ورال قالاسىندا عاريفوللا قۇرمانعاليەۆ اتىنداعى وبلىستىق فيلارمونيانىڭ 60 جىلدىعىنا وراي تاريحي جوبا ۇيىمداستىرىلدى. ءىس-شارا اياسىندا ءداستۇرلى ءان ورىنداۋداعى جاھاندىق رەكوردتىق كورسەتكىشتى جاڭارتۋ ماقساتى كوزدەلگەن، دەپ حابارلايدى «ادىرنا» ءتىلشىسى.
فيلارمونيا ديرەكتورى، قازاقستاننىڭ ەڭبەك سىڭىرگەن قايراتكەرى باۋىرجان حاليوللانىڭ باستاماسىمەن قولعا الىنعان شارانىڭ العاشقى قاتىسۋشىسى – «پاراسات» وردەنىنىڭ يەگەرى، قازاقستاننىڭ ەڭبەك سىڭىرگەن قايراتكەرى، ءداستۇرلى ءان ونەرىنىڭ كورنەكتى وكىلى 74 جاستاعى ءانشى حاتيموللا بەردىعاليەۆ بولدى.
29 قىركۇيەكتە ونەر يەسى جەتى ساعاتقا جۋىق ۋاقىت بويى توقتاۋسىز ءان شىرقاپ، قازاقتىڭ ءداستۇرلى ءان قورىنان 120 شىعارمانى ورىندادى. بۇل كورسەتكىش ارنايى كوميسسيانىڭ قاتىسۋىمەن تىركەلدى.
رەكوردتىق ناتيجەنى باعالاعان كوميسسيا قۇرامىندا ازيا جانە افريكا ەلدەرى بويىنشا GBR Global Best Records الەمدىك رەكوردتار كىتابىنىڭ باس تىركەۋشى وفيتسەرى قۋاندىق قۇدايبەرگەن، فولكلورتانۋشى عالىم بەرىك ءجۇسىپوۆ، ونەرتانۋشى پروفەسسور كەنجەعالي مىرجىقباي، اقىن عالىم جايلىباي جانە ايتىسكەر اقىن، كومپوزيتور جاكەن وماروۆ بولدى. جوبانىڭ باس ساراپشىسى قىزمەتىن باۋىرجان حاليوللا اتقاردى.
ايتۋلى شاراعا ەلىمىزدىڭ ءار وڭىرىنەن ءداستۇرلى ءان، جىر-تەرمە جانە ايتىس ونەرىنىڭ بەلگىلى وكىلدەرى ارنايى قاتىسىپ، قولداۋ كورسەتتى. ولاردىڭ قاتارىندا قاپاش قۇلىش، قايرات قابىشەۆ، باقىت شاعىرباەۆ، امانقوس سادىقوۆ، بەكارىس شويبەكوۆ، سايان اقمولدا، امانگەلدى كۇزەۋباي، ەربولات شالدىبەكوۆ، نياز مۇحتار جانە ارمات يسليامعاليەۆ بار. وسىناۋ ونەر قايراتكەرلەرىنىڭ ىشىندە قايرات قابىشەۆ تۇڭعىش رەت توقتاۋسىز 100-دەن استام ءان شىرقاۋعا بولاتىنىن كورسەتىپ، بيىل ماۋسىم ايىندا اتالمىش رەكوردتار كىتابىنا العاش رەت ەنگەن بولاتىن. قايرات توقتاۋسىز، ءۇزىلىسسىز 102 ءان شىرقاعان.
كەش سوڭىندا GBR Global Best Records ۇيىمىنىڭ وكىلى قۋاندىق قۇدايبەرگەن حاتيموللا بەردىعاليەۆكە «ەڭ جاسى ۇلكەن ءداستۇرلى ءان ورىنداۋشى» اتالىمى بويىنشا الەمدىك رەكورد سەرتيفيكاتى مەن ارنايى ستاتۋەتكانى تابىستادى. سونداي-اق وعان ارنايى دايىندالعان مەدال تاعىلىپ، رەكوردتى راستايتىن قۇجات تاپسىرىلدى.
ال 30 قىركۇيەكتە مادەنيەت سالاسىنىڭ ۇزدىگى، «قۇرمەت» وردەنىنىڭ يەگەرى قايرات كاكىموۆ ءبىر دەممەن 132 ءان ورىنداپ، رەكورد ورناتتى. ءىس-شارا سوڭىندا ازيا مەن افريكا ەلدەرى بويىنشا GBR Global Best Records الەمدىك رەكوردتار كىتابىنىڭ باس تىركەۋشى وفيتسەرى قۋاندىق قۇدايبەرگەن ارنايى دايىندالعان كۇمىس توسبەلگى، سەرتيفيكات جانە توسبەلگى قۇجاتىن ونەرپازعا تابىس ەتتى.
سونداي-اق ۇلتتىق ونەردى ناسيحاتتاۋعا قوسقان ۇلەستەرى ءۇشىن حاتيموللا بەردىعاليەۆ پەن قايرات كاكىموۆكە اۆتوكولىك سىيعا تارتىلدى.
