Äleumettık jelılerde teŋız jaǧasynda otyrǧan äiel beinelengen video keŋınen tarady. Jazba avtorlary kadrlardy Kaspii teŋızındegı qaiǧyly jaǧdaimen bailanystyryp, videodaǧy äieldı qaza tapqan äskeri qyzmetşılerdıŋ bırınıŋ anasy dep körsetken. Būl aqparatty keibır būqaralyq aqparat qūraldary da jariialaǧan. Alaida videonyŋ Qazaqstandaǧy oqiǧaǧa eş qatysy joq.
Nofake saitynyŋ mälımetınşe, videony tüsırgen avtor kadrlardyŋ naqty qai jerde jäne qaşan tüsırılgenın özı tüsındırdı. Onyŋ aituynşa, video Marokkonyŋ Tanjer qalasynda tüsırılgen. Kadrdaǧy äiel – Aljirden kelgen qyz.
«Sälemetsız be. İä, keşe videony synaq retınde jariialap, ūiyqtap qalǧan edım. Taŋerteŋ qarasam, pıkırler men reposttar öte köp eken. Video Marokkoda, Tanjer qalasynda tüsırıldı. Kadrdaǧy äiel – Aljirden kelgen qyz. Videomnyŋ Qazaqstan auditoriiasyna qalai tarap ketkenın özım de bılmeimın. Qazaqstandaǧy jaŋalyqtardan habarsyz edım, ol jaqta eşqaşan bolǧan emespın. Sarbazdaryŋyzǧa qatysty jaǧdaiǧa qatty qaiǧyryp otyrmyn. Köŋıl aitamyn», – dedı video avtory.
Qaiǧyly oqiǧalar kezınde äleumettık jelılerde emosiialyq sipattaǧy videolardyŋ tez taraluy jiı kezdesedı. Mūndai jaǧdaida eskı nemese basqa elderde tüsırılgen kadrlar bastapqy kontekstınen ajyrap, oqiǧaǧa qatysy bar material retınde ūsynyluy mümkın.
Eske salaiyq, 24 qyrküiekte Kaspii teŋızınde «Hazar Qorǧany – 2026» oqu-jattyǧuy barysynda aua raiynyŋ kürt naşarlauynan 14 äskeri qyzmetşını teŋız aǧysy alyp ketken.
Būǧan deiın äleumettık jelılerde «qaza bolǧan sarbazdyŋ äkesımen soŋǧy ret söilesken videosy» degen sipattamamen taraǧan kadrlar da tekserılgen bolatyn. Keiın videodaǧy äskeri qyzmetşınıŋ tırı ekenı anyqtaldy. Mūny sarbazdyŋ äkesı Talǧat Qūlmanovtyŋ özı rastaǧan.
Sondai-aq Qorǧanys ministrı Däuren Qosanovtyŋ videosy da Kaspiidegı qaiǧyly oqiǧamen bailanystyrylyp tarady. Qorǧanys ministrlıgı būl kadrlardyŋ byltyr tüsırılgenın jäne qazırgı jaǧdaiǧa qatysy joq ekenın mälımdedı.
Būdan bölek, äleumettık jelılerde eskı videolar, jasandy intellekt arqyly jasalǧan materialdar jäne qazaqstandyq blogerlerge qatysty manipuliasiialyq jazbalar da taraǧan.
