كاسپيدەگى قاسىرەت 11 جىل بۇرىنعى وقيعانى ەسكە سالدى. كىم قالاي جازالاندى؟

2015 جىلعى 18 قىركۇيەكتە كاسپي تەڭىزىندە «ورتالىق-2015» وقۋ-جاتتىعۋى بارىسىندا ءتورت سارباز سۋعا باتىپ قازا تاپقان ەدى.

2015 جىلعى وقيعا قالاي بولعان؟

سول جىلى وقۋ-جاتتىعۋدىڭ ەكىنشى كەزەڭى ماڭعىستاۋ وبلىسىنداعى «ويماشا» پوليگونى ماڭىندا وتكەن. تەڭىز دەسانتىن ءتۇسىرۋ جاتتىعۋىنا 52 اسكەري قىزمەتشىسى بار التى بتر-80 تارتىلعان.

تەحنيكا جاعالاۋدان شامامەن بەس شاقىرىم قاشىقتىقتاعى تەڭىزگە شىعىپ، 150 مەتردەي جۇرگەننەن كەيىن اۋا رايى كۇرت بۇزىلعان. قاتتى جەل مەن بيىك تولقىننىڭ اسەرىنەن بروندى ماشينالار سۋعا باتا باستاعان. ناتيجەسىندە ءتورت اسكەري قىزمەتشى قازا بولدى.

قايعىلى جاعدايدان كەيىن سول كەزدەگى قورعانىس ءمينيسترى يمانعالي تاسماعامبەتوۆ ارنايى كوميسسيا قۇرىپ، وقيعانىڭ سەبەپتەرىن انىقتاۋدى تاپسىرعان. ول سونداي-اق وقيعا ورنىنا جەدەل بارۋدى مىندەتتەگەن.

قازا تاپقان ساربازدار:

• 19 جاستاعى باۋىرجان جولداباي – سول كەزدەگى وڭتۇستىك قازاقستان وبلىسى سوزاق اۋدانىنان;

• 19 جاستاعى اسىلجان ماحامبەتوۆ – اتىراۋ وبلىسى قۇلسارى قالاسىنان;

• 23 جاستاعى زامير ءادىلوۆ – الماتى وبلىسىنىڭ ەڭبەكشىقازاق اۋدانىنان;

• 19 جاستاعى باعىتجان قالىباي – اتىراۋ وبلىسى ماقات كەنتىنەن.

اسىلجان ماحامبەتوۆ پەن باعىتجان قالىبايدىڭ اسكەري قىزمەتىن اياقتاۋىنا ءبىر اي عانا قالعان بولاتىن.

تەرگەۋ جانە جاۋاپقا تارتىلعاندار

2015 جىلعى 19 قىركۇيەكتە اسكەري قىزمەتشىلەردىڭ قازا بولۋىنا بايلانىستى قىلمىستىق ءىس قوزعالدى. ءىس قازاقستان رەسپۋبليكاسى قىلمىستىق كودەكسىنىڭ 453-بابىنىڭ 2-بولىگى – اۋىر زارداپتارعا اكەپ سوققان قىزمەتكە سالعىرت قاراۋ فاكتىسى بويىنشا تەرگەلدى.

تەرگەۋ ناتيجەسىندە اسكەري باسقارۋ جۇيەسىندەگى بىرقاتار لاۋازىمدى تۇلعالار قىزمەتىنەن بوساتىلدى. ولاردىڭ قاتارىندا «باتىس» وڭىرلىك قولباسشىلىعىنىڭ قولباسشىسى مۇرات نۇعمانوۆ، ونىڭ ءبىرىنشى ورىنباسارى ءارى شتاب باستىعى ريزات قولپاشەۆ، جاۋىنگەرلىك دايىندىق جونىندەگى ورىنباسارى مەرگەن قاپاشەۆ جانە تەڭىز جاياۋ اسكەرلەرى بريگاداسىنىڭ كومانديرى ەربۇلات تولىقباەۆ بولدى.

