Jetısu oblysy Aqsu audanynyŋ tūrǧyndary üşın sapaly medisinalyq kömek alu mümkındıgı keŋeiıp, qoljetımdı bola tüstı. Endı köptegen tekseru men emdeu türın audan aumaǧynda sapaly aluǧa mümkındık. Respublika künı qarsaŋynda Jansügırov auylynda seismikalyq küşeitu jasalyp, kürdelı jöndeuden ötken ortalyq audandyq auruhana ıske qosyldy. Jalpy, soŋǧy tört jylda audandaǧy medisinalyq infraqūrylymnyŋ şamamen 40% jaŋartyldy. Osy uaqyt aralyǧynda 14 auyldyq okrugte jaŋa därıgerlık ambulatoriialar, feldşerlık-akuşerlık jäne medisinalyq punktter boi köterdı, – dep habarlaidy Jetısu oblysy äkımınıŋ baspasöz qyzmetı.
Auruhana ǧimaraty 1974 jyly salynǧan. Jöndeu jūmystary jürgızılgen kezeŋde medisinalyq qyzmetter beiımdelgen ǧimaratta körsetıldı. Būǧan deiın tek aǧymdaǧy jöndeu jūmystary jürgızılıp kelgen auruhana ǧimaraty 52 jyldan keiın alǧaş ret kürdelı jöndeuden öttı. Balalar, terapiia, hirurgiia, reanimasiia jäne bosandyru bölımderı, qabyldau bölımı, balalardyŋ konsultativtık-diagnostikalyq bölımı, ashana tolyq jaŋartylyp, ǧimarat tolyqtai retteldı. İnjenerlık jelıler de jaŋartylyp, talapqa sai jaǧdaiǧa keltırıldı. Osylaişa, densaulyq saqtau nysany zamanaui keiıpke enıp, pasientter men därıgerler üşın qolaily jaǧdai jasaldy.
Mekemede kadr mäselesıne de erekşe köŋıl bölıngen.
– 2024 jyldan berı auruhanaǧa 17 jas maman jūmysqa keldı. Onyŋ beseuı biyl qyzmetke ornalasty. Sonyŋ ekeuı memleket tarapynan qarastyrylǧan qoldau şaralaryn alyp ülgerdı. Taǧy üş maman köterme järdemaqy aludy kütıp otyr. Oblys äkımınıŋ qoldauymen auyldyq jerlerge jūmysqa kelgen därıgerlerge 10 mln teŋgeden memlekettık qoldau körsetıledı. Auyldaǧy densaulyq saqtau salasyna osyndai maŋyzdy qoldau körsetılıp otyrǧany üşın rizaşylyǧymyzdy bıldıremız, – dedı Aqsu audandyq ortalyq auruhanasynyŋ direktory Baiqadam Qūrymbai.
Qazırgı taŋda Aqsu audanynda 56 därıger, 310 orta buyn medisina qyzmetkerı jūmys ısteidı. Jyl basynan berı audanǧa 5 därıger jūmysqa qabyldandy. Olar – hirurg, otorinolaringolog, reabilitolog jäne 2 jalpy täjıribelık därıger.
Jaŋǧyrtu jūmystarynyŋ nätijesınde medisinalyq qūral-jabdyqtar da jaŋartyldy. Auruhanada zamanaui operasiialyq blok jūmys ısteidı. Ökpenı jasandy jeldetu apparattary, FGDS jürgızuge, fliuorografiialyq jäne rentgenologiialyq zertteuler jasauǧa arnalǧan jabdyqtar satyp alyndy. Auyr jaǧdaidaǧy pasientter üşın köpfunksionaldy tösekter bar. Būl zamanaui hirurgiialyq jäne travmatologiialyq operasiialar jasauǧa, sondai-aq pasientterdı diagnostikalau men emdeuge jaǧdai jasap otyr. Onkologiialyq qyzmettı damytu aiasynda da qosymşa qūral-jabdyqtar jetkızıldı. Auruhanaǧa sifrlyq mammograf jäne jyljymaly fliuorografiialyq apparat ornatyldy.
