تانىمال بيۋتي-بلوگەر ءسانيا ءىلياسوۆا ءوزىنىڭ Instagram پاراقشاسىندا حيدجابتان نەلىكتەن باس تارتقانىن ءتۇسىندىردى, دەپ حابارلايدى “ادىرنا” ۇلتتىق پورتالى.
بلوگەر، كاسىپكەر، بىرنەشە جوبالاردىڭ اۆتورى ءسانيا ءىلياسوۆا ءوزىنىڭ Instagram پاراقشاسىندا حيدجابىن شەشكەنىن جازدى. بۇل شەشىمگە قالاي كەلگەنىن، نە تۇرتكى بولعانىن ءتۇسىندىردى ول.
“مەن ورامالىمدى شەشتىم. 2 اي بويى ەموتسيانالدى تولقىنىس جانە ءوزىمدى ىزدەۋ… مەن ءوزىم ءۇشىن دە، وزگەلەر ءۇشىن دە ءاردايىم شىنايى بولعىم كەلەدى. سىزدەرگە ول ۇناي ما، ۇناماي ما بىلمەيمىن. ءوز جۇرەگىمنىڭ قالاۋىمەن ءومىر سۇرەمىن. ەگويستتىك بولىپ كورىنە مە؟ بالكىم، ءيا. سولاي بولۋى كەرەك، سولاي بولادى دا. مەن “ماڭگىلىك” جانە “ەشقاشان” دەگەن سوزدەردى ايتۋعا بولمايتىنىن ۇقتىم. ويتكەنى اللاھتىڭ ءوزىنىڭ جوسپارلارى بار” دەپ جازدى ول پاراقشاسىنداعى پوستىندا.
ول ءوزىنىڭ حيدجابتان باس تارتۋىن بىلاي ءتۇسىندىردى:
“مەككەگە ساپارىمنان كەيىن مەن ءوزىمدى بيىكتە ەلەستەتكەن ەدىم. يمانىم دا، ورامالىم دا بولادى دەپ سەندىم. بىراق مەن كۇتكەننەن باسقا نارسەلەر ورىندالىپ، اللاھ ماعان مەنىڭ ورامال تاعۋداعى نيەتىمدى كورسەتىپ بەردى. بۇل ءبىر قىزىق اشىلۋ بولدى. اللا رازىلىعى ءۇشىن بولماعان ەكەن. كوڭىلىم قالدى! ورامالدىلاردان، ولاردىڭ ومىردەگى جانە ينستاگرامداعى كەيىپتەرىنەن كوڭىلىم قالدى” دەپ جازدى ول.
سونداي-اق ول ورامالعا كەيىن نيەتىن دۇرىستاعاندا، “اللانىڭ قالاۋىمەن” قايتا كەلەتىنىن ايتتى:
“ازىرگە وسىلاي. بالكىم ءبىر ايدان كەيىن، ءبىر جىلدان كەيىن، 5 جىلدان كەيىن مەن ورامالعا قايتا كەلەتىن شىعارمىن. ەگەر ارينە ءتىرى بولسام. مەن ەشتەڭەنى بولجاپ، ەشتەڭەگە كەپىلدىك بەرە المايمىن. ءبارى اللانىڭ قالاۋىمەن بولادى” دەدى ول.
ءسانيا ءىلياسوۆا ءوزىنىڭ بيزنەسىن ارى قاراي جالعاستىراتىنىن، ورامالدى قىزدارعا ارناپ كيىم، كويلەك شىعاراتىنىن جازدى:
“مەن ورانعاندارعا ارناپ ادەمى كيىمدەردى شىعارا بەرەمىن. بۇل ءىستى سونداي جاقسى كورەمىن. بۇل ءىستى باسقا ىستەگەن ىستەرىمنەن دە ارتىق كورەمىن. سىزدەر ءۇشىن جاساعان ءار ءىسىم ءۇشىن باقىتتى بولامىن. الداعى ۋاقىتتا ءناپسىم، ماقتانىشىم ءۇشىن عانا ەمەس تازا نيەتپەن ورامالدىڭ ءمانىن ۇققاندا، ونىڭ تىنىشتىق، قۇداي مەن مەنىڭ ارامداعى نارسە ەكەنىن تۇسىنگەندە عانا ورالامىن” دەپ قوستى ول.
وقىرماندار ءانشىنىڭ بۇل شەشىمىنە تۇرلىشە پىكىر ءبىلدىردى. ءبىرى داتتاپ، “ورامالدى ويىنشىق ەتتىڭ” دەسە، ەندى ءبىرى “دۇرىس شەشىم” دەپ باعالادى.
تۇراقتى وقىرمانداردىڭ ءبىرىنىڭ ايتۋىنشا ءسانيا ءىلياسوۆا وسىدان 2 اي بۇرىن ورامالعا كەلگەن ۋاقىتتان اندەرىن جەلىدەن وشىرگىزىپ، زاماناۋي ومىردەن ءوزىن شەكتەپ تاستاعان.
