الەۋمەتتىك جەلىلەردە تەڭىز جاعاسىندا وتىرعان ايەل بەينەلەنگەن ۆيدەو كەڭىنەن تارادى. جازبا اۆتورلارى كادرلاردى كاسپي تەڭىزىندەگى قايعىلى جاعدايمەن بايلانىستىرىپ، ۆيدەوداعى ايەلدى قازا تاپقان اسكەري قىزمەتشىلەردىڭ ءبىرىنىڭ اناسى دەپ كورسەتكەن. بۇل اقپاراتتى كەيبىر بۇقارالىق اقپارات قۇرالدارى دا جاريالاعان. الايدا ۆيدەونىڭ قازاقستانداعى وقيعاعا ەش قاتىسى جوق.
Nofake سايتىنىڭ مالىمەتىنشە، ۆيدەونى تۇسىرگەن اۆتور كادرلاردىڭ ناقتى قاي جەردە جانە قاشان تۇسىرىلگەنىن ءوزى ءتۇسىندىردى. ونىڭ ايتۋىنشا، ۆيدەو ماروككونىڭ تانجەر قالاسىندا تۇسىرىلگەن. كادرداعى ايەل – الجيردەن كەلگەن قىز.
«سالەمەتسىز بە. ءيا، كەشە ۆيدەونى سىناق رەتىندە جاريالاپ، ۇيىقتاپ قالعان ەدىم. تاڭەرتەڭ قاراسام، پىكىرلەر مەن رەپوستتار وتە كوپ ەكەن. ۆيدەو ماروككودا، تانجەر قالاسىندا ءتۇسىرىلدى. كادرداعى ايەل – الجيردەن كەلگەن قىز. ۆيدەومنىڭ قازاقستان اۋديتورياسىنا قالاي تاراپ كەتكەنىن ءوزىم دە بىلمەيمىن. قازاقستانداعى جاڭالىقتاردان حابارسىز ەدىم، ول جاقتا ەشقاشان بولعان ەمەسپىن. ساربازدارىڭىزعا قاتىستى جاعدايعا قاتتى قايعىرىپ وتىرمىن. كوڭىل ايتامىن»، – دەدى ۆيدەو اۆتورى.
قايعىلى وقيعالار كەزىندە الەۋمەتتىك جەلىلەردە ەموتسيالىق سيپاتتاعى ۆيدەولاردىڭ تەز تارالۋى ءجيى كەزدەسەدى. مۇنداي جاعدايدا ەسكى نەمەسە باسقا ەلدەردە تۇسىرىلگەن كادرلار باستاپقى كونتەكستىنەن اجىراپ، وقيعاعا قاتىسى بار ماتەريال رەتىندە ۇسىنىلۋى مۇمكىن.
ەسكە سالايىق، 24 قىركۇيەكتە كاسپي تەڭىزىندە «حازار قورعانى – 2026» وقۋ-جاتتىعۋى بارىسىندا اۋا رايىنىڭ كۇرت ناشارلاۋىنان 14 اسكەري قىزمەتشىنى تەڭىز اعىسى الىپ كەتكەن.
بۇعان دەيىن الەۋمەتتىك جەلىلەردە «قازا بولعان ساربازدىڭ اكەسىمەن سوڭعى رەت سويلەسكەن ۆيدەوسى» دەگەن سيپاتتامامەن تاراعان كادرلار دا تەكسەرىلگەن بولاتىن. كەيىن ۆيدەوداعى اسكەري قىزمەتشىنىڭ ءتىرى ەكەنى انىقتالدى. مۇنى ساربازدىڭ اكەسى تالعات قۇلمانوۆتىڭ ءوزى راستاعان.
سونداي-اق قورعانىس ءمينيسترى داۋرەن قوسانوۆتىڭ ۆيدەوسى دا كاسپيدەگى قايعىلى وقيعامەن بايلانىستىرىلىپ تارادى. قورعانىس مينيسترلىگى بۇل كادرلاردىڭ بىلتىر تۇسىرىلگەنىن جانە قازىرگى جاعدايعا قاتىسى جوق ەكەنىن مالىمدەدى.
بۇدان بولەك، الەۋمەتتىك جەلىلەردە ەسكى ۆيدەولار، جاساندى ينتەللەكت ارقىلى جاسالعان ماتەريالدار جانە قازاقستاندىق بلوگەرلەرگە قاتىستى مانيپۋلياتسيالىق جازبالار دا تاراعان.
