فوتو: Privat
رەسەيدىڭ سۇراۋى بويىنشا استانادا ۇستالعان ۋكراينا ازاماتى ليۋبوۆ روجانسكايا قازاقستاننان شىعىپ، ەۋروپالىق وداق ەلدەرىنىڭ بىرىنە بارعان. بۇل تۋرالى DW باسىلىمىنا ونىڭ ادۆوكاتى الەكسەي پريانيشنيكوۆ حابارلاعان، دەپ جازادى "ادىرنا".
روجانسكايا 2026 جىلعى 1 قازاندا استانادا رەسەيدىڭ بالا ۇرلاۋ تۋرالى كۇدىگىنە بايلانىستى ۇستالعان. ادۆوكاتتىڭ ايتۋىنشا، سوت ءۇش كۇن ىشىندە وعان قاتىستى بۇلتارتپاۋ شاراسىن تاڭداۋى كەرەك بولعان. الايدا مۇنداي شەشىم قابىلدانباعاندىقتان، ايەل تەرگەۋ يزولياتورىنان بوساتىلىپ، كەيىن قازاقستاننان كەتكەن.
ونى بوساتۋعا ۋكراينا سىرتقى ىستەر مينيسترلىگى مەن ەلدىڭ ومبۋدسمەنى دميتري لۋبينەتس كۇش سالعان. بۇعان دەيىن ادۆوكات قازاقستان تاراپى ۋكراينامەن روجانسكايانىڭ تاعدىرىنا قاتىستى سىندارلى ديالوگ جۇرگىزىپ جاتقانىن ايتقان. الايدا رەسەيدىڭ ۇجىمدىق قاۋىپسىزدىك تۋرالى شارت ۇيىمى (ۇقشۇ) ارقىلى جولداعان ەكستراديتسيالاۋ تۋرالى سۇراۋى كەرى قايتارىلماعان.
DW مالىمەتىنشە، ليۋبوۆ روجانسكايا 1 قازاندا نەمەرەسىن ۋكرايناعا قايتارۋ ءۇشىن استاناعا كەلگەن. بالا 2021 جىلى اناسىمەن بىرگە رەسەيدىڭ كالينينگراد وبلىسىنا كەتكەن.
بالانىڭ اناسى اللا اندرەەۆا بۇرىن ودەسسادا وتباسىمەن تۇرعان. 2020 جىلى ءبىرىنشى كۇيەۋىمەن اجىراسقاننان كەيىن رەسەيلىك تەڭىزشى ۆيتالي اندرەەۆكە تۇرمىسقا شىققان. ءبىر جىلدان سوڭ ۇلىمەن بىرگە رەسەيگە بارىپ، سول جاقتا قالعان. كەيىن بالاسى ەكەۋى رەسەي ازاماتتىعىن العان.
ۋكرايناداعى سوت پروتسەستەرىنىڭ ناتيجەسىندە بالانىڭ تۇرعىلىقتى جەرى اكەسى تۇراتىن ودەسسا قالاسى بولىپ بەلگىلەنگەن. NV.ua باسىلىمىنىڭ حابارلاۋىنشا، بالانىڭ اكەسى ۋكراينانىڭ قورعانىس كۇشتەرىندە قىزمەت ەتەدى.
ادۆوكاتتىڭ سوزىنشە، بالانىڭ ۋكراينالىق تۋىستارى بىرنەشە جىلدان بەرى ونى ەلگە قايتارۋعا ارەكەتتەنگەن. 2023 جىلى روجانسكايانىڭ تاپسىرماسىمەن كالينينگراد وبلىسىنا بارعان ەكى ۋكراينالىق ازامات ۇستالىپ، 2025 جىلدىڭ قازانىندا 15 جانە 16 جىلعا باس بوستاندىعىنان ايىرىلعان. ولارعا شەكارانى زاڭسىز كەسىپ ءوتۋ، تىڭشىلىق جانە ادام ۇرلاۋعا وقتالۋ ايىپتارى تاعىلعان.
روجانسكايانىڭ ادۆوكاتتارى ايەل رەسەيدە وزىنە قاتىستى قىلمىستىق ىستەر قوزعالعانىن بىلمەگەنىن ايتادى. الەكسەي پريانيشنيكوۆتىڭ مالىمەتىنشە، بالا ۇرلاۋ تۋرالى ءىس 2025 جىلى قوزعالعان. بۇل تۋرالى روجانسكايا 2026 جىلدىڭ قازانىندا قازاقستاننان ەكستراديتسيالاۋعا قاتىستى قۇجاتتارمەن تانىسقاندا عانا بىلگەن. سونىمەن قاتار وعان قاتىستى زاڭسىز كوشى-قوندى ۇيىمداستىرۋ تۋرالى تاعى ءبىر ءىس بولعانى انىقتالعان.
ادۆوكات بۇل ءىستىڭ ساياسي استارى بار دەپ ەسەپتەپ، روجانسكايانىڭ استانادا ۇستالۋىن رەسەيدىڭ فەدەرالدىق قاۋىپسىزدىك قىزمەتى ۇيىمداستىرعان ارانداتۋ دەپ باعالاعان. الايدا بۇل – قورعاۋشىنىڭ پىكىرى.
ۋكراينانىڭ قازاقستانداعى ەلشىسى ۆيكتور مايكو روجانسكايا نەمەرەسىنىڭ اكەسى، ياعني ۇلىنىڭ رەسمي تاپسىرماسى نەگىزىندە ارەكەت ەتكەنىن مالىمدەگەن.
ال ۋكراينا ومبۋدسمەنى دميتري لۋبينەتس قازاقستانداعى ارىپتەسى ارتۋر لاستاەۆقا ۇندەۋ جولداپ، ايەلدى رەسەيگە ەكستراديتسيالاۋعا جول بەرمەۋگە شاقىرعان. ونىڭ پىكىرىنشە، روجانسكايانى رەسەيدىڭ كۇشتىك قۇرىلىمدارىنا بەرۋ جەكە قاۋىپسىزدىگىنە جانە نەگىزگى قۇقىقتارىنىڭ ساقتالۋىنا قاتەر ءتوندىرۋى مۇمكىن.
لۋبينەتس سونىمەن قاتار روجانسكايانىڭ استاناعا ۇشار الدىندا العانى ايتىلعان بەينەجازبانى جاريالاعان. كادرلاردا ونىڭ نەمەرەسى كالينينگراد اۋەجايىندا چەمودان ۇستاپ، بالانىڭ وگەي اكەسىمەن بىرگە جۇرگەنى كورىنەدى. ادۆوكاتتىڭ پايىمداۋىنشا، بۇل ۆيدەو ايەلدى قازاقستانعا كەلۋگە كوندىرۋ ءۇشىن پايدالانىلعان بولۋى مۇمكىن.
DW 7 قازاندا قازاقستاننىڭ سىرتقى ىستەر مينيسترلىگىنە روجانسكايانىڭ ۇستالۋىنا قاتىستى ساۋال جولداعان. الايدا ماتەريال جاريالانعانعا دەيىن رەداكتسيا رەسمي جاۋاپ الماعان.
قازىرگى ۋاقىتتا ليۋبوۆ روجانسكايا ەۋروپالىق وداق ەلدەرىنىڭ بىرىندە ءجۇر. رەسەيدىڭ ەكستراديتسيالاۋ تۋرالى سۇراۋىنىڭ كەيىنگى تاعدىرى جونىندە جاريالانىمدا ناقتى اقپارات بەرىلمەگەن.
