يراننىڭ ەكولوگيا سالاسىنا جاۋاپتى ۆەدومستۆوسى كاسپي تەڭىزى دەڭگەيىنىڭ سوڭعى جىلدارى جەدەل تومەندەۋىنە بايلانىستى الاڭداۋشىلىق ءبىلدىردى، دەپ حابارلايدى "ادىرنا" ۇلتتىق پورتالى.
بۇل تۋرالى ەلدىڭ قورشاعان ورتانى قورعاۋ ۇيىمىنىڭ تەڭىز لاستانۋىن زەرتتەۋ جانە ونىمەن كۇرەس دەپارتامەنتىنىڭ ديرەكتورى وميدا ساددەگي مالىمدەدى.
ماماننىڭ ايتۋىنشا، 1995 جىلدان بەرى كاسپي تەڭىزى دەڭگەيى جالپى العاندا شامامەن 2,5 مەترگە تومەندەگەن. سونىڭ ىشىندە سوڭعى 4–5 جىل ىشىندە سۋ دەڭگەيى شامامەن 1 مەترگە ازايىپ، پروتسەستىڭ ايتارلىقتاي جەدەلدەگەنى بايقالادى.
ساددەگيدىڭ مالىمەتىنشە، كاسپيگە قۇياتىن سۋدىڭ نەگىزگى بولىگى — شامامەن 80%-ى ەدىل وزەنى ارقىلى كەلەدى. ال يران اۋماعىنداعى وزەندەردىڭ ۇلەسى نەبارى 5% شاماسىندا. قازىرگى ۋاقىتتا ايماقتاعى ەكولوگيالىق جاعدايدى تۇراقتاندىرۋ جانە سالدارىن ازايتۋ ماقساتىندا وڭىرلىك ءىس-قيمىل جوسپارى ازىرلەنىپ جاتىر. بۇل قۇجات الداعى جازدا تەگەراندا وتەتىن «COP7» سامميتىندە كاسپي ماڭى ەلدەرىنىڭ قاتىسۋىمەن تالقىلانباق.
ماماندار تەڭىز دەڭگەيىنىڭ تومەندەۋى ەكوجۇيەگە، بالىق شارۋاشىلىعىنا جانە جاعالاۋ ينفراقۇرىلىمىنا ەلەۋلى قاۋىپ ءتوندىرۋى مۇمكىن ەكەنىن ەسكەرتۋدە.
