باسەكەلەستىكتى قورعاۋ جانە دامىتۋ اگەنتتىگى 11 قازاندا «ياندەكس Go» سەرۆيسىندە اقاۋ تۋىنداعاندا تاكسي قۇنى قىمباتتاعان، دەپ حابارلايدى “ادىرنا” ءتىلشىسى.
تاكسي قىزمەتىنە سۇرانىستىڭ ارتۋىنا بايلانىستى inDrive كومپانياسىنا رەسمي الدىن الا ەسكەرتۋ جولدادى.
اگەنتتىك مالىمەتىنشە، سول كۇنى جەكەلەگەن ساپارلاردىڭ قۇنى ءۇش ەسەگە جۋىق قىمباتتاعان. بۇعان بوس كولىكتەردىڭ تاپشىلىعى مەن جۇرگىزۋشىلەر ۇسىنعان تاريفتەردىڭ ءوسۋى سەبەپ بولعان.
inDrive كومپانياسى جاعدايدى تۇراقتاندىرۋ ءۇشىن سەرۆيس كوميسسياسىن مىندەتتى سالىقتاردى تولەۋگە جەتكىلىكتى ەڭ تومەنگى دەڭگەيگە دەيىن تومەندەتكەن. سونىمەن قاتار جولاۋشىلار مەن جۇرگىزۋشىلەر اراسىنداعى باعا بويىنشا كەلىسسوزدەرگە شەكتەۋ ەنگىزگەن.
ۆەدومستۆو قازاقستانداعى تاكسي قىزمەتتەرى نارىعىندا ءىرى سەرۆيستەردىڭ ۇلەسى باسىم ەكەنىن اتاپ ءوتتى. سوندىقتان باعانىڭ نەگىزسىز وسۋىنە جول بەرمەۋ جانە قىزمەتتىڭ حالىققا قولجەتىمدىلىگىن قامتاماسىز ەتۋ ماڭىزدى.
اگەنتتىك تۇسىندىرۋىنشە، قازاقستان زاڭناماسىنا سايكەس، كومپانيانىڭ ارەكەتى تۇتىنۋشىلاردىڭ قۇقىقتارىنا زيان كەلتىرگەن جاعدايدا، بۇل باسەكەلەستىك تۋرالى زاڭنامانى بۇزۋ بەلگىلەرىن قامتۋى مۇمكىن. وسىعان بايلانىستى inDrive سەرۆيسىنە زاڭ بۇزۋشىلىققا جول بەرمەۋ تۋرالى رەسمي الدىن الا ەسكەرتۋ جىبەرىلگەن.
ەسكە سالايىق، 8 قازاندا رەسەيدىڭ ريازان وبلىسىنداعى ساسوۆو قالاسىندا ورنالاسقان «ياندەكس» كومپانياسىنىڭ دەرەكتەر ورتالىعىنا دروندار شابۋىل جاساعان. سوققى سالدارىنان ءورت شىعىپ، ينفراقۇرىلىمنىڭ زاقىمدانعان. كەيىننەن قازاقستان اۋماعىندا ياندەكس تاكسي قىزمەتى جۇمىس ىستەۋىن توقتاتتى.
