بۇگىن، 7 قازاندا سەمەي قالاسىندا كورنەكتى جازۋشى، ابايتانۋشى، الاشتانۋشى عالىم، فيلولوگيا عىلىمدارىنىڭ دوكتورى، پروفەسسور، قازاقستاننىڭ ەڭبەك سىڭىرگەن قايراتكەرى تۇرسىن جۇرتبايدىڭ 75 جاسقا تولعان مەرەيتويىنا ارنالعان حالىقارالىق عىلىمي-تانىمدىق كونفەرەنتسيا ۇيىمداستىرىلدى. بۇل تۋرالى اباي وبلىسى اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قازاق ادەبيەتىندەگى كوركەم ويلاۋ جۇيەسى جانە تۇرسىن جۇرتبايدىڭ شىعارماشىلىق دارالىعى» تاقىرىبىنداعى جيىن اباي وبلىسى اكىمدىگىنىڭ قولداۋىمەن، عىلىم جانە جوعارى ءبىلىم مينيسترلىگى مەن شاكارىم ۋنيۆەرسيتەتىنىڭ ۇيىمداستىرۋىمەن ءوتتى. كونفەرەنتسياعا قازاقستان، تۇركيا جانە وزبەكستاننان كەلگەن ادەبيەتتانۋشىلار، تاريحشىلار، ابايتانۋشىلار، الاشتانۋشىلار جانە جاس زەرتتەۋشىلەر قاتىستى.
پلەنارلىق وتىرىستا ءسوز سويلەگەن اباي وبلىسىنىڭ اكىمى بەرىك ءۋالي تۇرسىن جۇرتبايدىڭ قازاق عىلىمى مەن ۇلتتىق رۋحانياتقا سىڭىرگەن ەڭبەگىن ەرەكشە اتاپ ءوتتى. ونىڭ ايتۋىنشا، عالىم كەڭەس داۋىرىندە زەرتتەۋگە تىيىم سالىنعان الاش تاريحىن عىلىمي اينالىمعا ەنگىزىپ، الاشتانۋ عىلىمىنىڭ قالىپتاسۋىنا زور ۇلەس قوسقان.
كونفەرەنتسيا بارىسىندا تۇرسىن جۇرتبايدىڭ ادەبيەتتانۋ، ابايتانۋ، الاشتانۋ جانە اۋەزوۆتانۋ سالالارىنداعى عىلىمي مۇراسى، شىعارماشىلىق ەرەكشەلىگى مەن كوركەمدىك ىزدەنىستەرى جان-جاقتى تالقىلاندى. جيىندا قازاقستان، تۇركيا جانە وزبەكستاننىڭ بەلگىلى عالىمدارى بايانداما جاساپ، جازۋشى ەڭبەكتەرىنىڭ عىلىمي ماڭىزىنا توقتالدى.
مەرەيتوي يەسى تۇرسىن جۇرتباي كونفەرەنتسيانى ۇيىمداستىرۋشىلار مەن قاتىسۋشىلارعا العىسىن ءبىلدىردى. ول بۇگىنگە دەيىن ءوزىنىڭ 134 كىتابى جارىق كورگەنىن ايتىپ، ەڭبەكتەرىنىڭ جاستار ءۇشىن دە قۇندى رۋحاني مۇرا بولارىنا سەنىم ءبىلدىردى.
ءىس-شارا اياسىندا قالامگەردىڭ «ۇلت اقىنى. ماعجان جۇمابايدىڭ شىعارماشىلىق ءومىربايانى» جانە «ولگەندەرمەن ءومىر سۇرەمىن» اتتى جاڭا كىتاپتارىنىڭ تۇساۋكەسەرى ءوتتى. سونىمەن قاتار، شاكارىم ۋنيۆەرسيتەتىنىڭ بەس ستۋدەنتىنە تۇرسىن جۇرتباي اتىنداعى ارنايى ستيپەنديا تاعايىندالىپ، سەرتيفيكاتتار تابىستالدى.
مەرەيتوي اياسىنداعى مادەني شارالار جالعاسىپ، سەمەيدە «تۇرسىن جۇرتباي الەمى» كورمەسى ۇيىمداستىرىلدى. سونداي-اق اباي مۋزەيىندە «الاشتىڭ الىپ تۇلعاسى» اتتى ادەبي كەش وتەدى.
