كەي كەشتەر بولادى – ول جاي عانا كونتسەرت ەمەس، كوڭىلگە جىلۋ، جۇرەككە شۋاق سىيلايتىن رۋحاني كەزدەسۋ سەكىلدى وتەدى. «قوعامدىق كەلىسىم» كمم عيماراتىندا وتكەن «حالىق مۇراسى» دومبىرا ۇيىرمەسىنىڭ ەسەپتىك كونتسەرتى دە ءدال سونداي اسەرلى كەشتەردىڭ ءبىرى بولدى.
بۇل جولعى باسقوسۋدىڭ ءمانى ءتىپتى تەرەڭ. ۇلتتىق دومبىرا كۇنىنە ورايلاستىرىلعان شارا قازاقستان رەسپۋبليكاسى كونستيتۋتسياسىنىڭ كۇشىنە ەنگەن كۇنىمەن تۇسپا-تۇس كەلىپ، ەلدىك پەن رۋحانياتتى قاتار ۇلىقتاعان تاعىلىمدى شاراعا اينالدى. ساحنا تورىندەگى ۇلتتىق ناقىش، دومبىرانىڭ قوڭىر ءۇنى، جاس ونەرپازداردىڭ شىنايى ىقىلاسى – ءبارى-ءبارى كورەرمەن كوڭىلىن ءبىر ساتكە بولسا دا ءمولدىر الەمگە جەتەلەگەندەي.
جۇرگىزۋشىنىڭ جۇرەكجاردى ءسوزى كەشتىڭ مازمۇنىن ايقىنداپ بەردى. اتا زاڭ – ەلدىڭ تۇعىرى بولسا، سول ەلدىڭ رۋحىن اسقاقتاتاتىن – مادەنيەت پەن ونەر ەكەنى ەرەكشە تەبىرەنىسپەن ايتىلدى. راسىندا، دومبىرانىڭ قوس ىشەگىنەن توگىلگەن ءار كۇي – حالىقتىڭ شەجىرەسى، ءار اۋەن – ۇلتتىڭ ءۇنى.
كەش بارىسىندا «قوعامدىق كەلىسىم» كمم باسشىسى قۋانىش شاقشاقوۆ جىلى لەبىزىن ءبىلدىرىپ، جاس ونەرپازدارعا اق جول تىلەدى. ونىڭ سوزىنەن ونەرگە دەگەن قۇرمەت پەن جاستارعا دەگەن سەنىم ايقىن سەزىلدى.
ساحنادا شىرقالعان ءان مەن كۇيلەر – ۇلتتىق قازىنانىڭ كورىنىسى ىسپەتتى. ساكەننىڭ سىرلى «تاۋ ىشىندە» ءانى، حالىقتىڭ جۇرەگىنەن شىققان «گۇلدەراي»، ءبىرجان سالدىڭ اۋەزدى شىعارمالارى، سونداي-اق «جەزكيىك»، «سەكىرتپە»، «اتا تولعاۋى»، «اكە تولعاۋى» سەكىلدى كۇيلەر كەشتىڭ شىرايىن كىرگىزدى. اسىرەسە جاس دومبىراشىلاردىڭ ورىنداۋىنداعى ءار شىعارمادا تازالىق پەن شىنايىلىق انىق بايقالدى. بۇل – ونەردىڭ ولمەيتىنىنىڭ، ۇرپاقتان ۇرپاققا جالعاساتىنىنىڭ بەلگىسى.
كەشكە سەرپىن بەرگەن ساتتەردىڭ ءبىرى – جاستار رەسۋرستىق ورتالىعى ۇيىمداستىرعان ۆيكتورينا بولدى. كونستيتۋتسيا مەن ۇلتتىق قۇندىلىقتار جايلى سۇراقتارعا جاۋاپ بەرگەن كورەرمەندەردىڭ بەلسەندىلىگى كوپتىڭ كوڭىلىنەن شىقتى.
شارا سوڭىندا ۇيىرمە جەتەكشىسى سارسەنباي حاسەنوۆ ءسوز الىپ، شاكىرتتەرىنىڭ جەتىستىگىنە توقتالدى. ونىڭ ءار ءسوزى ۇستاز جۇرەگىنىڭ جىلۋىن اڭعارتتى. جاس ونەرپازداردىڭ ەڭبەگى ەلەنىپ، العىس حاتتار تابىستالعان ءسات – كەشتىڭ ەڭ تولقىتار تۇستارىنىڭ ءبىرى بولدى.
بۇل كەشتىڭ باستى ءتۇيىنى بىرەۋ-اق: ۇلتتىق ونەر – ۇلتتىڭ جانى. سول جاندى ءتىرى ۇستاپ تۇرعان – وسىنداي تالاپتى جاستار. دومبىرا ۇنىمەن كومكەرىلگەن كەش كوپتىڭ جۇرەگىنە جول تاۋىپ، ءار كورەرمەنگە ءبىر ساتتىك بولسا دا رۋحاني تىنىس سىيلادى.
