جەتىسۋ وبلىسى اقسۋ اۋدانىنىڭ تۇرعىندارى ءۇشىن ساپالى مەديتسينالىق كومەك الۋ مۇمكىندىگى كەڭەيىپ، قولجەتىمدى بولا ءتۇستى. ەندى كوپتەگەن تەكسەرۋ مەن ەمدەۋ ءتۇرىن اۋدان اۋماعىندا ساپالى الۋعا مۇمكىندىك. رەسپۋبليكا كۇنى قارساڭىندا جانسۇگىروۆ اۋىلىندا سەيسميكالىق كۇشەيتۋ جاسالىپ، كۇردەلى جوندەۋدەن وتكەن ورتالىق اۋداندىق اۋرۋحانا ىسكە قوسىلدى. جالپى، سوڭعى ءتورت جىلدا اۋدانداعى مەديتسينالىق ينفراقۇرىلىمنىڭ شامامەن 40% جاڭارتىلدى. وسى ۋاقىت ارالىعىندا 14 اۋىلدىق وكرۋگتە جاڭا دارىگەرلىك امبۋلاتوريالار، فەلدشەرلىك-اكۋشەرلىك جانە مەديتسينالىق پۋنكتتەر بوي كوتەردى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اۋرۋحانا عيماراتى 1974 جىلى سالىنعان. جوندەۋ جۇمىستارى جۇرگىزىلگەن كەزەڭدە مەديتسينالىق قىزمەتتەر بەيىمدەلگەن عيماراتتا كورسەتىلدى. بۇعان دەيىن تەك اعىمداعى جوندەۋ جۇمىستارى جۇرگىزىلىپ كەلگەن اۋرۋحانا عيماراتى 52 جىلدان كەيىن العاش رەت كۇردەلى جوندەۋدەن ءوتتى. بالالار، تەراپيا، حيرۋرگيا، رەانيماتسيا جانە بوساندىرۋ بولىمدەرى، قابىلداۋ ءبولىمى، بالالاردىڭ كونسۋلتاتيۆتىك-دياگنوستيكالىق ءبولىمى، اسحانا تولىق جاڭارتىلىپ، عيمارات تولىقتاي رەتتەلدى. ينجەنەرلىك جەلىلەر دە جاڭارتىلىپ، تالاپقا ساي جاعدايعا كەلتىرىلدى. وسىلايشا، دەنساۋلىق ساقتاۋ نىسانى زاماناۋي كەيىپكە ەنىپ، پاتسيەنتتەر مەن دارىگەرلەر ءۇشىن قولايلى جاعداي جاسالدى.
مەكەمەدە كادر ماسەلەسىنە دە ەرەكشە كوڭىل بولىنگەن.
– 2024 جىلدان بەرى اۋرۋحاناعا 17 جاس مامان جۇمىسقا كەلدى. ونىڭ بەسەۋى بيىل قىزمەتكە ورنالاستى. سونىڭ ەكەۋى مەملەكەت تاراپىنان قاراستىرىلعان قولداۋ شارالارىن الىپ ۇلگەردى. تاعى ءۇش مامان كوتەرمە جاردەماقى الۋدى كۇتىپ وتىر. وبلىس اكىمىنىڭ قولداۋىمەن اۋىلدىق جەرلەرگە جۇمىسقا كەلگەن دارىگەرلەرگە 10 ملن تەڭگەدەن مەملەكەتتىك قولداۋ كورسەتىلەدى. اۋىلداعى دەنساۋلىق ساقتاۋ سالاسىنا وسىنداي ماڭىزدى قولداۋ كورسەتىلىپ وتىرعانى ءۇشىن ريزاشىلىعىمىزدى بىلدىرەمىز، – دەدى اقسۋ اۋداندىق ورتالىق اۋرۋحاناسىنىڭ ديرەكتورى بايقادام قۇرىمباي.
قازىرگى تاڭدا اقسۋ اۋدانىندا 56 دارىگەر، 310 ورتا بۋىن مەديتسينا قىزمەتكەرى جۇمىس ىستەيدى. جىل باسىنان بەرى اۋدانعا 5 دارىگەر جۇمىسقا قابىلداندى. ولار – حيرۋرگ، وتورينولارينگولوگ، رەابيليتولوگ جانە 2 جالپى تاجىريبەلىك دارىگەر.
جاڭعىرتۋ جۇمىستارىنىڭ ناتيجەسىندە مەديتسينالىق قۇرال-جابدىقتار دا جاڭارتىلدى. اۋرۋحانادا زاماناۋي وپەراتسيالىق بلوك جۇمىس ىستەيدى. وكپەنى جاساندى جەلدەتۋ اپپاراتتارى، فگدس جۇرگىزۋگە، فليۋوروگرافيالىق جانە رەنتگەنولوگيالىق زەرتتەۋلەر جاساۋعا ارنالعان جابدىقتار ساتىپ الىندى. اۋىر جاعدايداعى پاتسيەنتتەر ءۇشىن كوپفۋنكتسيونالدى توسەكتەر بار. بۇل زاماناۋي حيرۋرگيالىق جانە تراۆماتولوگيالىق وپەراتسيالار جاساۋعا، سونداي-اق پاتسيەنتتەردى دياگنوستيكالاۋ مەن ەمدەۋگە جاعداي جاساپ وتىر. ونكولوگيالىق قىزمەتتى دامىتۋ اياسىندا دا قوسىمشا قۇرال-جابدىقتار جەتكىزىلدى. اۋرۋحاناعا تسيفرلىق مامموگراف جانە جىلجىمالى فليۋوروگرافيالىق اپپارات ورناتىلدى.
