فوتو: Alina Smutko/Reuters
ۋكراينا پرەزيدەنتى ۆلاديمير زەلەنسكي رەسەي 60 كۇندىك اتىستى توقتاتۋعا كەلىسسە، ەلدە پرەزيدەنت سايلاۋىن وتكىزۋگە بولاتىنىن مالىمدەدى. بۇل تۋرالى ول 11 قازاندا، اقش-تىڭ ABC تەلەارناسىنداعى This Week باعدارلاماسىندا ايتتى، دەپ حابارلايدى “ادىرنا”.
«پۋتينگە جەتكىزىڭىزشى: بىزگە ەكى اي، ياعني تولىق 60 كۇنگە اتىستى توقتاتۋ رەجيمىن قامتاماسىز ەتسىن. 60 كۇن بەرسە، ءبىز سايلاۋ وتكىزەمىز»، – دەدى زەلەنسكي باعدارلاما جۇرگىزۋشىسى دجوناتان كارلمەن اڭگىمەسىندە.
سونداي-اق ول «پرەزيدەنت ترامپقا دەگەن قۇرمەتىمە قاراماستان»، ۋكراينانىڭ باسشىسىن تاڭداۋ قۇقىعى ەل ازاماتتارىنىڭ وزىندە بولۋى كەرەگىن اتاپ ءوتتى.
اقش پرەزيدەنتى دونالد ترامپ پەن امەريكالىق ميللياردەر يلون ماسكتىڭ زەلەنسكيدى سوعىستى جالعاستىرىپ وتىر دەپ ايىپتاۋىنا قاتىستى سۇراققا جاۋاپ بەرگەن ۋكراينا باسشىسى ۆاشينگتوننىڭ رەسەي پرەزيدەنتى ۆلاديمير ءپۋتيندى قالاي توقتاتۋعا بولاتىنىن ءالى دە تابا الماي وتىرعانىن ايتتى.
«ويتكەنى ءپۋتيندى توقتاتۋ باسقالارعا قىسىم جاساۋدان الدەقايدا قيىن. باعالار تۋرالى ايتىپ، ولاردى ۋكراينامەن بايلانىستىرۋ الدەقايدا وڭاي»، – دەپ قوستى ول.
زەلەنسكيدىڭ بۇل مالىمدەمەسى ترامپتىڭ 10 قازاندا ۋكرايناعا كەلىسىم جاساي الاتىن جاڭا پرەزيدەنت تابۋ قاجەت ەكەنىن ايتقانىنان ءبىر كۇن وتكەن سوڭ جاريالاندى.
«ول (زەلەنسكي — رەد.) كوپتەگەن كەلىسىمدەرگە قول جەتكىزە الار ەدى، بىراق قانداي دا ءبىر سەبەپپەن مۇنى ەشقاشان جاساعان ەمەس»، – دەگەن بولاتىن اقش باسشىسى.
سول كۇنى ترامپ زەلەنسكيدى اقش-تىڭ رەسەي مۇناي وڭدەۋ زاۋىتتارىنا ء(موز) جاسالاتىن سوققىلاردى توقتاتۋ تۋرالى وتىنىشتەرىن ەلەمەدى دەپ ايىپتادى. ونىڭ ايتۋىنشا، بۇل سوققىلار «جاھاندىق پروبلەماعا» اينالىپ وتىر.
«ول الەمگە قيىندىق تۋعىزعىسى كەلەدى. رەسەي ديزەل وتىنىنىڭ ەداۋىر بولىگىن الەمگە جەتكىزەتىندىكتەن، ول ءبىزدىڭ فەرمەرلەرىمىزگە دە ديزەل وتىنى ماسەلەسى ارقىلى قيىندىق تۋدىرعىسى كەلەدى. وعان وسى شابۋىلداردى توقتاتقان دۇرىس، قارعىس اتقىر!» – دەدى اق ءۇي باسشىسى.
زەلەنسكي ترامپتىڭ بۇل سوزدەرىنە 11 قازاندا جاۋاپ بەردى.
«بۇگىننىڭ وزىندە ەنەرگەتيكالىق نىساندارعا جاسالاتىن سوققىلاردى توقتاتۋعا مۇمكىندىك بار، بىراق پۋتين مۇنى قالامايدى. رەسەي ءبىزدىڭ ەنەرگەتيكالىق ينفراقۇرىلىمىمىزعا شابۋىل جاساۋدى توقتاتسا، ۋكراينا رەسەيدىڭ مۇناي وڭدەۋ زاۋىتتارىنا سوققى بەرۋدى توقتاتۋعا دايىن.
ەسكالاتسيانى باسەڭدەتۋگە باعىتتالعان كەز كەلگەن قادام ءوزارا سيپاتتا بولۋى جانە ناقتى كەپىلدىكتەرمەن قامتاماسىز ەتىلۋى كەرەك»، – دەپ اتاپ وتكەن ەدى ۋكراينا پرەزيدەنتى.
