ازەربايجاندا Instagram مەن TikTok الەۋمەتتىك جەلىلەرىنە VPN ارقىلى عانا كىرۋگە بولاتىنى تۋرالى شاعىمدار كوبەيدى، دەپ حابارلايدى “ادىرنا”.
ۆۆس دەرەگىنشە، پايدالانۋشىلار ينتەرنەتتىڭ باياۋلاعانىن دا حابارلاعان. بۇل جاعداي مەكتەپتەردە حيدجاب كيۋگە قاتىستى شەكتەۋلەرگە قارسىلىق بىلدىرگەن نارازىلىقتارمەن بايلانىستى بولۋى مۇمكىن.
باسىلىمنىڭ مالىمەتىنشە، 12 قازاندا ازەربايجاداعى پايدالانۋشىلاردىڭ باسىم بولىگى Instagram مەن TikTok-قا VPN-ءسىز كىرە الماعان. كەيبىر قولدانۋشىلار YouTube پەن Gmail قىزمەتتەرىندە دە اقاۋلار بارىن ايتقان. الايدا ەل بيلىگى الەۋمەتتىك جەلىلەردىڭ بۇعاتتالعانىن رەسمي تۇردە راستاعان جوق.
داۋدىڭ تۋىنداۋىنا 21 قىركۇيەكتە قابىلدانعان ۇكىمەت قاۋلىسى سەبەپ بولعان. قۇجاتتا مەكتەپتەگى كيىم ۇلگىسى ءبىلىم بەرۋدىڭ زايىرلىلىق قاعيداتىنا ساي بولۋى كەرەكتىگى كورسەتىلگەن. وسىدان كەيىن بىرقاتار مەكتەپتە حيدجاب كيۋگە قويىلعان شەكتەۋگە قارسى نارازىلىقتار وتكەن.
12 قازاندا ازەربايجان ءىىم قاۋلىنىڭ ورىندالۋىنا كەدەرگى كەلتىردى دەگەن كۇدىكپەن 37 ادامنىڭ ۇستالعانىن حابارلاعان. ولارعا مەكتەپتەردىڭ جۇمىسىنا كەدەرگى كەلتىرىپ، قوعامدىق ءتارتىپتى بۇزدى دەگەن ايىپ تاعىلعان.
BBC دەرەككوزىنىڭ مالىمەتىنشە، كەيبىر مەكتەپتەردە جوعارى سىنىپ وقۋشىلارىنان ساقالدارىن قىرۋ دا تالاپ ەتىلگەن. الايدا بۇل تالاپ قاۋلى ماتىنىندە كورسەتىلمەگەن.
ازەربايجان — زايىرلى مەملەكەت، حالقىنىڭ 90 پايىزدان استامى مۇسىلماندار. ەلدە مەكتەپتەردە حيدجاب كيۋگە 2011 جىلى دا شەكتەۋ قويىلىپ، بۇل شەشىم جاپپاي نارازىلىقتارعا ۇلاسقان.
