كوكشەتاۋ قالاسىندا قازاقستان حالقىنىڭ بىرلىگى كۇنىنە ارنالعان سالتاناتتى ءىس-شارالار ءوتتى. ءوڭىر تۇرعىندارى مەن وبلىس ورتالىعىنىڭ قوناقتارىن وبلىس اكىمى مارات احمەتجانوۆ قۇتتىقتاپ، بۇل مەرەكەنىڭ ەلدىڭ تۇراقتىلىعى مەن وركەندەۋىنىڭ نەگىزى رەتىندەگى ەرەكشە ماڭىزىن اتاپ ءوتتى.
«حالىق بىرلىگى يدەياسى قازاقستاننىڭ دامۋىن ايقىندايتىن نەگىزگى قاعيدات بولىپ قالا بەرەدى. ءوزارا قۇرمەت، ىنتىماق جانە ورتاق قۇندىلىقتار العا ىلگەرىلەۋدىڭ بەرىك نەگىزىن قالايدى. ءوڭىر تۇرعىندارى رەفورمالاردى جۇزەگە اسىرۋعا بەلسەندى قاتىسىپ، جوعارى ازاماتتىق جاۋاپكەرشىلىك تانىتۋدا.
بۇگىندە قازاقستان ادىلەتتىلىك، زاڭدىلىق جانە ادال ەڭبەك قاعيداتتارىن نىعايتۋ كەزەڭىنە قادام باستى. بۇل ماقساتتارعا تەك ءار ازاماتتىڭ ورتاق جاۋاپكەرشىلىگى مەن ادال ەڭبەگى ارقىلى عانا قول جەتكىزۋگە بولادى. قازاقستان حالىق بىرلىگى اۋقىمدى باستامالاردى جۇزەگە اسىرۋعا جانە زامان سىن-قاتەرلەرىن ەڭسەرۋگە مۇمكىندىك بەرەتىن مەملەكەت رەتىندەگى بەدەلىن ءاردايىم ساقتاپ كەلەدى»، – دەپ اتاپ ءوتتى مارات احمەتجانوۆ.
ءوڭىردىڭ دامۋىنا قوسقان زور ۇلەسى ءۇشىن بىرقاتار اقمولالىقتار العىس حاتتارمەن جانە ەستەلىك سىيلىقتارمەن ماراپاتتالدى. مەرەكەلىك كونتسەرتتىك باعدارلاماعا استانا قالاسىنداعى ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ قازاق وركەسترىنىڭ ارتىستەرى قاتىستى. ۇجىمعا قازاقستاننىڭ ەڭبەك سىڭىرگەن قايراتكەرى، باس ديريجيور ايتكالي جايىموۆ جەتەكشىلىك ەتتى.
سونداي-اق ءوڭىر باسشىسى حالىق قولونەرى شەبەرلەرىنىڭ كورمە-جارمەڭكەسىن ارالاپ، ەتنومادەني بىرلەستىكتەردىڭ وكىلدەرىمەن كەزدەستى.
«ارقايسىمىز ءۇشىن 1 مامىر – كۇنتىزبەدەگى جاي عانا كۇن ەمەس. ءبىر كەزدە قازاق دالاسى مىڭداعان پولياكتاردى ەڭ اۋىر جىلدارى قۇشاعىنا الىپ، جىلۋىن سىيلادى. بۇگىندە سول ادامداردىڭ ۇرپاقتارى رەتىندە ءبىز ءوزىمىزدى ماقتانىشپەن قازاقستاندىقپىز دەپ اتايمىز. سەبەبى ءتۇرلى ەتنوستاردىڭ الۋان تۇرلىلىگى – مەملەكەتىمىزدىڭ باستى كۇشى.
قازاقستاندا ءارتۇرلى حالىقتاردىڭ تاعدىرلارى توعىسىپ، دوستىق پەن ءوزارا قۇرمەتتىڭ ەرەكشە ۇلگىسىن قالىپتاستىرىپ وتىرعانىن كورىپ وتىرمىز. ءار شاڭىراقتا بەرەكە ورناپ، بىرلىگىمىز تۇراقتى ءارى گۇلدەنگەن بولاشاقتى قۇرۋدىڭ بەرىك نەگىزى بولىپ قالا بەرسىن»، – دەدى اقمولا وبلىسى پولياكتار قوعامىنىڭ جەتەكشىسى ناتاليا ناگاچەۆسكايا.
