اۆينوننىڭ جاز مەزگىلى – بۇل جاي عانا ىستىق كۇن استىنداعى فرانتسۋز قالاسى ەمەس. بۇل بارىپ تۇرعان تاڭعاجايىپ تەاتر الەمى. قالانىڭ ءار بۇرىشى تاريحي شىركەۋلەردەن باستاپ شاعىن زاماناۋي دامحانالارعا دەيىن ءبىرتۇتاس تەاتر ساحناسىنا اينالعان. بۇل جەردە حالىقارالىق «Off Avignon» فەستيۆالى تاڭعالارلىق دەڭگەيدە ءوتىپ جاتىر. كۇن سايىن سپەكتاكلدەر، پرەمەرالار، كورىنىستەر، شەرۋلەر مەن ءتۇرلى قىزىقتى شارالار كوپشىلىك نازارىنا ۇسىنىلۋدا.
اتالمىش سيقىرلى دا شابىتقا تولى فەستيۆالدە تۇڭعىش رەت الماتى قالاسىنىڭ مەملەكەتتىك قۋىرشاق تەاترى ونەر كورسەتۋدە. قازاقستاننان كەلگەن تالانتتى ارتيستەر ايگىلى ۋيليام شەكسپيردىڭ اتاقتى «رومەو مەن دجۋلەتتا» تراگەدياسىن زاماناۋي سارىندا ۇسىنىپ، كورەرمەندەردى تاڭعالدىرۋ ۇستىندە. قويىلىمنىڭ پرەمەراسى «LaScierie» تەاترى ساحناسىندا انشلاگپەن وتكىزىلگەنى سوڭىن ايقىن كورسەتكىشى.
تابيعاتى ەرەكشە «Off Avignon» فەستيۆالىندە ارتيستەر تەك سپەكتاكلدەردە ءرول سومداپ قانا قويماي، قالانىڭ كوشەلەرىنە شىعىپ، افيشالار مەن فلاەرلەر تاراتىپ، كوپشىلىك نازارىنا كىشىگىرىم كورىنىستەر ۇسىنۋدا. ولار ءوز سپەكتاكلدەرى جايلى، تەاترلارى مەن شىعارماشىلىقتارى جايلى ءسوز قوزعاپ، كورەرمەندەردى قويىلىم تاماشالاۋعا بار ىنتاسىن سالىپ شاقىرادى. كوپتەگەن ارتيستەر ءۇشىن بۇل تىڭ ءارى جاڭا تاجىريبە. ولار تەك ساحنا تورىندە ءرول ويناپ قانا قويماي، ءوز ۇجىمدارىنىڭ، مادەنيەتتەرىنىڭ، ەللدەرىنىڭ داۋسىنا اينالۋدا.
الماتى قالاسىنىڭ قۋىرشاق تەاترى ۇسىنعان «رومەو مەن دجۋلەتتا» –جاي عانا شەكسپير پەساسىنا نەگىزىندەگى سپەكتاكل ەمەس. بۇل – قازىرگى زامان تەاترىنىڭ تىلىمەن، پلاستيكامەن، ەموتسيامەن، ءتىرى اكتەرلىك ويىنمەن، كاسىبي قۋىرشاق جۇرگىزۋ شەبەرلىگىمەن باياندالعان تەبىرەنتەرلىك ماحاببات حيكاياسى. سپەكتاكل تولىقتاي قازاق تىلىندە كورسەتىلەدى. الايدا ءتىل ماسەلەسى كورەرمەنگە كەدەرگى كەلتىرمەيدى. كەرىسىنشە، ساحناداعى ءتىرى ارەكەت، ديناميكا، اكتەرلەردىڭ شىنايىلىعى مەن ەنەرگەتيكاسى كورەرمەندى بىردەن باۋراپ الىپ، وقيعانىڭ ءمانىن جۇرەكپەن تۇسىنۋگە مۇمكىندىك بەرەدى.
«مەن ايتىلعان سوزدەردى تۇسىنبەدىم، بىراق جۇرەگىممەن ءبارىن ۇقتىم!» – دەدى گەرمانيادان كەلگەن كورەرمەن.
«ساحناداعى ەنەرگيا مەن قۋىرشاقتاردىڭ پلاستيكاسى مەنى تاڭعالدىردى. بۇل ۇمىتىلماس اسەر!» – دەپ پىكىر ءبىلدىردى فرانتسيادان كەلگەن قوناق.
«Off Avignon» – بۇل تەك تەاتر فەستيۆالى عانا ەمەس، سونىمەن قاتار كەرەمەت ۇيىمداستىرۋشىلىق شەبەرلىكتىڭ كورىنىسى. كۇنىنە جۇزدەگەن ۇجىم، جۇزدەگەن الاڭ، مىڭداعان قويىلىم، مۇنىڭ ءبارى جۇيەلى تۇردە، دالدىكپەن جانە ءاربىر قاتىسۋشىعا دەگەن تەرەڭ قۇرمەتپەن ۇيىمداستىرىلعان. وسىنداي ۇدەرىستىڭ ءبىر بولشەگى بولۋ – ۇلكەن مارتەبە ءارى جاۋاپكەرشىلىك.
الماتىلىق قۋىرشاق تەاترى وسى فەستيۆالگە قاتىسۋشى عانا ەمەس، اۆينون قالاسىنىڭ شىعارماشىلىق تىنىسىنىڭ ءبىر بولشەگىنە اينالىپ وتىر. قازاق تىلىندە سپەكتاكل ۇسىنعان تەاتردىڭ بارشاعا تۇسىنىكتى بولا بىلگەنى تىپتەن قۋانتارلىق جايت. بۇل – تەك ونەردىڭ ەمەس، الەمگە اشىق قازاق مادەنيەتىنىڭ دە جارقىن جەڭىسى.
26 شىلدەگە دەيىن قۋىرشاق تەاتر اۆينون تورىندە «رومەو مەن دجۋلەتتا» سپەكتاكلى كورسەتىلىمىن جالعاستىرادى. ءار كورسەتىلىم – تەاتر ءۇشىن قازاق ونەرىن ەۋروپالىق تەاتر كەڭىستىگىندە پاش ەتۋدىڭ تاپتىرماس مۇمكىندىگى.
