Maŋǧystau oblysynda äskeri boryşyn öteu kezınde qaza bolǧan äskeri qyzmetşılermen qoştasu räsımı öttı, dep habarlaidy "Adyrna" tılşısı.
Qaraly jiynǧa Maŋǧystau oblysynyŋ äkımı Nūrdäulet Qilybai, Qazaqstannyŋ qorǧanys ministrı Däuren Qosanov, Bas müfti Nauryzbai qajy Taǧanūly, Ūlttyq qūryltai müşelerı, Qazaqstan Halyq Keŋesınıŋ ökılderı, qoǧam qairatkerlerı jäne marqūmdarmen bırge qyzmet atqarǧan äskeri qyzmetşıler qatysty.
Jiyn barysynda qaza bolǧandardyŋ tuǧan-tuystary men jaqyndaryna köŋıl aitylyp, marqūmdardyŋ ruhyna Qūran baǧyştalyp, dūǧa jasaldy.
Maŋǧystau oblysy äkımdıgınıŋ mälımetınşe, Memleket basşysynyŋ tapsyrmasyna säikes, qaza bolǧan äskeri qyzmetşılerdıŋ otbasylaryna memlekettık äleumettık tölemder men materialdyq kömek körsetılıp jatyr. Sonymen qatar janaza jäne jerleu räsımderın ūiymdastyruǧa qajettı qoldau körsetılude.
Būǧan deiın oblys äkımdıgı qaza bolǧan äskeri qyzmetşılerdıŋ otbasylary men zardap şekkenderge kömek körsetu üşın arnaiy qor qūrylǧanyn habarlaǧan. Jinalǧan qarajat otbasylar men zardap şekkenderge atauly ärı aşyq türde baǧyttalady.
Qarajattyŋ jūmsaluy memlekettık jäne qūqyq qorǧau organdarynyŋ baqylauynda bolady.
24 qyrküiekte Kaspii teŋızınde "Hazar qorǧany - 2026" degen atpen ötkızılgen äskeri jattyǧuda 17 adam suǧa aǧyp, 14 sarbaz qaza tapty.
Jattyǧu Qorǧanys ministrlıgınıŋ oqu-jattyǧudyŋ strategiialyq komandalyq-ştabtyq bıryŋǧai jospar aiasynda Kaspii teŋızınıŋ qazaqstandyq sektorynda ötken. Oǧan Qazaqstan qaruly küşterı äskeri-teŋız küşterınıŋ bas qolbasşysy, 1-därejelı kapitan Qanat Niiazbekov jetekşılık etken. Oqu-jattyǧuǧa äskeri-teŋız küşterı men olarǧa baǧynysty bölımşelerdıŋ 500-den astam äskeri qyzmetker, äskeri kemelerdıŋ ekipajdary men jaǧalau bölımşelerı qatysqan. Maşyqtanuǧa ŪQK şekara qyzmetınıŋ Maŋǧystau oblysy boiynşa jaǧalau küzetı men äue qorǧanysy küşterınıŋ küşterı men qūraldary tartylǧan.
