پرەزيدەنت قاسىم-جومارت توقاەۆ رەسەي باسشىسى ۆلاديمير پۋتينمەن تەلەفون ارقىلى سويلەستى. بۇل تۋرالى بۇگىن، 30 جەلتوقساندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەتتەر باسشىلارى ەكىجاقتى ىقپالداستىقتىڭ قازىرگى جاي-كۇيىن تالقىلاپ، بيىل قازاقستان-رەسەي قارىم-قاتىناسى مازمۇندى ءارى ناتيجەلى بولعانىن اتاپ ءوتتى.
نەگىزگى جەتىستىكتەردىڭ ءبىرى رەتىندە ەكى ەلدىڭ بايلانىسى جان-جاقتى ستراتەگيالىق سەرىكتەستىك جانە وداقتاستىق دەڭگەيىنە جەتكەنىن ايتۋعا بولادى. بۇل مەملەكەتتەر اراسىنداعى ىنتىماقتاستىقتىڭ ماڭىزدى كەزەڭىنە اينالدى.
قازاقستان پرەزيدەنتى ۋكراينا قاقتىعىسىن رەتتەۋ بويىنشا كەلىسسوز پروتسەسىنىڭ ىلگەرىلەۋىن قۇپتاپ، ءوزارا بەرىك ۋاعدالاستىققا قول جەتكىزۋگە باعىتتالعان ساياسي-ديپلوماتيالىق تاسىلدەردى جالعاستىرۋ قاجەت ەكەنىنە توقتالدى.
سونىمەن قاتار قاسىم-جومارت توقاەۆ رەسەي فەدەراتسياسى پرەزيدەنتىنىڭ "مەملەكەتتىك رەزيدەنتسياسىنا شابۋىل جاساۋ" ارەكەتتەرىن ايىپتايتىنىن جەتكىزىپ، مۇنىڭ بىتىمگە كەلۋگە جانە قاقتىعىستىڭ ساياسي شەشىمىن ىزدەۋگە كەرى اسەر ەتەتىنىن ايتتى.
اڭگىمەلەسۋ سوڭىندا مەملەكەتتەر باسشىلارى ءبىر ءبىرىن كەلە جاتقان جاڭا جىلمەن قۇتتىقتاپ، قوس حالىققا باق-بەرەكە تىلەدى.
ەسكە سالايىق، بۇعان دەيىن رەسەي باسشىسىنىڭ كومەكشىسى يۋري ۋشاكوۆ ۋكراينانىڭ ۆلاديمير ءپۋتيننىڭ رەزيدەنتسياسىنا شابۋىل جاساعانىن مالىمدەگەن ەدى.
ونى ۋكراينا پرەزيدەنتى ۆلاديمير زەلەنسكي جوققا شىعارعان. كيەۆ ماسكەۋ بۇل ايىپتاۋلارعا ءالى دالەل كەلتىرمەدى دەپ سانايدى.
