۋ ەنگىزگەن. سونىڭ سالدارىنان بۇدان جوعارى جىلدامدىقپەن قوزعالاتىن كەز كەلگەن قارۋ-جاراق ينتەرنەت جەلىسىنە قوسىلۋ مۇمكىندىگىنەن ايىرىلعان ەدى.
ۋكراينانىڭ بۇرىنعى قورعانىس ءمينيسترى ميحايل فەدوروۆتىڭ حابارلاۋىنشا، 14 قازان كۇنى كەشكە قاراي قىزمەتتىڭ جۇمىسى ءىشىنارا قالپىنا كەلتىرىلگەن.
«Starshield جۇيەسىندەگى جىلدامدىق شەكتەۋىن تولىعىمەن الىپ تاستاۋ قازىر ۋكراينا قورعانىسى ءۇشىن اسا ماڭىزدى»، — دەپ جازدى ول X الەۋمەتتىك جەلىسىندە.
فەدوروۆ يلون ماسككە العىس ايتىپ، ودان «بۇدان ءارى دە قولداۋ كورسەتۋدى» سۇرادى.
شامامەن ءبىر ساعاتتان كەيىن ماسك بۇل جازباعا جاۋاپ بەردى.
«Starshield جۇيەلەرى اقش ۇكىمەتىنىڭ يەلىگىندە جانە ونىڭ باسقارۋىندا. جىلدامدىققا نەمەسە قولدانۋ تاسىلىنە قاتىستى كەز كەلگەن شەكتەۋدى امەريكالىق اسكەريلەر، تۇپتەپ كەلگەندە، اقش پرەزيدەنتى بەلگىلەيدى»، — دەپ جازدى ول.
ماسك Starlink جۇيەسى «ازاماتتىق نەمەسە قورعانىس ماقساتىنداعى قىزمەتكە ارنالعانىن جانە شابۋىلداۋ سيپاتىنداعى اسكەري وپەراتسيالاردا پايدالانىلمايتىنىن» ايتتى. ونىڭ پىكىرىنشە، مۇنداي ارەكەت كوممەرتسيالىق كومپانيا ءۇشىن دۇرىس بولماس ەدى.
اقش ۇكىمەتى بۇل ماسەلەگە قاتىستى تۇسىنىكتەمە بەرگەن جوق. دەگەنمەن Axios باسىلىمىنا اتى-ءجونىن جاريالاماعان جوعارى لاۋازىمدى امەريكالىق شەنەۋنىك ۆاشينگتوننىڭ ۋكرايناداعى Starlink جۇمىسىنا قويىلعان شەكتەۋلەرگە قاتىسى جوق ەكەنىن مالىمدەدى.
ەكى جۇيە دە ماسككە تيەسىلى SpaceX كومپانياسىنىڭ مەنشىگىندە بولعانىمەن، ولاردىڭ قىزمەتى ءارتۇرلى. Starlink — جەرگە جاقىن وربيتاداعى سپۋتنيكتەر ارقىلى، اسىرەسە شالعاي ايماقتاردا، ينتەرنەتكە قول جەتكىزۋگە مۇمكىندىك بەرەتىن ازاماتتىق بايلانىس قىزمەتى. ال Starshield مەملەكەتتىك قۇرىلىمدار مەن اسكەري ماقساتتا پايدالانۋعا ارنالعان.