Därıgerler auruhananyŋ jaŋaruyn tek ǧimarattyŋ jaŋa keiıpke enuı ǧana emes, diagnostika men emdeu mümkındıkterınıŋ keŋeiuı dep esepteidı.
Bırınşı sanattaǧy pediatr därıger, transfuziolog Äsel Joldasovanyŋ aituynşa, bügınde auyldyq densaulyq saqtaudy damytuǧa memleket tarapynan airyqşa qoldau körsetılıp keledı.
– Auyl tūrǧyndarynyŋ densaulyǧyna jäne audandyq auruhanalardy damytuǧa qanşalyqty köŋıl bölınıp otyrǧanyn körıp otyrmyz. Sonyŋ arqasynda bızdıŋ audandyq ortalyq auruhanamyz kürdelı jöndeuden öttı. Būl bükıl ūjym üşın ülken quanyş ärı zor jauapkerşılık. Endıgı basty mındetımız – auyl tūrǧyndaryna medisinalyq kömektı joǧary deŋgeide körsetu. Aldaǧy uaqytta oŋaltu, pediatriialyq qyzmet, jedel jäne hirurgiialyq kömektı odan ärı damytudy josparlap otyrmyz. Qazırdıŋ özınde auruhanada endoskopiialyq emdeu ädısterı, transfuziologiialyq jäne oŋaltu kömegı körsetıledı. Mūnyŋ bärı tūrǧyndarymyzdyŋ densaulyǧy üşın jasalyp otyr, – dedı därıger.
Hirurg därıger Aqylbek Köşkınov te jaŋa tehnikalyq jabdyqtardyŋ medisinalyq qyzmetkerlerdıŋ mümkındıgın edäuır keŋeitkenın aitady.
– Qazır bızde jaŋa qūral-jabdyqtar bar, zamanaui hirurgiialyq jäne travmatologiialyq operasiialar jasauǧa jaǧdai jasaldy. Därıger üşın diagnoz qoiyp qana qoimai, pasientke qajettı kömektı der kezınde körsete alǧany maŋyzdy. Endı mūndai mümkındıkterımız artyp otyr, – dedı ol.
– Bügın bız üşın şynymen de maŋyzdy kün. Auruhananyŋ jöndeu jūmystaryna qoldau körsetıp, osyndai jaǧdai jasauǧa atsalysqan barşa azamatqa alǧysymyzdy bıldıremız. Endı jaŋarǧan ǧimaratta tūrǧyndar üşın būdan da ülken jauapkerşılıkpen eŋbek etuge daiynbyz, – dedı hirurgiia bölımşesınıŋ aǧa meiırgerı Rauşan Qazieva.
Auruhananyŋ aşylu saltanatyna audan tūrǧyndary da qatysty. Auyl tūrǧyndary zamanaui auruhananyŋ eŋ aldymen qajettı tekseru men emdı tūrǧylyqty jerıne jaqyn maŋda aluǧa jasalǧan mümkındık dep bıledı.
Audan tūrǧyny Aigül Kukuzovanyŋ aituynşa, būǧan deiın keibır tekseru men em alu üşın oblys ortalyǧyna baruǧa tura kelgen. Būl jol şyǧyndaryn, uaqyt şyǧyndaudy qajet etetın, oǧan qosa äsırese qart adamdar men balaly otbasylar üşın qosymşa qolaisyzdyqtar tuǧyzatyn.
– Bız būl kündı köpten küttık. Auruhanada jaqsy jaǧdai jasalyp, jaŋa qūral-jabdyqtar ornatylǧan, qyzmetkerlerı de mūqiiat. Basty bailyq densaulyqqa laiyqty köŋıl bölıngenı quantady. Endı öz audanymyzda sapaly medisinalyq kömektı jedel aluǧa mümkındıgımız bar, – dedı ol.
