رەسەي قازاقستاننىڭ سولتۇستىك جانە سولتۇستىك-شىعىس وڭىرلەرىن گازداندىرۋ ءۇشىن جاڭا ماگيسترالدىق گاز قۇبىرىن سالاتىن بولدى، دەپ حابارلايدى "ادىرنا" ۇلتتىق پورتالى تاسس-قا سىلتەپ.
رەسەي فەدەراتسياسىنىڭ ۇكىمەتى گاز قۇبىرىن ەلدىڭ اۋماقتىق جوسپارلاۋ سحەماسىنا ەنگىزدى. جاڭا قۇبىر تيۋمەن وبلىسىنىڭ ەلدى مەكەندەرى ارقىلى ءوتىپ، قازاقستانعا گاز جەتكىزەدى. جوسپارعا سايكەس، قۇبىردىڭ جالپى قۋاتى جىلىنا 10 ميلليارد تەكشە مەتر گازدى قۇرايدى، ال كومپرەسسورلىق ستانتسيالاردىڭ قۋاتى 50 مۆت بولادى.
2024 جىلدىڭ جەلتوقسان ايىنىڭ سوڭىندا رەسەي ۆيتسە-پرەمەرى الەكساندر نوۆاك رەسەيدەن قازاقستان ارقىلى قىتايعا ماگيسترالدىق گاز قۇبىرىن سالۋ جوباسى ىسكە قوسىلعانىن مالىمدەدى. بۇل قۇبىردىڭ جىلدىق قۋاتتىلىعى 45 ميلليارد تەكشە مەتردى قۇرايدى. ونىڭ 10 ميلليارد تەكشە مەترى قازاقستاندى گازبەن قامتۋعا جۇمسالسا، قالعان 35 ميلليارد تەكشە مەترى قىتايعا ەكسپورتتالادى دەپ جوسپارلانعان.
ۆلاديمير پۋتين قازاقستانعا مەملەكەتتىك ساپارى كەزىندە بۇل جوبانىڭ ەكى ەل ءۇشىن دە ءتيىمدى ەكەنىن اتاپ ءوتتى. ول سونداي-اق قازاقستان ارقىلى وزبەكستانعا گاز جەتكىزۋ كولەمىن ارتتىرۋ جوسپارلارى بار ەكەنىن جەتكىزدى.
2022 جىلى رەسەيدىڭ ۋكرايناعا قارسى اسكەري ارەكەتتەرىنەن كەيىن گازپروم ەۋروپا نارىعىنداعى شىعىندارىن وتەۋ ماقساتىندا ازياعا، ونىڭ ىشىندە قىتايعا گاز جەتكىزۋدى ۇلعايتۋعا ءماجبۇر بولدى. دەگەنمەن، قىتاي تاراپىنان سۇرانىستىڭ ارتۋىنا قاراماستان، رەسەيلىك گازدىڭ ەۋروپاداعى شىعىندارى ءالى دە تولىق وتەلمەگەن.
