Foto:medobr.com
Reseidıŋ İrkutsk oblysyndaǧy epidemiologiialyq jaǧdaiǧa bailanysty Qazaqstanda aldyn alu şaralary qabyldandy. Memlekettık şekaradaǧy ötkızu punktterınde sanitariialyq-karantindık baqylau jürgızılıp jatyr. Būl turaly QR Densaulyq saqtau ministrlıgınıŋ baspasöz qyzmetı mälımdedı, dep habarlaidy "Adyrna".
«Qazaqstan Respublikasynyŋ Densaulyq saqtau ministrlıgı Resei Federasiiasynyŋ İrkutsk oblysynda asa qauıptı infeksiiaǧa küdık keltırılgen jaǧdai turaly epidemiologiialyq ahualdy baqylauda ūstap otyr. Qazaqstandaǧy jaǧdai tūraqty baqylauda, aldyn alu sipatyndaǧy şaralar qabyldandy. Memlekettık şekaradaǧy ötkızu punktterınde sanitariialyq-karantindık baqylau jüzege asyryluda. Kölıktıŋ barlyq türı boiynşa dene qyzuy joǧary, auru belgılerı nemese asa qauıptı infeksiiaǧa küdık bar adamdar anyqtalǧan joq», – dep habarlady vedomstvo.
Aldyn ala baǧalau boiynşa, infeksiianyŋ Qazaqstanǧa äkelınu qaupı tömen. Ministrlıktıŋ mälımetınşe, jaǧdaiǧa berıletın baǧa men qabyldanatyn şaralar resmi aqparattyŋ tüsuıne qarai naqtylanyp otyrady.
Densaulyq saqtau ministrlıgı azamattarǧa sapardan keiın auru belgılerı baiqalsa, medisinalyq kömekke der kezınde jügınuge keŋes berdı. Sondai-aq därıgerge barǧan kezde bolǧan jerı men sapar merzımderın habarlau qajet.
Vedomstvo azamattardy aqparatty tek resmi derekközderden aluǧa şaqyrdy.
Reseilık mamandar qazırgı uaqytta epidemiologiialyq tekseru jürgızıp jatyr. Soŋǧy diagnoz äzırge resmi türde rastalmaǧan. İnfeksiianyŋ yqtimal közı men jūqtyru jaǧdailary anyqtaluda.
Medisinalyq baqylauǧa 197 bailanysta bolǧan adam alynǧan. Qolda bar mälımet boiynşa, olardyŋ eşqaisysynan auru belgılerı anyqtalmaǧan, zerthanalyq taldau nätijelerı terıs. Şelehov audandyq auruhanasynda qajettı epidemiiaǧa qarsy şaralar jürgızılıp jatyr.
4 qazanda, jeksenbı künı Rospotrebnadzordyŋ baspasöz qyzmetı İrkutsk oblysy, İrkutsk qalasy jäne Şelehovtaǧy sanitariialyq-epidemiologiialyq jaǧdai tūraqty ekenın habarlaǧan. Vedomstvo oba auruynyŋ tırkelmegenın mälımdedı.
İrkutsk oblysynda 28 jastaǧy äieldıŋ ölımınıŋ aldyn ala sebebı etiologiiasy anyqtalmaǧan pnevmoniia retınde körsetılgen.
Būǧan deiın Qazaqstan halqyn immundau üşın Reseide öndırılgen tūmauǧa qarsy vaksinanyŋ 2,1 mln dozasy satyp alynǧany habarlanǧan. Tegın vaksinasiiamen halyqtyŋ eŋ osal toptaryn qamtu josparlanyp otyr.
