Vise-prezident Erlan Qarin Qazaqstan Halyq Keŋesınıŋ bırınşı sessiiasynda Memleket basşysy Qasym-Jomart Toqaev kötergen bırqatar mäselege qatysty pıkır bıldırdı.
Onyŋ aituynşa, Prezidenttıŋ soŋǧy uaqytta söilegen sözderınde qoǧamda talqylanatyn maŋyzdy mäseleler jiı köterılıp jür. Atap aitqanda, tarihqa közqaras, jaŋa ädetterdı qalyptastyru, tazalyqty saqtau jäne qoǧamdaǧy bölınuşılık mäselelerı söz boldy.
Erlan Qarin Memleket basşysynyŋ auyl men qala tūrǧyndaryn böluge, adamdardy «asfaltta ösken qazaq», «şala qazaq», «naǧyz qazaq» dep jıkteuge bolmaityny turaly pıkırıne nazar audardy.
Vise-prezidenttıŋ paiymynşa, mūndai tüsınıkterdıŋ bırqatary uaqyt öte qalyptasyp ketken jäne bügınde qoǧamnyŋ damuyna kedergı keltıruı mümkın.
Ol ūlttyq bıregeilıktı nyǧaitu üşın azamattardy äleumettık nemese tūrmystyq erekşelıkterıne qarai bölıp-jarmai, qoǧamnyŋ tūtastyǧyna män beru qajet ekenın atap öttı.
«Ūlttyq bıregeilık pen bırlıktıŋ bırden-bır negızı – tūtastyq, iaǧni azamattardy bölıp-jarmau, jık-jıkke bölmeu», – dedı Erlan Qarin.
Onyŋ aituynşa, Prezident kötergen mäseleler ūlttyq mentalitet pen qoǧamdyq sanada qalyptasqan keibır közqarastardy qaita qarau qajettıgın körsetedı.
