الماتى قالاسىنداعى ەڭبەك كوشەسى، 92 مەكەنجايىندا ورنالاسقان №15 مەكتەپ-ينتەرناتتىڭ بازاسىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان №7 ارنايى مەكتەپ-ينتەرناتىنىڭ فيليالى جۇمىسىن باستادى.
فيليالدىڭ اشىلۋى ەرەكشە ءبىلىم بەرۋ قاجەتتىلىكتەرى بار بالالاردىڭ تەگىن ارنايى ءبىلىم الۋىنا قولجەتىمدىلىكتى كەڭەيتۋگە جانە ولاردىڭ جان-جاقتى دامۋىنا قاجەتتى جاعداي جاساۋعا باعىتتالعان.
اتاپ ايتقاندا، جاڭا فيليال «پەداگوگتەر اكادەمياسى» قوعامدىق ۇيىمىندا ءبىلىم العان بالالاردىڭ وقۋىن جالعاستىرۋدىڭ بالامالى مۇمكىندىكتەرىنىڭ ءبىرى رەتىندە ۇسىنىلدى.
بۇگىنگى تاڭدا بۇعان دەيىن «پەداگوگتەر اكادەمياسى» قوعامدىق ۇيىمىندا ءبىلىم العان 35 بالانىڭ وقۋعا قابىلداۋ قۇجاتتارى قابىلداندى. ونىڭ ىشىندە 23 بالا جاڭادان اشىلعان №7 ارنايى مەكتەپ-ينتەرنات فيليالىندا، ال قالعان 12 بالا جەكە ءبىلىم بەرۋ قاجەتتىلىكتەرى مەن مامانداردىڭ ۇسىنىمدارى ەسكەرىلە وتىرىپ، باسقا ارنايى ءبىلىم بەرۋ ۇيىمدارىندا وقيتىن بولادى.
بۇل فيليالدا وقۋ پروتسەسىن ۇيىمداستىرۋعا، جەكە جانە توپتىق تۇزەتۋ-دامىتۋ ساباقتارىن وتكىزۋگە قاجەتتى جاعدايلار جاسالعان. پسيحولوگ جانە لوگوپەد كابينەتتەرى، سەنسورلىق ينتەگراتسيا بولمەسى، بەيىمدەلگەن دەنە شىنىقتىرۋ كابينەتى، پسيحولوگيالىق سەرگىتۋ بولمەلەرى جابدىقتالعان. سونىمەن قاتار، ءجۇزۋ باسسەينى قاراستىرىلعان.
وقۋ-تاربيە پروتسەسىن بىلىكتى پەداگوگتەر مەن ءتيىستى سالا ماماندارى قامتاماسىز ەتەدى. فيليالدا 1–4 سىنىپ وقۋشىلارى ءۇشىن ءبىلىم بەرۋ قازاق جانە ورىس تىلدەرىندە ۇيىمداستىرىلعان. بالالار ءتورت مەزگىل تاماقپەن قامتاماسىز ەتىلەدى. وقۋ-تاربيە پروتسەسى بەكىتىلگەن كەستەگە سايكەس ساعات 08:30-دان 17:00-گە دەيىن جۇرگىزىلەدى.
ۇيدە وقىتۋ ۇسىنىلعان بالالار ءۇشىن جەكە ساباقتاردى ۇيىمداستىرۋ ماسەلەلەرى مامانداردىڭ ءتيىستى قورىتىندىلارى نەگىزىندە جانە اتا-انالارمەن كەلىسە وتىرىپ قاراستىرىلادى.
بالالاردىڭ جەكە قاجەتتىلىكتەرىن ەسكەرە وتىرىپ، قاۋىپسىز ءارى قولايلى ءبىلىم بەرۋ ورتاسىن قالىپتاستىرۋعا ەرەكشە كوڭىل بولىنگەن.
الماتى قالاسىنىڭ ءبىلىم باسقارماسى مەملەكەت ەرەكشە ءبىلىم بەرۋ قاجەتتىلىكتەرى بار بالالاردى مەملەكەتتىك ءبىلىم بەرۋ ۇيىمدارىندا تەگىن وقىتۋعا قاجەتتى مۇمكىندىكتەرگە يە ەكەنىن اتاپ ءوتتى.
بۇل رەتتە ءبىلىم بەرۋ ۇيىمىن تاڭداۋ بالانىڭ جەكە قاجەتتىلىكتەرى، مامانداردىڭ ۇسىنىمدارى جانە قولدانىستاعى زاڭناما تالاپتارى ەسكەرىلە وتىرىپ جۇزەگە اسىرىلادى.
باستى باسىمدىق – بالالاردىڭ مۇددەسىن قورعاۋ، وقۋ پروتسەسىنىڭ ۇزدىكسىزدىگىن ساقتاۋ جانە ساپالى پەداگوگيكالىق ءارى تۇزەتۋ-دامىتۋ كومەگىنىڭ قولجەتىمدىلىگىن قامتاماسىز ەتۋ.
