قازاقستان مەن رەسەي فەدەراتسياسى شەكاراسى اۋماعىندا بولىپ جاتقان احۋال باقىلاۋدا، بارلىق كۇشتىك قۇرىلىمدار مەن مەملەكەتتىك ورگاندار جۇمىلدىرىلدى. بۇل تۋرالى بقو اكىمىنىڭ ورىنباسارى باقىتجان نارىمبەتوۆ ايتتى، دەپ حابارلايدى “ادىرنا” ۇلتتىق پورتالى.
“قازىرگى تاڭدا رەسەي فەدەراتسياسىنان قازاقستانعا وتەتىن شەكارا پۋنكتتەرىندە تاۋلىكتىك پاترۋلدەۋ جۇرگىزىلۋدە. سىرىم، شاعان، تاسقالا، تەپلىي شەكارا پوستتارىندا تاۋلىك بويى ۇزدىكسىز شەكاراشىلارمەن قاتار پوليتسيا قىزمەتكەرلەرى دە جۇمىس ىستەۋدە. ورال قالاسى بويىنشا پاترۋلدىك پوليتسيا مەن جاياۋ ناريادتار كوبەيتىلىپ، بارلىق قوعامدىق جەرلەر باقىلانۋدا.
ارينە، باتىس قازاقستان وبلىسىنىڭ رەسەي فەدەراتسياسىنىڭ بەس وبلىسىمەن شەكارالاس بولۋى جانە باسقا دا گەوگرافيالىق- دەموگرافيالىق فاكتورلارعا بايلانىستى شەكارادا تۇرعانداردىڭ سانى ازايماۋدا. سوندىقتان 330 مىڭ تۇرعىنى بار وبلىس ورتالىعى – ورال قالاسى بىرنەشە مىڭداعان شەتەلدىكتەردى قابىلداۋعا دايىن بولماعاندىعى ايتپاساق تا تۇسىنىكتى.
سول سەبەپتى وبلىس ەرىكتىلەرىنىڭ باستاماسىمەن ورال قالاسىنىڭ جازعى لاگەرلەرىنىڭ بازاسىندا 330 ورىنعا كەلۋشىلەردى اقىلى تۇردە قابىلداۋ پۋنكتتەرى ۇيىمداستىرىلدى. (ۋاقىتشا تۇرۋ + تاماقتانۋ اقىسى – 5000 تەڭگە)”،-دەپ جازدى باقىتجان حابەرۇلى.
سونداي-اق، باقىتجان نارىمبەتوۆتىڭ ايتۋىنشا، تۇرعىندار ءۇشىن جانە رف-نان كەلگەن ازاماتتارعا تۇيتكىلدى ماسەلەلەردى شەشۋ ماقساتىندا 109 بىرىڭعاي call-ورتالىعىنا حابارلاسۋعا بولادى. سونىمەن بىرگە الەۋمەتتىك جەلىلەردە ەلىمىزدىڭ باسقا وڭىرلەرىنە جۇرەتىن تۇراقتى اۆتوبۋس مارشرۋتتارىنىڭ قوزعالىس كەستەسى، جولاقى قۇنى تۋرالى اقپاراتتار ورنالاستىرىلعان.
“تالداۋ كورسەتكەندەي ءبىزدىڭ ءوڭىر ارقىلى شەكارادان كىرگەن رەسەي ازاماتتارىنىڭ باسىم كوپشىلىگى وبلىسىمىزدى ۋاقىتشا ترانزيتتىك پۋنكت رەتىندە كورۋدە. سول سەبەپتى قالىپتاسقان جاعدايعا بايلانىستى اۆتوبۋس پاركتەرىنىڭ كۇنىنە ءبىر رەت اتىراۋعا جۇرەتىن جولاۋشىلار اۆتوبۋسىن كۇنىنە 5 رەت جىبەرۋگە مۇمكىندىگى بار. اقتوبە قالاسى بويىنشا دا مارشرۋت جىبەرۋگە دايىن. سونىمەن بىرگە بارلىق پوەزد باعىتتارىنا قوسىمشا ۆاگوندار تىركەۋ بويىنشا ءتيىستى مينيسترلىك پەن «قازاقستان تەمىر جولى» ۇلتتىق كومپانياسىمەن كەلىسسوزدەر جۇرگىزدىك، ولار دا قولداۋعا ءازىر. ىشكى جانە سىرتقى اۋە رەيستەرىن دە ويلاستىرىپ جاتىرمىز.
وبلىستا ازىق-تۇلىك باعاسىن تەكسەرۋ جانە دەلدالداردى انىقتاۋ ماقساتىندا مونيتورينگتىك توپتار جۇمىستانۋدا. سوڭعى اپتادا ازىق-تۇلىك تاۋارلارى باعاسىنىڭ ءوسۋى بايقالمايدى.
تەك رەسمي اقپاراتقا سەنۋ كەرەكتىگىن ەستەرىڭىزگە سالامىن. ءبىز ءۇشىن ەڭ الدىمەن جەرلەستەرىمىزدىڭ قاۋىپسىزدىگى مەن كوڭىل-كۇيى ماڭىزدى.
ۆولونتەرلەرگە ايتارىم بار. ارينە، اباي اتامىز «ادامزاتتىڭ ءبارىن ءسۇي باۋىرىم دەپ» ايتپاقشى، بارشاعا جاقسىلىق جاساعان دۇرىس قوي، دەگەنمەن وتانداستارىمىزدىڭ مۇددەسى ءبىرىنشى كەزەكتە ەكەندىگىن ۇمىتپاعان ءجون”، - دەپ قورىتىندىلادى.
”ادىرنا” ۇلتتىق پورتالى