دارىگەرلەر اۋرۋحانانىڭ جاڭارۋىن تەك عيماراتتىڭ جاڭا كەيىپكە ەنۋى عانا ەمەس، دياگنوستيكا مەن ەمدەۋ مۇمكىندىكتەرىنىڭ كەڭەيۋى دەپ ەسەپتەيدى.
ءبىرىنشى ساناتتاعى پەدياتر دارىگەر، ترانسفۋزيولوگ اسەل جولداسوۆانىڭ ايتۋىنشا، بۇگىندە اۋىلدىق دەنساۋلىق ساقتاۋدى دامىتۋعا مەملەكەت تاراپىنان ايرىقشا قولداۋ كورسەتىلىپ كەلەدى.
– اۋىل تۇرعىندارىنىڭ دەنساۋلىعىنا جانە اۋداندىق اۋرۋحانالاردى دامىتۋعا قانشالىقتى كوڭىل ءبولىنىپ وتىرعانىن كورىپ وتىرمىز. سونىڭ ارقاسىندا ءبىزدىڭ اۋداندىق ورتالىق اۋرۋحانامىز كۇردەلى جوندەۋدەن ءوتتى. بۇل بۇكىل ۇجىم ءۇشىن ۇلكەن قۋانىش ءارى زور جاۋاپكەرشىلىك. ەندىگى باستى مىندەتىمىز – اۋىل تۇرعىندارىنا مەديتسينالىق كومەكتى جوعارى دەڭگەيدە كورسەتۋ. الداعى ۋاقىتتا وڭالتۋ، پەدياتريالىق قىزمەت، جەدەل جانە حيرۋرگيالىق كومەكتى ودان ءارى دامىتۋدى جوسپارلاپ وتىرمىز. قازىردىڭ وزىندە اۋرۋحانادا ەندوسكوپيالىق ەمدەۋ ادىستەرى، ترانسفۋزيولوگيالىق جانە وڭالتۋ كومەگى كورسەتىلەدى. مۇنىڭ ءبارى تۇرعىندارىمىزدىڭ دەنساۋلىعى ءۇشىن جاسالىپ وتىر، – دەدى دارىگەر.
حيرۋرگ دارىگەر اقىلبەك كوشكىنوۆ تە جاڭا تەحنيكالىق جابدىقتاردىڭ مەديتسينالىق قىزمەتكەرلەردىڭ مۇمكىندىگىن ەداۋىر كەڭەيتكەنىن ايتادى.
– قازىر بىزدە جاڭا قۇرال-جابدىقتار بار، زاماناۋي حيرۋرگيالىق جانە تراۆماتولوگيالىق وپەراتسيالار جاساۋعا جاعداي جاسالدى. دارىگەر ءۇشىن دياگنوز قويىپ قانا قويماي، پاتسيەنتكە قاجەتتى كومەكتى دەر كەزىندە كورسەتە العانى ماڭىزدى. ەندى مۇنداي مۇمكىندىكتەرىمىز ارتىپ وتىر، – دەدى ول.
– بۇگىن ءبىز ءۇشىن شىنىمەن دە ماڭىزدى كۇن. اۋرۋحانانىڭ جوندەۋ جۇمىستارىنا قولداۋ كورسەتىپ، وسىنداي جاعداي جاساۋعا اتسالىسقان بارشا ازاماتقا العىسىمىزدى بىلدىرەمىز. ەندى جاڭارعان عيماراتتا تۇرعىندار ءۇشىن بۇدان دا ۇلكەن جاۋاپكەرشىلىكپەن ەڭبەك ەتۋگە دايىنبىز، – دەدى حيرۋرگيا بولىمشەسىنىڭ اعا مەيىرگەرى راۋشان قازيەۆا.
اۋرۋحانانىڭ اشىلۋ سالتاناتىنا اۋدان تۇرعىندارى دا قاتىستى. اۋىل تۇرعىندارى زاماناۋي اۋرۋحانانىڭ ەڭ الدىمەن قاجەتتى تەكسەرۋ مەن ەمدى تۇرعىلىقتى جەرىنە جاقىن ماڭدا الۋعا جاسالعان مۇمكىندىك دەپ بىلەدى.
اۋدان تۇرعىنى ايگۇل كۋكۋزوۆانىڭ ايتۋىنشا، بۇعان دەيىن كەيبىر تەكسەرۋ مەن ەم الۋ ءۇشىن وبلىس ورتالىعىنا بارۋعا تۋرا كەلگەن. بۇل جول شىعىندارىن، ۋاقىت شىعىنداۋدى قاجەت ەتەتىن، وعان قوسا اسىرەسە قارت ادامدار مەن بالالى وتباسىلار ءۇشىن قوسىمشا قولايسىزدىقتار تۋعىزاتىن.
– ءبىز بۇل كۇندى كوپتەن كۇتتىك. اۋرۋحانادا جاقسى جاعداي جاسالىپ، جاڭا قۇرال-جابدىقتار ورناتىلعان، قىزمەتكەرلەرى دە مۇقيات. باستى بايلىق دەنساۋلىققا لايىقتى كوڭىل بولىنگەنى قۋانتادى. ەندى ءوز اۋدانىمىزدا ساپالى مەديتسينالىق كومەكتى جەدەل الۋعا مۇمكىندىگىمىز بار، – دەدى ول.
