ۆيتسە-پرەزيدەنت ەرلان قارين قازاقستان حالىق كەڭەسىنىڭ ءبىرىنشى سەسسياسىندا مەملەكەت باسشىسى قاسىم-جومارت توقاەۆ كوتەرگەن بىرقاتار ماسەلەگە قاتىستى پىكىر ءبىلدىردى.
ونىڭ ايتۋىنشا، پرەزيدەنتتىڭ سوڭعى ۋاقىتتا سويلەگەن سوزدەرىندە قوعامدا تالقىلاناتىن ماڭىزدى ماسەلەلەر ءجيى كوتەرىلىپ ءجۇر. اتاپ ايتقاندا، تاريحقا كوزقاراس، جاڭا ادەتتەردى قالىپتاستىرۋ، تازالىقتى ساقتاۋ جانە قوعامداعى بولىنۋشىلىك ماسەلەلەرى ءسوز بولدى.
ەرلان قارين مەملەكەت باسشىسىنىڭ اۋىل مەن قالا تۇرعىندارىن بولۋگە، ادامداردى «اسفالتتا وسكەن قازاق»، «شالا قازاق»، «ناعىز قازاق» دەپ جىكتەۋگە بولمايتىنى تۋرالى پىكىرىنە نازار اۋداردى.
ۆيتسە-پرەزيدەنتتىڭ پايىمىنشا، مۇنداي تۇسىنىكتەردىڭ بىرقاتارى ۋاقىت وتە قالىپتاسىپ كەتكەن جانە بۇگىندە قوعامنىڭ دامۋىنا كەدەرگى كەلتىرۋى مۇمكىن.
ول ۇلتتىق بىرەگەيلىكتى نىعايتۋ ءۇشىن ازاماتتاردى الەۋمەتتىك نەمەسە تۇرمىستىق ەرەكشەلىكتەرىنە قاراي ءبولىپ-جارماي، قوعامنىڭ تۇتاستىعىنا ءمان بەرۋ قاجەت ەكەنىن اتاپ ءوتتى.
«ۇلتتىق بىرەگەيلىك پەن بىرلىكتىڭ بىردەن-ءبىر نەگىزى – تۇتاستىق، ياعني ازاماتتاردى ءبولىپ-جارماۋ، جىك-جىككە بولمەۋ»، – دەدى ەرلان قارين.
ونىڭ ايتۋىنشا، پرەزيدەنت كوتەرگەن ماسەلەلەر ۇلتتىق مەنتاليتەت پەن قوعامدىق سانادا قالىپتاسقان كەيبىر كوزقاراستاردى قايتا قاراۋ قاجەتتىگىن كورسەتەدى.
