ماڭعىستاۋ وبلىسىندا كاسپي جاعالاۋىندا سۋعا باتىپ بارا جاتقان ءجاسوسپىرىم قۇتقارىلدى، دەپ حابارلايدى توتەنشە جاعدايلار مينيسترلىگىنىڭ ءباسپاسوز قىزمەتى.
«4 شىلدە كۇنى ساعات 21.40-تا كاسپي تەڭىزىنىڭ جاعالاۋىندا، اتاپ ايتقاندا، جارتاستى جاعا ايماعىندا ماڭعىستاۋ وبلىسى توتەنشە جاعدايلار دەپارتامەنتىنىڭ ءموبيلدى اۆاريالىق-قۇتقارۋ جاساعىنىڭ كەزەكشىلىگى كەزىندە جەدەل-قۇتقارۋ جاساعىنىڭ قۇتقارۋشىلارى 2006 جىلى تۋعان ازاماتتى امان الىپ قالدى»، - دەلىنگەن سارسەنبىدە تاراعان حابارلامادا.
اتاپ وتكەندەي، ءجاسوسپىرىم رۇقسات ەتىلمەگەن ايماقتا شومىلعان.
«جاسوسپىرىمگە مەديتسينالىق كومەك قاجەت بولمادى»، - دەپ قوستى توتەنشە جاعدايلار مينيسترلىگى.
رەداكتسيا ۇسىنعان جازدا شومىلۋ ماۋسىمىندا ەسكەرۋ قاجەت ەرەجەلەر:
- سۋعا شومىلاتىن جەردى، جالپى جاعدايدى سۋدىڭ تازالىعىن، تەرەڭدىگىن مۇقيات تەكسەرىپ الىڭىز;
- تاماق ىشكەننەن كەيىن بىردەن شومىلماڭىز;
- سۋعا تەك قانا رۇقسات ەتىلگەن جەرلەر مەن جاعاجايلاردا شومىلىڭىزدار;
- وتە ۇزاق شومىلماڭىز، ءوزىڭىزدى شارشاعانعا جانە قالتىراۋعا دەيىن جەتكىزبەڭىز;
- سۋعا تۇسكەندە ءبىر-ءبىرىڭىزدى كوزدەن تاسا قىلماڭىز;
- قورشاۋ بەلگىلەرىنەن، اعىندى ايماقتاردان تىسقارى جۇزبەڭىز;
- تەحنيكالىك ەسكەرتۋ بەلگىلەرىنىڭ، اعىسى قاتتى وزەندەردىڭ قاۋىپتى ايماعىنا تۇسپەڭىز.
