فوتو: اقوردا
قازاقستان پرەزيدەنتى قاسىم-جومارت توقاەۆ ورتالىق ازياداعى سۋ قاۋىپسىزدىگىن قامتاماسىز ەتۋ ءۇشىن ترانسشەكارالىق سۋ رەسۋرستارىن باسقارۋدىڭ جاڭا تەتىكتەرىن ازىرلەۋ قاجەت ەكەنىن ايتتى، دەپ حابارلايدى "ادىرنا".
بۇل ماسەلەنى مەملەكەت باسشىسى تۇرىكمەنستاندا وتكەن ورتالىق ازيا جانە ازەربايجان مەملەكەتتەرى باسشىلارىنىڭ VIII كونسۋلتاتيۆتىك كەزدەسۋىندە كوتەردى.
پرەزيدەنتتىڭ ايتۋىنشا، سۋ پروبلەماسى – ورتالىق ازيانىڭ تۇراقتىلىعىنا قاۋىپ توندىرەتىن باستى سىن-قاتەرلەردىڭ ءبىرى. سوندىقتان ايماقتاعى مەملەكەتتەر سۋ رەسۋرستارىن باسقارۋدا ءوزارا قۇرمەت پەن تەڭقۇقىلىق قاعيداتتارىن باسشىلىققا الىپ، بارلىق ەلدىڭ مۇددەسىن ەسكەرۋى كەرەك.
پرەزيدەنت قاسىم-جومارت توقاەۆ ورتالىق ازيانىڭ سۋ پايدالانۋ جونىندەگى نەگىزدەمەلىك كونۆەنتسياسىن قابىلداۋدى ۇسىندى. ونىڭ پىكىرىنشە، بۇل قۇجات وڭىرلىك ىنتىماقتاستىقتىڭ جاڭا جۇيەسىن قالىپتاستىرۋعا جول اشادى. كونۆەنتسيا جوباسى تاراپتاردىڭ قاراۋىنا ۇسىنىلعان. سونداي-اق بۇۇ اياسىندا حالىقارالىق سۋ ۇيىمىن قۇرۋ باستاماسىنىڭ وزەكتىلىگىن اتاپ ءوتتى. قازاقستان پرەزيدەنتى بۇل باستامانى ورتالىق ازيا ەلدەرىنىڭ ورتاق ۇستانىمى رەتىندە حالىقارالىق دەڭگەيدە ىلگەرىلەتۋدىڭ ماڭىزىن ايتتى.
كەزدەسۋدە بۇدان بولەك، كولىك-لوگيستيكا سالاسىنداعى ىنتىماقتاستىق ماسەلەلەرى دە تالقىلاندى. دۇنيەجۇزىلىك بانكتىڭ باعالاۋىنشا، ينفراقۇرىلىمدىق جوبالار تولىق ىسكە اسسا، 2040 جىلعا قاراي كاسپي تەڭىزى ارقىلى جۇك تاسىمالى ءتورت ەسە ارتۋى مۇمكىن.
