17 ساۋىردە قاتار ءامىرى شەيح تاميم بين حاماد ءال-تاني ماسكەۋگە رەسمي ساپارمەن كەلدى، دەپ حابارلايدى "ادىرنا" ۇلتتىق پورتالى.
ساپار اياسىندا قاتار باسشىسى رەسەي پرەزيدەنتى ۆلاديمير پۋتينمەن ۋكرايناداعى سوعىس، تاياۋ شىعىستاعى تۇراقسىزدىق جانە ەنەرگەتيكا سالاسىنداعى ىنتىماقتاستىق ماسەلەلەرىن تالقىلايدى.
كرەمل بۇل ساپارعا ەرەكشە ءمان بەرىپ وتىر. رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ ايتۋىنشا، ەكى ەل باسشىلارى "بىرقاتار كۇردەلى حالىقارالىق جانە ەكىجاقتى ماسەلەلەر بويىنشا سالماقتى ءارى مازمۇندى اڭگىمە وتكىزەدى". سونداي-اق بىرنەشە ماڭىزدى كەلىسىمدەرگە قول قويىلادى دەپ كۇتىلۋدە.
قاتار بۇعان دەيىن رەسەي مەن ۋكراينا اراسىنداعى شيەلەنىستى ديپلوماتيالىق جولمەن شەشۋگە تالپىنىپ، اسىرەسە سوعىس سالدارىنان اجىراپ قالعان بالالاردى قايتارۋ بويىنشا دەلدالدىق ءرول اتقارعان. بۇل جولى دا قاتار تاراپى قاقتىعىستى توقتاتۋ ماقساتىندا بەيبىت كەلىسسوزدەردى العا جىلجىتۋعا مۇددەلى ەكەنىن ءبىلدىرىپ وتىر.
قاتار سىرتقى ىستەر ءمينيسترى مۇحاممەد ءال-حۋلايفي تاسس اگەنتتىگىنە بەرگەن سۇحباتىندا كەزدەسۋدە ۋكراينادان بولەك سيريا مەن گازا سەكتورى ماسەلەلەرى دە قارالاتىنىن مالىمدەدى. سونىمەن قاتار، ەنەرگەتيكا سالاسىنداعى ىنتىماقتاستىق، ونىڭ ىشىندە سۇيىتىلعان تابيعي گاز (سپگ) ساۋداسى مەن ينفراقۇرىلىمى بويىنشا بىرلەسكەن جوبالار تالقىلانادى.
ايتا كەتۋ كەرەك، بۇل كەزدەسۋ الەمدىك گەوساياسي شيەلەنىس اياسىندا ءوتىپ جاتىر. اقش بۇرىنعى پرەزيدەنتى دونالد ترامپ تا ۋكرايناداعى قانتوگىستى توقتاتۋعا قاتىستى ءوز جوسپارىن بىرنەشە رەت ۇسىنعانىمەن، ناقتى ناتيجەگە قول جەتكىزە العان جوق. ماسكەۋ جاعى بۇل ماسەلەنى شەشۋ وڭاي بولمايتىنىن جانە اسكەري-ساياسي شەشىمدەر ۇزاق ۋاقىتتى تالاپ ەتەتىنىن ايتىپ كەلەدى.
