تاشكەنتكە كولىك ساتىپ الۋعا بارعان قازاقستان ازاماتى مەترودا جوعالتىپ العان 10 مىڭ دوللارىن تولىق كولەمدە قايتارىپ الدى، دەپ حابارلايدى "ادىرنا" ۇلتتىق پورتالى.
تاشكەنت مەتروپوليتەنى ءباسپاسوز قىزمەتىنىڭ مالىمەتىنشە، جولاۋشىلاردىڭ ءبىرى ستانتسيالاردىڭ بىرىنەن شەتەل ۆاليۋتاسى سالىنعان پاكەتتى تاۋىپ، ونى مەترونىڭ قاۋىپسىزدىك قىزمەتكەرلەرىنە تاپسىرعان.
وزبەكستان ءىىم حابارلاۋىنشا، اقشانىڭ يەسىن انىقتاۋ ءۇشىن Face ID جۇيەسى قولدانىلعان. ناتيجەسىندە 10 مىڭ دوللار زاڭدى يەسىنە قايتارىلدى.
اقشانىڭ يەسى قاراجات جوعالعانىن اۆتونارىققا بارعان كەزدە عانا بايقاعان. ونىڭ ايتۋىنشا، ول «المازار» ستانتسياسىنان «سىرگەلى» باعىتىنا قاراي كەلە جاتقاندا سومكەسىنەن اقشا ءتۇسىپ قالعانىن بايقاماي قالعان.
قازاقستان ازاماتى اقشاسىن تاۋىپ، قايتارۋعا كومەكتەسكەن مەترو قىزمەتكەرلەرى مەن وزبەكستاننىڭ ىشكى ىستەر ورگاندارىنا العىس ءبىلدىردى.
