كاسپي تەڭىزىنىڭ تايازدانۋ ماسەلەسى – حالىقارالىق ىنتىماقتاستىقتى كۇشەيتۋدى قاجەت ەتەتىن وزەكتى ەكولوگيالىق پروبلەمالاردىڭ ءبىرى. بۇل تۋرالى ازەربايجان پرەزيدەنتىنىڭ كليمات ماسەلەلەرى جونىندەگى وكىلى مۇحتار باباەۆ مالىمدەدى، دەپ حابارلايدى «ادىرنا» ءتىلشىسى Caliber.Az-گە سىلتەمە جاساپ.
ء«بىزدىڭ ءوڭىرىمىز ءۇشىن كاسپي تەڭىزىنىڭ تايازدانۋى جىل سايىن الاڭداتارلىق ماسەلەگە اينالىپ كەلەدى. بۇل ەكوجۇيەلەرگە، ەلدى مەكەندەرگە، كەمە قاتىناسىنا جانە ەكونوميكالىق قىزمەتكە اسەر ەتۋدە. (…) ورتاق سۋ رەسۋرستارى شيەلەنىس كوزىنە اينالماۋى كەرەك. كەرىسىنشە، ولار ىنتىماقتاستىقتىڭ، تۇراقتىلىق پەن ورتاق وركەندەۋدىڭ فاكتورى بولۋى قاجەت. ازەربايجان ءۇشىن كليماتتىڭ وزگەرۋى ماسەلەسى – كۇن تارتىبىندەگى ەڭ جوعارى ساياسي باسىمدىقتاردىڭ ءبىرى»، – دەدى باباەۆ 7 قىركۇيەكتە باكۋدەگى 2026 جىلعى كليماتتىق ءىس-قيمىلدار اپتالىعىنىڭ اشىلۋىندا.
باباەۆتىڭ ايتۋىنشا، كليماتتىڭ وزگەرۋىمەن كۇرەسكە باعىتتالعان شارالار قازىردىڭ وزىندە بولىپ جاتقان وزگەرىستەردەن ادامداردى، ەكونوميكانى جانە تابيعي رەسۋرستاردى قورعاۋعا باعىتتالعان.
ونىڭ سوزىنشە، پرەزيدەنت يلحام اليەۆتىڭ باسشىلىعىمەن ازەربايجان بۇل ماسەلەنى وڭىرلىك جانە حالىقارالىق كۇن تارتىبىندە جوعارى دەڭگەيگە كوتەرۋ، سونداي-اق كاسپي ماڭى مەملەكەتتەرى اراسىنداعى ديالوگتى نىعايتۋ باعىتىندا جۇمىس جۇرگىزگەن.
«ورتاق سۋ رەسۋرستارى ورتاق جاۋاپكەرشىلىكتى تالاپ ەتەدى. ترانسشەكارالىق وزەندەر مەن كولدەردىڭ باسسەيندەرىندە 3 ميللياردتان استام ادام تۇرادى. ال كليماتتىڭ وزگەرۋى بۇل ورتاق رەسۋرستارعا بارعان سايىن ۇلكەن قىسىم كورسەتۋدە»، – دەپ قوستى ول.
سۋرەت: minval.az
