يران پارلامەنتى «حيدجاب جانە پاكتىك تۋرالى» زاڭ جوباسىن قولدادى. وندا «ورىنسىز» كيىنگەن جانە «درەسس-كودتى بۇزعان» ايەلدەردى 10 جىلعا دەيىن باس بوستاندىعىنان ايىرۋ جانە ايىپپۇلدار قاراستىرىلعان، دەپ حابارلايدى “ادىرنا” ءتىلشىسى BBC-گە سىلتەمە جاساپ.
زاڭ جوباسىن 152 پارلامەنت مۇشەسى قولداسا، 34-ءى قارسى داۋىس بەردى.
قازىرگى ۋاقىتتا قوعامدىق ورىنداردا ايەلدەردىڭ دەنە ءمۇسىنىن جاسىرۋ ءۇشىن حيدجاب پەن ۇزىن، كەڭ كيىم كيۋگە مىندەتتەلدى. بۇل زاڭدى بۇزعان ايەلدەر ايىپپۇل تولەيدى نەمەسە قاماۋعا الىنباق.
پارلامەنت قابىلداعان وزگەرىستەر 5 جىلدان 10 جىلعا دەيىن باس بوستاندىعىنان ايىرۋ مەن 7302 دوللارعا دەيىن ايىپپۇل تولەۋدى قاراستىرىپ وتىر.
بۇعان قوسا، «درەسس-كودتى بۇزۋدى ۇيىمداسقان تۇردە ناسيحاتتاعان» كەز كەلگەن ادام 5 جىلدان 10 جىلعا دەيىن باس بوستاندىعىنان ايىرىلۋى مۇمكىن.
ال باق پەن الەۋمەتتىك جەلىلەردە «جالاڭاشتانۋدى ناسيحاتتايتىندار»، «حيدجابتى كەلەمەجدەيتىندەر»، سونداي-اق جۇرگىزۋشى نەمەسە جولاۋشى ايەل زاڭدا بەلگىلەنگەن كيىم كيمەيتىن كولىك يەلەرىنە ايىپپۇل سالىنادى.
بۇۇ-نىڭ سەگىز تاۋەلسىز ادام قۇقىقتارى جونىندەگى ساراپشىسى بۇل زاڭ جوباسى ادامنىڭ نەگىزگى قۇقىقتارىن بۇزادى دەپ ەسكەرتتى. يراندا بۇل ءتارتىپ باستاپقىدا سىناق تۇرىندە جۇزەگە اسىرىلادى دەلىنەدى.
ۇقساس جاڭالىقتار