سول جىلدىڭ قازان ايىندا قورعانىس مينيسترلىگىندە ارنايى القا ءماجىلىسى ءوتىپ، وقيعانىڭ سەبەپتەرى تالقىلاندى. باس ينسپەكتسيا جۇرگىزگەن تالداۋ قورىتىندىسىندا قاۋىپسىزدىك تالاپتارىنىڭ ساقتالماۋى، بەلگىلەنگەن الگوريتمدەردىڭ ورىندالماۋى، جەكە قۇرامنىڭ دايىندىعىنىڭ جەتكىلىكسىزدىگى جانە باقىلاۋدىڭ السىزدىگى نەگىزگى فاكتورلار رەتىندە كورسەتىلدى.

قازا تاپقان اسكەري قىزمەتشىلەردىڭ وتباسىلارىنا مەملەكەت تاراپىنان 1,5 ميلليون تەڭگەدەن ماتەريالدىق وتەماقى تولەنەتىنى دە حابارلانعان.

سوت ۇكىمى

قايعىلى وقيعادان ءبىر جىلدان استام ۋاقىت وتكەن سوڭ، 2016 جىلعى 25 قاراشادا اقتاۋ گارنيزونىنىڭ اسكەري سوتى ءىستى قارادى. سوت الدىندا التى ادام جاۋاپ بەردى.

مۇرات نۇعمانوۆ، ەربۇلات تولىقباەۆ جانە 25744 اسكەري ءبولىمىنىڭ تەڭىز جاياۋ اسكەرلەرى كومانديرىنىڭ ورىنباسارى راشيد جىلقايداروۆ 2,5 جىلعا باس بوستاندىعىنان ايىرىلدى. ولار جازاسىن قونىس كولونياسىندا وتەۋگە ءتيىس بولدى.

ال كىشى سەرجانت اباي بايمۇراتوۆقا 1,5 جىل باس بوستاندىعىنان ايىرۋ جازاسى تاعايىندالدى.

ۆزۆود كومانديرى باۋىرجان تولەگەنوۆ پەن كىشى سەرجانت ەراسىل كوبەگەن التى ايعا باس بوستاندىعىنان ايىرىلعانىمەن، سوت قىلمىستىق كودەكستىڭ 63-بابىن قولدانىپ، ولارعا شارتتى جازا بەلگىلەدى.

2026 جىلعى 24 قىركۇيەكتە ماڭعىستاۋ وبلىسىندا اسكەري-تەڭىز جاتتىعۋى كەزىندە تاعى دا توتەنشە جاعداي تىركەلدى.

الدىن الا مالىمەت بويىنشا، وقۋ-جاۋىنگەرلىك تاپسىرمانى ورىنداۋ بارىسىندا اۋا رايىنىڭ كۇرت وزگەرىپ، جەلدىڭ كۇشەيۋىنەن 19 اسكەري قىزمەتشىنى تەڭىز تولقىنى الىپ كەتكەن.

ولاردىڭ كەم دەگەندە 12-ءسى قازا تاپتى. تاعى ەكى اسكەري قىزمەتكەر حابار-وشارسىز كەتكەن، ال بىرەۋى ماڭعىستاۋ وبلىستىق اۋرۋحاناسىندا اۋىر جاعدايدا جاتىر.

وقيعا ورنىنا قۇتقارۋ قىزمەتتەرىنىڭ كۇشتەرى مەن قاجەتتى تەحنيكاسى جىبەرىلگەن.

اسكەري قىزمەتشىلەردىڭ قازا بولۋىنا بايلانىستى سوتقا دەيىنگى تەرگەۋ باستالدى. قازىرگى ۋاقىتتا وقيعانىڭ ناقتى سەبەپتەرى مەن وعان اسەر ەتكەن جاعدايلار انىقتالىپ جاتىر.