جاڭا كونستيتۋتسيا جوباسىندا سىبايلاس جەمقورلىق قىلمىس جاساعانى ءۇشىن سوتتالعان ازاماتتاردىڭ دەپۋتاتتىققا جانە وزگە دە سايلانبالى لاۋازىمدارعا ۇمىتكەر بولۋىنا تىيىم سالاتىن نورما كوزدەلگەن، دەپ حابارلايدى "ادىرنا" ۇلتتىق پورتالى.
اتالعان تالاپ كونستيتۋتسيا جوباسىنىڭ «نەگىزگى قۇقىقتار، بوستاندىقتار جانە مىندەتتەر» بولىمىندە كورسەتىلگەن. قۇجاتتا سوتتالعاندىعى زاڭدا بەلگىلەنگەن تارتىپپەن جويىلماعان نەمەسە الىنباعان ازاماتتاردىڭ سايلانۋ قۇقىعى بولمايتىنى ناقتى جازىلعان.
«سوت ارەكەتكە قابىلەتسىز دەپ تانىعان قازاقستان رەسپۋبليكاسى ازاماتتارىنىڭ، سوتتالعاندىعى زاڭدا بەلگىلەنگەن تارتىپپەن جويىلماعان نەمەسە الىنباعان قازاقستان رەسپۋبليكاسى ازاماتتارىنىڭ، سونداي-اق سىبايلاس جەمقورلىق قىلمىس نەمەسە سىبايلاس جەمقورلىق قۇقىق بۇزۋشىلىق جاساۋعا قاتىستى كىناسىن سوت زاڭدا بەلگىلەنگەن تارتىپپەن تانىعان قازاقستان رەسپۋبليكاسى ازاماتتارىنىڭ سايلانۋعا قۇقىعى جوق»، – دەلىنگەن زاڭ جوباسىندا.
سونىمەن قاتار سوت ارەكەتكە قابىلەتسىز دەپ تانىلعان جانە سوت ۇكىمىمەن باس بوستاندىعىنان ايىرۋ جازاسىن وتەپ جاتقان ازاماتتاردىڭ سايلاۋعا دا، جالپىحالىقتىق رەفەرەندۋمدارعا دا قاتىسا المايتىنى اتاپ وتىلگەن.
