Almaty qalasyndaǧy Eŋbek köşesı, 92 mekenjaiynda ornalasqan №15 mektep-internattyŋ bazasynda erekşe bılım beru qajettılıkterı bar balalarǧa arnalǧan №7 arnaiy mektep-internatynyŋ filialy jūmysyn bastady.
Filialdyŋ aşyluy erekşe bılım beru qajettılıkterı bar balalardyŋ tegın arnaiy bılım aluyna qoljetımdılıktı keŋeituge jäne olardyŋ jan-jaqty damuyna qajettı jaǧdai jasauǧa baǧyttalǧan.
Atap aitqanda, jaŋa filial «Pedagogter akademiiasy» qoǧamdyq ūiymynda bılım alǧan balalardyŋ oquyn jalǧastyrudyŋ balamaly mümkındıkterınıŋ bırı retınde ūsynyldy.
Bügıngı taŋda būǧan deiın «Pedagogter akademiiasy» qoǧamdyq ūiymynda bılım alǧan 35 balanyŋ oquǧa qabyldau qūjattary qabyldandy. Onyŋ ışınde 23 bala jaŋadan aşylǧan №7 arnaiy mektep-internat filialynda, al qalǧan 12 bala jeke bılım beru qajettılıkterı men mamandardyŋ ūsynymdary eskerıle otyryp, basqa arnaiy bılım beru ūiymdarynda oqityn bolady.
Būl filialda oqu prosesın ūiymdastyruǧa, jeke jäne toptyq tüzetu-damytu sabaqtaryn ötkızuge qajettı jaǧdailar jasalǧan. Psiholog jäne logoped kabinetterı, sensorlyq integrasiia bölmesı, beiımdelgen dene şynyqtyru kabinetı, psihologiialyq sergıtu bölmelerı jabdyqtalǧan. Sonymen qatar, jüzu basseinı qarastyrylǧan.
Oqu-tärbie prosesın bılıktı pedagogter men tiıstı sala mamandary qamtamasyz etedı. Filialda 1–4 synyp oquşylary üşın bılım beru qazaq jäne orys tılderınde ūiymdastyrylǧan. Balalar tört mezgıl tamaqpen qamtamasyz etıledı. Oqu-tärbie prosesı bekıtılgen kestege säikes saǧat 08:30-dan 17:00-ge deiın jürgızıledı.
Üide oqytu ūsynylǧan balalar üşın jeke sabaqtardy ūiymdastyru mäselelerı mamandardyŋ tiıstı qorytyndylary negızınde jäne ata-analarmen kelıse otyryp qarastyrylady.
Balalardyŋ jeke qajettılıkterın eskere otyryp, qauıpsız ärı qolaily bılım beru ortasyn qalyptastyruǧa erekşe köŋıl bölıngen.
Almaty qalasynyŋ Bılım basqarmasy memleket erekşe bılım beru qajettılıkterı bar balalardy memlekettık bılım beru ūiymdarynda tegın oqytuǧa qajettı mümkındıkterge ie ekenın atap öttı.
Būl rette bılım beru ūiymyn taŋdau balanyŋ jeke qajettılıkterı, mamandardyŋ ūsynymdary jäne qoldanystaǧy zaŋnama talaptary eskerıle otyryp jüzege asyrylady.
Basty basymdyq – balalardyŋ müddesın qorǧau, oqu prosesınıŋ üzdıksızdıgın saqtau jäne sapaly pedagogikalyq ärı tüzetu-damytu kömegınıŋ qoljetımdılıgın qamtamasyz etu.
