ومان قازاقستانمەن بىرنەشە سالادا اۋقىمدى ينۆەستيتسيالىق جوبالاردى جۇزەگە اسىرۋعا مۇددەلى، دەپ حابارلايدى “ادىرنا”.
بۇل تۋرالى ومان سۇلتانى حايسام بەن تاريق ءال سايد استاناداعى تاۋەلسىزدىك سارايىندا پرەزيدەنت قاسىم-جومارت توقاەۆپەن كەڭەيتىلگەن قۇرامدا وتكەن كەلىسسوز بارىسىندا ايتتى.
ومان سۇلتانى ەكى ەل اراسىنداعى ديپلوماتيالىق قاتىناستار 1992 جىلى ورناعاننان بەرى قازاقستان مەن ومان اراسىندا دوستىق پەن ءوزارا سىيلاستىققا نەگىزدەلگەن بەرىك بايلانىس قالىپتاسقانىن اتاپ ءوتتى.
حايسام بەن تاريق ءال ءسايدتىڭ ايتۋىنشا، جوعارى دەڭگەيدەگى ءوزارا ساپارلار، ومان-قازاقستان بىرلەسكەن كوميسسياسىنىڭ جۇمىسى جانە 2025–2026 جىلدارعا ارنالعان «جول كارتاسىنىڭ» جۇزەگە اسىرىلۋى ەكىجاقتى ىنتىماقتاستىقتى جاڭا دەڭگەيگە شىعارۋعا مۇمكىندىك بەرەدى.
«ومان قازاقستانمەن كوپتەگەن سالادا اۋقىمدى ينۆەستيتسيالىق جانە سەرىكتەستىك مۇمكىندىكتەرىن كورىپ وتىر. ونىڭ ىشىندە ەنەرگەتيكا جانە تاۋ-كەن ونەركاسىبى، اۋىل شارۋاشىلىعى مەن ازىق-تۇلىك قاۋىپسىزدىگى، كولىك جانە لوگيستيكا، قارجىلىق قىزمەتتەر، تۋريزم، تەحنولوگيالار جانە جاساندى ينتەللەكت سالالارى بار»، – دەدى ومان سۇلتانى.
ول مەملەكەتتىك ينۆەستيتسيالىق قورلار، جەكە سەكتور جانە بەيىندى مەملەكەتتىك قۇرىلىمدار اراسىنداعى بايلانىستى كۇشەيتىپ، بىرلەسكەن جوبالاردى دامىتۋ ماڭىزدى ەكەنىن ايتتى.
سونىمەن قاتار ومان سۇلتانى قازاقستاننىڭ ازيا مەن ەۋروپانى بايلانىستىراتىن ساۋدا دالىزدەرىندەگى ستراتەگيالىق ورنالاسۋىنا نازار اۋداردى. ونىڭ پىكىرىنشە، وماننىڭ پارسى شىعاناعى، ءۇندى مۇحيتى، ازيا جانە افريكا نارىقتارىنا شىعۋعا مۇمكىندىك بەرەتىن تەڭىز ينفراقۇرىلىمى ەكى ەل اراسىنداعى كولىك-لوگيستيكالىق ىنتىماقتاستىقتى دامىتۋعا نەگىز بولا الادى.
وسىعان بايلانىستى ومان پورتتارى ارقىلى جاڭا ساۋدا باعىتتارىن قالىپتاستىرۋ جانە ەكى ەل اراسىنداعى اۋە قاتىناسىن كەڭەيتۋ ماسەلەلەرى قاراستىرىلۋدا.
سونداي-اق قازاقستاننىڭ تسيفرلىق ترانسفورماتسيا مەن جاساندى ينتەللەكت سالاسىنداعى جەتىستىكتەرىن ەكىجاقتى ارىپتەستىكتىڭ ماڭىزدى باعىتتارىنىڭ ءبىرى رەتىندە اتادى.
