ازەربايجاندا قازاقتىڭ داۋلەسكەر كۇيشىسى قۇرمانعازى اتىنداعى بالالار شىعارماشىلىعى ورتالىعىنىڭ سالتاناتتى اشىلۋ ءراسىمى ءوتتى، دەپ حابارلايدى "ادىرنا" ءتىلشىسى.
ورتالىقتىڭ اشىلۋىنا قازاقستان پرەزيدەنتى قاسىم-جومارت توقاەۆ پەن ازەربايجان پرەزيدەنتى يلحام اليەۆ قاتىستى.
پرەزيدەنت زاماناۋي يننوۆاتسيالىق ورتالىقتىڭ "قازاقستاننان سىيلىق" ەكەنىن ايتتى.
"بۇل – قازاقستان حالقىنىڭ تارتۋى. مەنىڭ جەكە تاپسىرمام بويىنشا اتالعان سىيلىقتى جەكەمەنشىك BI Group كومپانياسى بۇكىل حالىقتىڭ اتىنان شىن جۇرەكتەن ۇسىنىپ وتىر. ورتالىق ەلدەرىمىز اراسىنداعى جان-جاقتى بايلانىستاردى نىعايتۋعا قىزمەت ەتەدى دەپ ويلايمىن. سىزدەرگە تابىس پەن باق-بەرەكە تىلەيمىن. ازەربايجاننىڭ وسى قاسيەتتى ولكەسى قارىشتاپ دامي بەرەتىنىنە سەنىمدىمىن", – دەدى قازاقستان پرەزيدەنتى فيزۋلي جۇرتشىلىعىمەن اڭگىمەلەسۋ كەزىندە.
پرەزيدەنت يلحام اليەۆ قاسىم-جومارت توقاەۆقا جانە بارشا قازاقستان حالقىنا دا العىسىن ايتتى.
"باۋىر رەتىندە وسىنداي كەرەمەت سىي جاساعانىڭىز ءۇشىن سىزگە العىس ايتقىم كەلەدى. ازات ەتىلگەن جەرلەردە بالالار شىعارماشىلىعى ورتالىعىن سالۋ ءسىزدىڭ باستاماڭىز ەدى. وسىدان ءبىر جارىم جىل بۇرىن ازەربايجانعا كەلگەن كەزىڭىزدە، اتالعان ورتالىقتىڭ جوباسى تانىستىرىلعان بولاتىن. ول ءبىر جىل ىشىندە سالىندى جانە بۇگىن رەسمي تۇردە اشىلىپ وتىر. ورتالىق قازاق حالقىنىڭ ۇلى پەرزەنتى قۇرمانعازىنىڭ ەسىمىمەن اتالدى. كەشە ايتقانىمىزداي، بۇل تەك بالالاردىڭ شىعارماشىلىعىن شىڭداپ قانا قويماي، قازاقستان مەن ازەربايجاننىڭ دوستىعى مەن باۋىرلاستىعىن ايشىقتايتىن ورتالىق بولادى. ءبىز بۇل تارتۋعا شىن جۇرەكتەن ريزاشىلىعىمىزدى بىلدىرەمىز. ازەربايجان حالقى مۇنى ەشقاشان ۇمىتپايدى", – دەدى يلحام اليەۆ.
پرەزيدەنت شەتەلدەگى ورتالىققا داۋلەسكەر كۇيشى قۇرمانعازىنىڭ ەسىمى كەزدەيسوق بەرىلىپ وتىرعان جوق ەكەنىن دە ايتتى.
"شىن مانىندە، قۇرمانعازى – قازاق مۋزىكاسىنىڭ الىبى. ءتىپتى تۇركى مادەنيەتىنىڭ اجىراماس بولىگى دەپ ايتۋعا بولادى. قازاقتىڭ كۇي ونەرىن قۇرمانعازىسىز ەلەستەتۋ مۇمكىن ەمەس. ونىڭ تۋىندىلارى وتە تەگەۋرىندى ءارى زامانمەن بىرگە جاساي بەرەدى. سوندىقتان ونىڭ ايگىلى «سارىارقا» كۇيىن حالىق ءالى كۇنگە دەيىن تەبىرەنە تىڭدايدى", – دەدى قاسىم-جومارت توقاەۆ.
نىساندى جوبالاۋ جۇمىستارى ءۇش ايدىڭ ىشىندە جاسالىپ، قۇرىلىسى 9 ايدا اياقتالدى. ودان بولەك مەملەكەت باسشىسى قاسىم-جومارت توقاەۆ ورتالىق ۇجىمىنا قۇرمانعازى دومبىراسىنىڭ كوشىرمەسىن، ءبىلىم وشاعىنىڭ تاربيەلەنۋشىلەرىن تاسيتىن اۆتوبۋستى سىيعا تارتتى.
